काठमाडौं- युरोपियन फुटबलमा बलियो टिम बार्सिलोना जारी सिजन तालमेलविहीन देखिएको छ। गएको सिजन एथ्लेटिको मड्रिडसँग ११ अंक साथै रियल मड्रिडसँग १९ अंकको फरक पार्दै ला लिगाको उपाधि जितेको बार्सिलोना अहिले सुरुदेखि नै धरमराएको हो।
नयाँ सिजन सुरु हुनुअघि नै घाइते रहेका कप्तान लियोनल मेस्सी मंगलबार राति भिलारियलविरुद्धको खेलमा पहिलोपटक सुरुवाती ११ मा परे पनि उनी पुनः घाइते हुन पुगे। यो सिजन अवे मैदानमा कुनै पनि खेल नजितेको मेस्सीको अभाव बार्सिलोनामा अझ केही समय हुने देखिएको छ।
कोपा अमेरिकाको खेल सकाएर बिदापछि क्लब फर्किएका मेस्सी अभ्यासको पहिलो दिनमै घाइते भएका थिए। मेस्सीको दाहिने गोडाको पिडौंलामा चोट लागेको थियो।
मेस्सीले ला लिगामा एथ्लेटिको बिल्बाओसँग १-० ले हारेको पहिलो खेल, रियल बेटिसलाई ५-२ ले हराउँदा, ओसासुनासँग २-२ को बराबरी हुँदा र भ्यालेन्सियालाई ५-२ ले हराएको खेल गुमाएका थिए।
मेस्सीको पिडौंलामा लागेको चोट केही दिनमा ठिक हुने भनिए पनि उनी पूर्ण रुपमा ठिक नहुँदै मैदान फर्किएका थिए। च्याम्पियन्स लिगमा बोरुसिया डर्टमुन्ट र ला लिगामा ग्रानाडासँगको खेलमा उनी दोस्रो हाफको केही समय मैदानमा थिए।
यो सिजन ला लिगामा बार्सिलोनाको सुरुवात २५ वर्ष यताकै खराब भइरहेको छ। ६ खेलमा ३ खेलमा जित, १ बराबरी र २ खेलमा हार खेलेको बार्सिलोना अंक तालिकामा चौथो स्थानमा छ। भिलारियललाई हराउनुअघि बार्सिलोना आठौँ स्थानमा थियो। बार्सिलोनाले जितेको तीनै खेल घरेलु मैदानमा हो। अवे मैदानमा एउटै खेल नजितेको बार्सिलोनाले अब गेटाफेसँग शनिबार राति पौने ८ बजे खेल्दैछ।
अवे मैदानमा जित्न नसकेको बार्सिलोना घरेलु मैदानमा भिलारियलविरुद्ध पनि उत्कृष्ट हुन भने सकेन। मेस्सीको कर्नरमा एन्टोनियो ग्रिजम्यानले हानेको हेडर गोल र आर्थर मेलोको उत्कृष्ट प्रहारमा भएको दुई गोल बार्सिलोनाको खेलशैली भन्दा भिन्न थियो। बार्सिलोनाले तीब्र पासमा बल अगाडि बढाएर पोस्टमा गर्ने प्रहार भिलारियलविरुद्ध पनि देखिएन।
भिलारियलविरुद्धको खेलका लागि यसअघि घाइते रहेका स्ट्राइकर उसमान डेम्बेले पनि टिममा फर्किएका थिए। दोस्रो हाफमा मेस्सीको स्थानमा आएका उनले केही अवसरहरु बनाए पनि सदुपयोग हुन सकेन।
यसअघि मेस्सी घाइते रहेको अवस्थामा टिममा आएका १६ वर्षका अन्सु फाती पनि दोस्रो हाफको केही मिनेट मैदान देखिए। बार्सिलोना स्ट्राइकिङमा सबैभन्दा कमजोर लुइस स्वारेज देखिएका छन्। उनको बलमा नियन्त्रण गुम्नुका साथै सुस्त खेल भइरहेको थियो।
शनिबार राति ग्रानाडासँग हारेको खेललाई हेर्ने हो भने बार्सिलोनाको हरेक क्षेत्र कमजोर बनेको थियो। जित्ने टिम अंक तालिकाको शीर्षमा पुग्ने खेलमा ग्रानाडाले बार्सिलोनालाई हराउने सम्भावानबारे समेत कुरा भएको थिएन। तर, भखैरै ला लिगामा बढुवा भएर आइपुगेको टिमले डिफेन्डिङ च्याम्पियनलाई नै हराइदियो।
एर्नेस्टो भालभर्दे २०१७ मा बार्सिलोना प्रशिक्षक बनेर आएपछि बार्सिलोनाले घरेलु मैदानमा दुई खेल मात्रै हारेको छ। तर घरेलु मैदानमा जुन शैली र स्तर बार्सिलोनाले देखाउँछ अवे मैदानमा भने किन त्यही हुन सकेको छैन त?
