विधेयकको नामबाट 'पारमाणविक' शब्द हट्ने, निजीलाई सञ्चालन अधिकार नदिन मन्त्री सहमत

राजनीति

नेपाल लाइभ आइतबार, भदौ २९, २०७६ १५:१८

काठमाडौं– विवादित 'पारमाणविक तथा रेडियोधर्मी पदार्थको सुरक्षित तथा शान्तिपूर्ण प्रयोग सम्बन्धमा व्यवस्था गर्न बनेको विधेयक'मा रहेका कतिपय प्रावधानबाट सरकार पछि हट्ने भएको छ।

लामो समयदेखि प्रतिनिधिसभाको शिक्षा तथा स्वास्थ्य समितिमा रहेको सो विधेयकमाथि आइतबारको छलफलका क्रममा शिक्षा, विज्ञान तथा प्रविधि मन्त्रीले विधेयकको नामबाट 'पारमाणविक' शब्द हटाउन आफू सकारात्मक रहेको बताए।

यसअघिका छलफलमा प्राय सांसदहरुले पारमाणविक शब्द हटाउन आग्रह गरेका छन्। कतिपयले भने पारमाणविक शब्द हटाउन विधेयकमाथि संशोधन प्रस्ताव राखेका छन्। सो शब्दले आशंका बढाएको सांसदहरुको तर्क छ।

त्यस्तै, पारमाणविक उत्पादनमा निजी क्षेत्रको प्रवेश रोक्नुपर्ने सांसदहरुको मागमा पनि सरकार सहमत भएको छ। 'संवेदनशील भएकाले निजी क्षेत्रलाई नदिऔं, पूरै सरकारले गर्नुपर्छ भन्ने माननीयहरुको धारणा छ। मैले सो कुरामा सहमति जनाइसकेको छ', मन्त्री पोखरेलले भने, 'सरकारको नियन्त्रणमा नेतृत्वमा व्यवस्थापनमा अगाडि बढ्नुपर्छ।'

उनले अनुसन्धान केन्द्रहरु भने चाहिने बताए। त्यसले नै आवश्यक जनशक्ति उत्पादनमा सघाउने उनको तर्क छ। 'त्यो वर्षौं लाग्छ। हामीसँग भएको सम्भावनाहरुको अध्ययन हाम्रै जनशक्तिले गरोस्। त्यसप्रति पनि हामीले ध्यान दिनुपर्छ', उनले भने, 'अब पनि अनुसन्धान केन्द्रहरु निर्माण गरेनौं हामी ढिला हुन्छौं, पछि पर्छौं।'

उनले आणविक राष्ट्र बनाउने आफूहरुको उद्देश्य र सोच दुवै नभएको बताए।

विधेयकका कतिपय प्रावधानमा परिवर्तन गर्न मन्त्रीले जनाएका प्रतिबद्धता समेटेर मन्त्रालयले ड्राफ्ट बनाउने छ। सो ड्राफ्टमा केन्द्रित भएर छलफल पुनः अघि बढ्ने छ। मन्त्रालयले आइतबार नै ड्राफ्ट बनाएर समितिमा पठाउने मन्त्री पोखरेलले बताए।

(फाइल तस्बिर)

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

बेरुतमा भएको इजरायली हमलामा ११ जनाको मृत्यु

धनकुटा र उदयपुरमा प्रहरीद्वारा ६४ हजार गाँजाका बोट फडानी

प्यालेस्टाइनमाथिको आक्रमण रोक्न माग गर्दै काठमाडौंमा प्रदर्शन