राजविराज– कार्यसमितिकै पदाधिकारीले कार्यालयमा तालाबन्दी गरेपछि जिल्ला खेलकुद विकास समिति सप्तरीको क्रियाकलाप ४ महिनादेखि ठप्प भएको छ।
आन्तरिक विवाद हुँदा उपाध्यक्ष धीरु बर्माको नेतृत्वमा समितिकै पदाधिकारीले गत जेठ ७ गते कार्यालयमा तालाबन्दी गरेका थिए। विवाद समाधान गरी तालाबन्दी खुलाउने प्रयास नहुँदा लामो समयदेखि खेलकुदका गतिविधि अवरुद्ध छन्।
समितिका पदाधिकारीबीचको किचलो तालाबन्दीसम्म पुगेको हो। तर, कार्यक्षमतामा प्रश्न उठाएर कार्यालय प्रमुख दिनेश भुजेलको कार्यकक्षमा तालाबन्दी गरिएको छ। उपाध्यक्ष धीरु बर्मा, कोषाध्यक्ष राजेश चौधरी लगायतका पदाधिकारी र सदस्यहरु तालाबन्दीमा संलग्न थिए। समितिका बहुमत सदस्यको निर्णय नमानेको, खेलकुदका गतिविधि ठप्प पारेको तथा हरहिसाब सार्वजनिक नगरेको आरोपसहित कार्यालयमा तालाबन्दी गरिएको हो।
भुजेल कार्यालय प्रमुख बन्न अयोग्य भएकाले तालाबन्दी गरिएको उपाध्यक्ष बर्माले बताए। अघिल्लो आर्थिक वर्षका धेरै कार्यक्रम उनकै कारण फ्रिज भएको उनको भनाइ छ। कञ्चनरुप नगरपालिका ९ स्थित मदन भण्डारी खेलग्राम निर्माणका लागि आएको २५ लाख तथा सप्तकोसी नगरपालिकास्थित भगनी मलेठमा कवर्ड हल निर्माणका लागि आएको १० लाख विकास बजेट खर्च गर्न नसकेको, खेलकुदका कुनै पनि गतिविधि सञ्चालन गर्न नसकेको र आव २०७१/७२ देखि हालसम्मको आयव्यय विवरण नदिएको बर्मा समूहको आरोप छ।
वास्तविकता अर्कै
उपाध्यक्ष बर्मासहितको समूहले कार्यालय प्रमुखलाई दोष दिए पनि कार्यालयमा तालाबन्दी गर्नुको कारण भने अर्कै छ। अध्यक्ष अमर खवासलाई अस्वीकार गर्ने र कोषाध्यक्ष राजेश चौधरीको नाममा खाता सञ्चालन गरी आफू अनुकूल काम गर्ने मनसायले कार्यालयमा तालाबन्दी गरिएको कर्मचारीहरु बताउँछन्।
६ महिनाअघि सप्तकोसी नगरपालिका १, फत्तेपुरका अमर खवास अध्यक्ष नियुक्त भएपछि अध्यक्षको दाबेदार रहेका उपाध्यक्ष बर्मासहित बहुमत सदस्यले खवासलाई अध्यक्ष अस्वीकार गर्यो। लामो समयसम्म खवासलाई कार्यालयमा उपस्थित भएर काम गर्ने मौकासमेत दिइएन। तर, कार्यालय प्रमुख अध्यक्षकै निर्देशनमा चल्न थालेपछि कार्यालयमा तालाबन्दी गरिएको उनीहरुको भनाइ छ।
बहुमत सदस्यले खवासलाई अध्यक्ष अस्वीकार गर्दै बैंक खातासमेत कार्यालय प्रमुख दिनेश भुजेल र कोषाध्यक्ष राजेश चौधरीको नाममा सञ्चालन गर्नुपर्ने अडान लिँदै आएका छन्।
