पक्राउ परेका चिनियाँ ह्याकर।
काठमाडौं- नेपालमा भएको एटिएम ह्याकिङ प्रकरणको अनुसन्धान गर्न सिंगापुरबाट आइटी विज्ञ टोली काठमाडौं आइपुगेको छ।
राष्ट्र बैंकको आग्रहमा टेक्निकल पाटोको अनुसन्धान गर्न उक्त टोली नेपाल आइपुगेको नेपाल राष्ट्र बैंकका कार्यकारी निर्देशक बमबहादुर मिश्रले बताए।
बैंकको आफ्नो सिस्टमलाई बाइपास गरेर ह्याक गरी रकम निकालिएका कारण त्यसको सुइँको बैंकले पाउन सकेको थिएन। नेपाल राष्ट्र बैंकले आकस्मिक बैठक बोलाएर छानबिन गर्न गठन गरेको समितिले ह्याकिङसम्बन्धी धेरै कुराहरु प्राविधिक भएकाले खुट्याउन नसकेपछि आइटी विज्ञ टोली बोलाउने निर्णय गरेको थियो।
सोहीअनुसार उक्त टोली सिंगापुरबाट शनिबार काठमाडौं आइपुगेको हो। ३ सदस्यीय टोलीले एटिएम सेवाको नेटवर्किङ सिस्टम 'नेप्स'सँग समन्वय भएर काम सुरु गरिसेको मिश्रले बताए।
यता घटनाको अनुसन्धान गरिरहेको महानगरीय प्रहरी परिसर काठमाडौंले प्राविधिक पाटाहरू केलाउन सकेको छैन। ह्याकरहरूका ल्यापटप, अन्य डिभाइस बरामद गरिए पनि त्यहाँ इन्स्टल भएका सफ्टवेयरबारे प्रहरीसमेत अनविज्ञ छ।
‘हुन त ह्याकिङमा प्रयोग हुने सबै चिज हामीले बरामद गरेका छौं,’ उक्त घटनाबारेमा जानकारी दिँदै एक प्रहरी अधिकारी भन्छन्, 'ती सबै टेक्निकल कुरा भएकाले हामीले त्यहाँबाट केही पत्ता लगाउन सकेका छैनौं। विदेशबाट टोली आइसकेकाले केही सहयोग होला।’
सिंगापुरबाट आएको आइटी विज्ञको टोलीले ल्यापटपमा भएका सफ्टवेयर र बरामद भएका अन्य डिभाइसबारेमा अनुसन्धान गरिसकेपछि कसरी ह्याक गर्न सम्भव भयो भन्ने कुरा बाहिर आउने विश्वास गरिएको छ।
गत शनिबार काठमाडौंस्थित ७ वटा बैंकका एटिएम बुथबाट चिनियाँ र फ्रेन्च ह्याकरले १ करोड ८९ लाख भन्दा बढी रकम झिकेका थिए। महानगरीय प्रहरी परिसर काठमाडौंको टोलीले रकम झिक्नेमा संलग्न चिनियाँ नागरिकहरु लिन जैनमेङ, लिओ जाइलेई, सु लायङगाङ, क्यु युनक्विङ, चेन बिनबिनलाई होटल र दरबारमार्गस्थित एटिएम बुथबाट पक्राउ गरेको थियो।
एटिएमबाट अवैधरुपमा पैसा निकालेपछि नियमविपरीत मनि एक्सचेन्जमा साटिएपछि मनि एक्सचेञ्जका सञ्चालक देवनाथ लामिछाने, रोशन प्रधान श्रेष्ठ र म्यानेजर रेवती दवाडी पनि पक्राउ परेका थिए।
फरार रहेका तीनमध्ये फ्रेन्च नागरिक छु लुई पनि त्रिभुवन अन्तराष्ट्रिय विमानस्थलको अध्यागमनबाट पक्राउ परेका थिए। फरार २ चिनियाँलाई पक्राउ गर्न नेपाल प्रहरीले अन्तर्राष्ट्रिय प्रहरी संगठन 'इन्टरपोल'लाई पत्राचार गरिसकेको छ।
प्रहरीले त्यसबेला रुपैयाँ १ करोड २६ लाख २९ हजार ४५, अमेरिकी डलर ९ हजार १ सय ८, चिनियाँ युआन १ हजार १ सय ९१, कम्बोडियन रियल ५ हजार, र हङकङ डलर ८०, नक्कली भिजा कार्ड १ सय ३२ थान, १७ थान सक्कली भिजाकार्ड, कार्ड प्रिन्टर मेसिन एक थान, मोबाइल ६ थान र ल्यापटप एक थान बरामद गरेको थियो।
सम्बन्धित समाचार
एटिएम ह्याकका विषयमा राष्ट्र बैंकको यस्तो छ निष्कर्ष
ह्याक हुने डरले अधिकांश बैंकका एटिएम बन्द
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