‘हामीले अवे मैदानमा राम्रो खेल्न सकिरहेका छैनौँ। घरेलु मैदानमा जे भइरहेको छ त्यही लय अवे मैदानमा पनि हुनैपर्छ। पछिल्ला केही खेलहरु हेर्ने हो भने हाम्रो खेल बिग्रिएको छ’ ग्रानाडासँगको खेलका बेला यस्तो भनिरहेका भालभर्देले त्यसमा सुधार भने गर्न सकेनन्।
डिफेन्डर जेरार्ड पिकेले भिलारियलसँगको खेलपछि आफूहरुको नयाँ सिजनको तयारी नै राम्ररी नभएको बताएका छन्। जापान र अमेरिकामा नयाँ सिजनको तयारी खेल खेलेको बार्सिलोनाले महत्वपूर्ण टिमहरुसँग खेल्न सकेन। त्यसले गर्दा नयाँ सिजनमा असर परिरहेको पिकेको भनाई छ। प्रि सिजनको बेला केही खेलाडी कोपा अमेरिकामा व्यस्त हुनुले पनि तयारी राम्रो हुन सकेन।
कोपा अमेरिकापछि त कप्तान लियोनल मेस्सी, लुइस स्वारेज घाइते नै भए। पछिल्लो पटक त्यसमा उसमान डेम्बेले, स्यामुअल उमटिटी र जोर्डि अल्बासमेत थपिए। डेम्बेले र स्वारेज फर्किए पनि अरु अझै घाइते नै छन्।
यसैले पनि प्रशिक्षक भालभर्देले स्ट्राइकरमा एन्टोनियो ग्रिजम्यान र मिडफिल्डमा फ्रान्की डि योङलाई मिल्नेसम्म सबै स्थानमा प्रयोग गरिसकेका छन्।
नयाँ सिजनका लागि फ्रेन्च क्लब पिएसजीबाट नेमारलाई ल्याउने असफल कसरतले पनि टिमको मनोविज्ञानमा असर परेको देखिन्छ। नेमारलाई ल्याउन डेम्बेले, उमटिटी, सेमेडो र राकिटिक जस्ता खेलाडीसमेत त्याग्न तयार हुने बार्सिलोनाको योजनामा नेमार नआएपछिको अवस्थाले असर गरिरहेको छ।
यसमा कप्तान लियोनल मेस्सीको भूमिका पनि देखिन्छ। नेमार ल्याउने कुरामा देखिने गरी संलग्न भएका मेस्सी उनलाई ल्याउन क्लबले सक्ने जति काम नगरेको बताउँछन्। साथै अहिले टिममा सुरुवाती ११ को हुने भन्नेमा समेत मेस्सीले भालभर्देमाथि प्रभाव पारिरहेका छन्। जसले गर्दा कमजोर खेलका बाबजुद पनि सुरुवाती ११ मा स्वारेज छुटेका छैनन्।
एथ्लेटिको बिल्बाओ र ग्रानाडासँग हारेको खेल होस् या ओसासुनासँग बराबरी खेल्दा बार्सिलोन विपक्षी टिमभन्दा हरेक कुरामा बलियो क्लब हो। त्यसैले त्यो हारमा सबैभन्दा महत्वपूर्ण कुरा प्रशिक्षक भालभर्देको कमजोर योजनामाथि दोष लागिरहेको छ। च्याम्पियन्स लिगको पछिल्लो दुई सिजन रोमा र लिभरपुलसँगको हारमा भालभर्देले जुन गल्ती गरेका थिए, त्यो अहिले सुरुदेखि नै देखिन्छ।
