काठमाडौं- विश्व फुटबलको सर्वोच्च निकाय फिफाले वर्ष २०१९ का लागि दिने उत्कृष्ट खेलाडीको अवार्ड क्रिष्टियानो रोनाल्डो र भर्जिल भ्यान डाइकलाई पछि पार्दै लियोनल मेस्सीले जितेका छन्। मेस्सीले कीर्तिमानी छैटौंपटक फिफा उत्कृष्ट वर्ष खेलाडीको अवार्ड जितेका हुन्।
सोमबार राति घोषणा भएको अवार्डमा वर्षका उत्कृष्ट पुरुष खेलाडीमा बार्सिलोनाबाट खेल्ने अर्जेन्टिनाका मेस्सीले युभेन्टसबाट खेल्ने पोर्चुगलका रोनाल्डो र लिभरपुलबाट खेल्ने नेदरल्यान्डका भ्यान डाइकलाई पछि पारेका हुन्। गएको सिजन ला-लिगाको उपाधि जितेका मेस्सी युरोपियन प्रतिस्पर्धामा सर्वाधिक गोल गर्ने खेलाडी हुन्।
गएको वर्षका विजेता स्पेनिस क्लब रियल मड्रिडका मिडफिल्डर लुका मोडरिक भने यस वर्ष उत्कृष्ट १० मा समेत पर्न सकेका थिएनन्।
यसै वर्ष रोनाल्डो र मेस्सीलाई पछि पार्दै भ्यान डाइकले युइएफए वर्ष खेलाडीको अवार्ड जितेका थिए। यसैले फिफा वर्ष उत्कृष्ट पुरुष खेलाडी अवार्डमा पनि उनको सम्भावना बढी रहेको अनुमान गरिएको थियो। तर, मेस्सीले अवार्ड जित्दै विश्व फुटबलमा आफ्नो दबदबा कायम रहेको देखाएका छन्।
यसअघि रोनाल्डो र मेस्सीले फिफा उत्कृष्ट वर्ष खेलाडीको अवार्ड ५/५ पटक जितेका थिए। यो अवार्डसँगै मेस्सीले रोनाल्डोलाई पछि पारेका छन्। यसअघि रोनाल्डोले सन् २००८, २०१३, २०१४, २०१६ र २०१७ मा जितेका थिए भने मेस्सीले सन् २००९, २०१०, २०११, २०१२ मा लगातार चारपटक र २०१५ मा समेत जितेका थिए।
मेस्सीले गएको सिजन ३१ जुलाई २०१८ देखि ३१ जुलाई २०१९ सम्ममा बार्सिलोनाबाट ५० र अर्जेन्टिनाबाट ८ गरेर ५८ खेल खेले। जसमा उनले ४ हजार २४ मिनेट मैदानमा बिताएका थिए। त्यसमा बार्सिलोनाबाट ५१ र अर्जेन्टिनाबाट ३ गरेर ५४ गोल हानेका थिए।
त्यसलाई तुलनात्मक रुपमा हेर्ने हो भने उनले एक गोल गर्न सरदर ८६ मिनेट लगाएका छन्। मेस्सीले पोस्टमा प्रहार गरेको सट संख्या २ सय ८४ रहेको थियो।
उता महिलातर्फ अमेरिकी एलेक्स मोर्गान र इंग्ल्यान्डकी लुसी ब्रोन्जलाई पछि पार्दै अमेरेकी मेगान रापिनले फिफा वर्ष खेलाडीको उपाधि हात पारिन्। ३४ वर्षीया रापिन महिला विश्वकपमा गरेको ६ गोलले नै उनलाई गोल्डन बुटको हकदार बनाएको हो।
अरु अवार्ड कसले जिते?
उत्कृष्ट गोलका लागि दिइने पुसकास अवार्ड – ड्यानियल सोरी
उत्कृष्ट पुरुष गोलकिपर – एलिसन बेकर
उत्कृष्ट महिला गोलकिपर – सारी भ्यान भेनेनडाल
उत्कृष्ट महिला टिम प्रशिक्षक – जिल एलिस
फिफा समर्थक अवार्ड – सिल्भिया ग्रेको
पुरुष टिम उत्कृष्ट प्रशिक्षक – जर्गेन क्लोप
उत्कृष्ट महिला खेलाडी – मेगान रापिनो
फिफा फेयर प्ले अवार्ड – मार्सेलो बिएल्सा र लिड्स युनाइटेड
पुरुषतर्फ विश्व उत्कृष्ट-११ मा को-को?
गोलकिपर – एलिसन बेकर
डिफेन्डर – भर्जिल भ्यान डाइक, म्याथियस डि लिग्ट, मार्सेलो, सर्जियो रामोस
मिडफिल्डर – इडन हाजार्ड, फ्रान्की डि योङ, लुका मोडरिक
फरवार्ड – केलियन एमबाप्पे, लियोनल मेस्सी, क्रिष्टियानो रोनाल्डो
महिलातर्फ विश्व उत्कृष्ट-११ मा को-को?
गोलकिपर – सरी भान भेनेन्डल
डिफेन्डर – लुसी ब्रोन्ज, वेन्डी रेनार्ड, लिला फिस्चर, केल्ली ओ-हारा
मिडफिल्डर – अमान्डिन हेनरी, जुली एर्ज
एट्याकिङ मिडिफिल्डर – मार्टा, रोज लाभेली, मेगान रापिन
स्ट्राइकर – एलेक्स मोर्गन
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1755350564.jpg)
-1764146706.png)
