काठमाडौं– शिवरात्रीमा पशुपति क्षेत्रमा नाङ्गा बाबाहरुले धर्मको नाममा अश्लीलता फैलाइरहेको र यो प्रचलन रुढीवादी भएको भन्दै सर्वोच्च अदालतमा रिट दायर गरिएको छ। कानुन व्यवसायी यज्ञमणि न्यौपानेले शिवरात्रिमा नाङ्गा बाबाहरुबाट हुने उच्छृखलता नियन्त्रण गर्न आदेश माग्दै आइतबार रिट दायर गरेका हुन्।
उनीहरुले गर्ने हर्कत धर्मशास्त्रमा नभएका कारण भ्रम र रुढीवाद फैलाइरहेको न्यौपानेको जिकिर छ। रिट निवेदनमा भनिएको छ, ‘विवाह नभएका महिलाले नाङ्गा बाबाको लिङ्ग छोई ढोग गरी पूजा गर्दा राम्रो पति पाइने, सन्तान नभएका महिलाले बाबाहरुका शरीर तथा लिङ्गमा धसेको खरानीको टीका लगाउँदा सन्तान प्राप्ति हुने तथा अन्य महिलाले नाङ्गा बाबाको लिङ्गको दर्शन गरी लिङ्गमा दलिएको खरानीको टीका लगाएमा रोग नलाग्ने, लागेको रोग निको हुने, सन्तान सुख हुने जस्ता रुढिवादी भ्रम फैल्याएर महिला तथा बालबालिका र सम्पूर्ण नागरिकमाथि अपमान भइरहको छ।’
यसबाहेक युवतिलाई लक्षित गरी लिङ्ग ठोक्काउने, लिङ्गमा झुन्ड्याइएको घन्टीले युवतीहरुलाई ठोक्काउने तथा छेकीछेकी नाङ्गा बाबाको लिङ्गमा बाँधेको घन्टी बजाउन लगाउने लगायतका यौनजन्य क्रियाकलप समेत हुने गरेको भन्दै यस्ता अशोभनीय र अमर्यादित कार्य गरी शिवरात्रीलाई अमर्यादित बनाएकाले मुद्दा दायर गर्नुपरेको उनले उल्लेख गरेका छन्।
पशुपती विकास कोषले बाबाहरुलाई शिवरात्रिमा पारिश्रमिक दिएर बिदा गर्ने भएकाले धर्मका नाममा नेपालको अर्थतन्त्रलाई कमजोर बनाउँदै लगेको उनको दाबी छ।
लिङ्गको प्रयोग गरी विभिन्न अश्लील खेलहरु खेल्ने, हेर्न बाध्य बनाउने लगायतका कार्य गरी महिला तथा बालबालिकामाथि यौनहिंसा गरी मनोवैज्ञानिक प्रभाव पार्ने कार्य नेपालको संविधानको धारा २६(३),२९(२) ३२ (२)(३) ३८(३),३९(६) विपरितको कार्य भएको उनको रिटमा उल्लेख छ। उनले नेपालको संविधानको धारा १४४ (२) (३) का आधारमा यस्तो अश्लीलता प्रयोग नगर्नु, शिवरात्रिको अवसरमा पशु्पति लगायतका शिवालयहरुमा नाङ्गा बाबाहरुलाई नाङ्गै हिँडडुल गर्न, लिङ्गको खरानी दल्ने तथा दलिदिने लगायतका कार्य नगर्नु नगराउनु र धार्मिक पर्वका नाममा अश्लीलताको प्रदर्शनकै लागि नेपाली रकम खर्चिएर सीमापारबाट नाङ्गा बाबाहरु ल्याउने कार्य बन्द गर्नु गराउनु र गाजाँ, भाङ, चरेसजस्ता लागुपदार्थ सेवन गर्न नदिनु भन्ने समेत व्यहोराको प्रतिशेधको आदेश जारी गरिदिन माग गरेका छन्।
रिट निवेदनमा प्रधानमन्त्री तथा मन्त्रिपरिषद्को कार्यालय सिंहदरबार, गृह मन्त्रालय, संस्कृति, पर्यटन तथा नागरिक उड्डयन मन्त्रालय, पशुपति क्षेत्र विकाश कोष सञ्चालन परिषद्, पशुपति क्षेत्र विकास कोष गौशाला, महाशिवरात्री व्यवस्थापन समिति लगायतलाई विपक्षी बनाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