त्यसमा मेस्सीमाथि टिम धेरै भर पर्नु मात्रै होइन मेस्सी नहुँदा कुन योजनामा अघि बढ्ने भन्ने स्पष्ट खाका भालभर्देसँग देखिँदैन। नयाँ सिजनका लागि ल्याइएका स्ट्राइकर ग्रिजम्यानले क्लबको चार अवे खेलमा एउटै सट पोस्टमा प्रहार गर्न नसक्नुले पनि उनको प्रयोग उपयुक्त स्थानमा नभएको देखिन्छ।
राइट ब्याकका सर्जि रोबर्टोलाई मिडफिल्डमा ल्याइरहेका भालभर्देलाई मिडफिल्डमै रहेका खेलाडीबीच सन्तुलन मिलाउन समस्या देखिएको छ। इभान राकिटिक, सर्जिंयो बुस्केट्स, आर्थर मेलो, कार्लेस एलेना, फ्रान्की डि योङ, आर्टुरो भिडाल जस्ता खेलाडीलाई मिडफिल्डमा कसरी प्रयोग गर्ने भन्ने भालभर्देसँग स्पष्ट योजना छैन।
बार्सिलोनाका लागि अझ दुखद कुरा त ला लिगामा सबैभन्दा धेरै गोल खाने टिममा अहिले बार्सिलोना रहेको छ। ६ खेलमा १४ गोल गरेको बार्सिलोनाले १० गोल खाइसकेको छ। जुन ला लिगा टिममा अहिले सबैभन्दा बढी हो। घरेलु मैदानमा रियल बेटिस र भ्यालेन्सियाविरुद्ध ५/५ गोल हान्दासमेत बार्सिलोनाले २/२ गोल खाएको थियो।
यसको सबैभन्दा ठूलो असर प्रशिक्षक भालभर्देमाथि नै परिरहेको छ। च्याम्पियन्स लिगको हारपछि समर्थकबाट आइरहेको भालभर्दे हटाउनुपर्ने आवाज अहिले केही फुटबल विश्लेषकहरुले समेत निकालिरहेका छन्। कतिपयले त उनको स्थानमा आउने प्रशिक्षकको नामसमेत दिन थालिसकेका छन्।
भिलारियलविरुद्धको जितले ‘भालभर्दे आउट’ को नारा सामाजिक सञ्जालमा केही कम भए पनि फुटबल जानकारहरु समेत मिसिएको आवाजमा अबको अवे खेलले ठूलो भूमिका खेल्नेछ। शनिबार गेटाफेविरुद्धको खेलमा पनि बार्सिलोना उसैगरी कमजोर देखिए भालभर्देको स्थानमा को भन्ने बहस बार्सिलोना व्यवस्थापनमा नै सुरु हुने देखिन्छ।
गएको सिजन भालभर्देलाई मेस्सीले जोगाएको तर्कमा विश्वास गर्ने हो भने त अहिले घाइते रहेका मेस्सी मैदानमा उत्कृष्ट खेल देखाउँदै उनलाई जोगाउने अवस्थामा पनि छैनन्। त्यसमा १६ वर्षका अन्सु फातीले देखाएको चमक भालभर्देका लागि जित हारको गणनामा प्रभाव पार्ने भइसकेको छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787673555.png)
-1787673999.jpeg)
-1786602170.png)
-1786513116.png)
