नेपालगन्ज- मापदण्ड विपरीत सञ्चालन भएका नेपालगन्जका ३ वटा औषधि पसललाई जिल्ला अनुगमन टोलीले सिलबन्दी गरेको छ।
अनुगमन टोलीले नेपालगन्जको राझास्थित पवन मेडिकललाई दर्ता नभएको औषधिबिक्री वितरण गरेको पाइएपछि १५ दिनसम्म शिलबन्दी गरी कारबाही प्रक्रिया अगाडि बढाएको छ।
त्यसैगरी, नेपालगन्जको बिपी चोकस्थित दर्शन फार्मलाई औषधि बिक्रीका लागि इजाजत नपाएका व्यक्तिले औषधि बिक्री गर्ने गरेको, चिकित्सकको पर्चाका आधारमा बिरामीको रेकर्ड राखेर बिक्री गर्नुपर्ने मनोदिपक अर्थात् लागुऔषधको रुपमा पनि प्रयोग गर्ने मिल्ने किसिमका औषधि मापदण्ड विपरीत बिक्री गरेको, औषधिमा लेखिएको मूल्यभन्दा बढीमा बिक्री गरेको भेटिएपछि २१ दिनका लागि अनुगमन टोलीले शिलबन्दी गरेको हो।
त्यसैगरी भेरी अञ्चल अस्पताल नजिकै रहेको हेल्प स्टार फार्मेसीलाई औषधि बिक्रीका लागि इजाजत नपाएका व्यक्तिले औषधि बिक्री गर्ने गरेको चिकित्सकको पर्चाका आधारमा बिरामीको रेकर्ड राखेर बिक्री गर्नुपर्ने मनोदिपक मापदण्डविपरीत बिक्री गरेको, नेपालमा दर्ता नभएको औषधि बिक्री गरेको पाइएका कारण ३० दिनसम्म सिलबन्दी गरी कारबाहीको प्रक्रिया अगाडि बढाएको छ।
मापदण्ड अनुसार औषधि पसल सञ्चालन गर्नका लागि पटकपटक आग्रह गर्दा पनि अटेर गरेका कारण पसलमा शिलबन्दी गरिएको अनुगमन टोलीका सदस्य एवं जिल्ला प्रशासन कार्यालय बाँकेका शाखा अधिकृत खगेन्द्र पौडेलले बताए।
वाणिज्य, औषधि व्यवस्था विभाग, जिल्ला प्रशासन, जिल्ला प्रहरी सहितको टोलीले बाँकेका औषधि पसलहरुको अनुगमन गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
