काठमाडौं- राष्ट्रिय पुरुष भलिबलमा सर्वाधिक धनराशिको प्रथम प्रकाश दाहाल स्मृति युवा नेपाल कप राष्ट्रिय भलिबल प्रतियोगिताको उपाधि नेपाल पुलिस क्लबले जितेको छ।
नयाँ बसपार्कस्थित ढोरपाटन स्पोर्टस् क्लबको खेल मैदानमा शनिबार भएको फाइनलमा अर्काे विभागीय टोली त्रिभुवन आर्मी क्लबलाई ३–० को सोझो सेटमा पराजित गर्दै पुलिसले उपाधि जितेको हो।
राष्ट्रिय खेलाडीले भरिएको दुई टोलीबीचको फाइनल खेल रोचक र प्रतिस्पर्धात्मक हुने अनुमान गरिए पनि पुलिसले एकपक्षीय नतिजा निकाल्न सफल भयो। सबै तीन सेटमा पुलिस २५–२२, २५–२२ र २५–२२ ले नै विजयी हुन सफल भएको थियो।
सबै सेटमा आर्मीले सुरुवाती अग्रता लिए पनि त्यसलाई जोगाउन नसक्दा पराजित हुन पुग्यो। चोटका कारण मुख्य स्पाइकर मानबहादुर श्रेष्ठविना फाइनल खेलेको आर्मी पुलिससामु कमजोर नै देखिएको थियो। मानबहादुर गत सोमबार बर्षाले स्थगित भएको फाइनलका दौरान नै बाया खुट्टामा चोटका कारण बाहिरिएका थिए। त्यसपछि मंगलबार पनि बर्षाले खेल हुन नसकेपछि फाइनल खेल शनिबारसम्म सारिएको थियो।
उपाधिसँगै पुलिसले ५ लाख रुपैयाँ जित्यो। दोस्रो भएको आर्मीले ३ लाख रुपैयाँ पायो। यस्तै तेस्रो भएको गण्डकी प्रदेशले १ लाख तथा चौथो भएको नेपाल एपीएफ क्लबले ५० हजार रुपैयाँ पाए।
व्यक्तिगत विधामा च्याम्पियन पुलिसले वर्चस्व जमाउँदा आर्मीका धनबहादुर भट्ट क्षेत्री प्रतियोगताको सर्वाेत्कृष्ट खेलाडी चुनिए। उनले एउटा टीभीएस मोटरसाइकल जिते। पुलिसका कुल बहादुर थापा बेस्ट स्पाइकर, कप्तान इम बहादुर राना सेटर, द्वारिका थापा सर्भर, भीम गाहामगर लिवेरो र सरोज श्रेष्ठ उत्कृष्ट प्रशिक्षक चुनिए। गण्डकी प्रदेशका याम क्षेत्री उत्कृष्ट ब्लकर चुनिए। व्यक्तिगत विधाका उत्कृष्टहरुले जनही १०–१० हजार रुपैयाँ पाए।
प्रगतिशिल युवा नेपाल गोरखा काठमाडौंले आयोजनामा गत भदौं २४ बाट सुरु भएको प्रतियोगितामा विभिन्न ८ टोलीले लिगकम नकआउटका आधारमा प्रतिस्पर्धा गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787673555.png)
-1787673999.jpeg)
-1786602170.png)
-1786513116.png)