अध्यक्षलाई बैठकमा बस्नै नदिने र आफू अनुकूल निर्णय गराउन खोज्ने प्रवृत्ति हाबी भएपछि तनावको स्थिति आएको र त्यसैबीचमा तालाबन्दी गरिएको कार्यालय प्रमुख भुजेल बताउँछन्। उनले आफूमाथि दोष थुपार्ने काम मात्रै भएको दाबी गरेका छन्। आरोप पुष्टि भए कारबाही भोग्न तयार रहेको उनले बताए।
कार्यालयमा तालाबन्दी भएको विषयमा राष्ट्रिय खेलकुद परिषद् र जिल्ला प्रशासन कार्यालय सप्तरीमा जानकारी गराइएको तर हालसम्म पनि समस्या समाधान ननिस्किएको उनको भनाइ छ।
अध्यक्ष अमर खवास भने समितिमा एक्का बनाउन खोजेपछि आफूले वास्ता गर्न छोडेको बताउँछन्।
राजनीतिक अखडा बनाइयो : खेलाडी
कार्यालयमा समितिकै पदाधिकारीले तालाबन्दी गरेपछि अधिकांश खेलकुदका अभ्यास प्रभावित भएका छन्। खेलकुद विकास समितिलाई खेलको विकासभन्दा पनि राजनीति गर्ने थलो बनाइएकाले आफूहरु निराश भएको भारत्तोलनका अन्तर्राष्ट्रिय खेलाडी मनोजकुमार यादवले गुनासो गरे। ‘अभ्यास गर्नै नपाएपछि सप्तरीका खेलाडीहरु हरेक क्षेत्रमा असफल भइरहेका छन्,’ उनले भने, ‘पदक ल्याउनुपर्ने खलाडी प्रतिस्पर्धामा टिक्नै नसक्ने अवस्था आइसक्यो, तर कसैलाई चिन्ता लागेको छैन।’
तालाबन्दीकै कारण डेढ महिनाअघि पोखरामा सम्पन्न भारोत्तोलन प्रतियोगितामा सहभागी भएका १३ खेलाडीमध्ये १२ जना रित्तो हात फर्किनुपरेको उनले गुनासो गरे।
यसैगरी, मंसिर १५ देखि सुरु हुने १३औं दक्षिण एसियाली खेलकुद प्रतियोगिता (साग) पनि प्रभावित हुन लागेकाले थप चिन्ता बढेको खेलाडीहरु बताउँछन्। सागमा सप्तरीबाट भारत्तोलनका मात्रै ३ जना खेलाडी सहभागि हुँदैछन्।
ताला तोड्ने र लगाउनेको होडबाजी
चार महिनादेखि लगातार कार्यालयमा तालाबन्दी भएर अभ्यास गर्न नपाएका खेलाडीहरुले बिहीबार मुल गेटको ताला तोडेका छन्। भारोत्तोलनका खेलाडी मनोजकुमार यादव, जिमका कमल साह, कबड्डीका शम्भु यादव, क्रिकेटका मो. मस्तकिम र हरिओम यादव लगायतको नेतृत्वमा ताला तोडिएको हो।
खेलकुद विकास समितिका पदाधिकारी र कार्यालय प्रमुखले खेलकुदका सामग्री माग्दासमेत नदिएपछि ताला तोड्न परेको उनीहरुले बताए। मुल गेटको ताला तोडेर आफूहरुले कर्मचारीलाई कामकाज गर्न सहज वातावरण बनाइदिएको बताउँदै तीन दिनभित्र कार्यालय सञ्चालनमा आए सबै कार्यालयका ताला पनि तोड्ने उनीहरुले चेतावनी दिएका छन्।
अर्कोतर्फ खेलाडीले गेटको ताला तोडेको जानकारी पाउनासाथ समितिका उपाध्यक्ष धीरु बर्माले पुनः गेटमा तालाबन्दी गरेका छन्। कार्यालयमा लागेको ताला आफूहरुको आन्तरिक समस्या भएकाले हस्तक्षेप नगर्न उनले खेलाडीलाई चेतावनीसमेत दिए।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।