काठमाडौं- नक्कली कार्डहरु प्रयोग गरी एटिएम मेसिनबाट अवैधनिक रुपमा २० लाखभन्दा बढी रकम निकाल्ने एक जना पक्राउ परेका छन्।
राष्ट्रिय वाणिज्य बैंकको काठमाडौं उपत्यकाका विभिन्न स्थानमा रहेका एटिएम बुथहरुबाट फ्रड प्लास्टिक म्याग्नेटिक कार्डको प्रयोग गरी सो बराबरको रकम निकाल्ने बारा पिपरपानी-७ स्थायी निवास भई हाल काठमाडौं-३१, शंखमुल बस्ने ३३ वर्षीय राजु कुमार पाण्डेलाई पक्राउ गरिएको हो।
पाण्डेलाई प्रहरी प्रधान कार्यालयअन्तर्गत केन्द्रीय अनुसन्धान ब्युरो (सिआइबी)को टोलीले बिहीबार पक्राउ गरी उच्च अदालत पाटनबाट ७ दिनको म्याद थप गरी अनुसन्धान अघि बढाइएको सिआइबीका प्रवक्ता प्रहरी उपरीक्षक दिपक रेग्मीले बताए।
उनको साथबाट नगद ६ लाख ८६ हजार, विभिन्न किसिमका १२ वटा कार्डहरु, आइफोनसहित मोबाइल २ थान, बा७३प ७६८५ नम्बरको मोटरसाइकल तथा २ थान एप्पल कम्पनीको ल्यापटप बरामद गरिएको रेग्मीले बताए।
अनुसन्धानअनुसार अभियुक्त पाण्डे र ३ जना रोमानियन नागरिकहरु मिली राष्ट्रिय वाणिज्य बैंकको काठमाडौंस्थित विभिन्न एटिएम बुथबाट पैसा निकालेका थिए। पाण्डेसँग रोमानियन नागरिकहरुको करिब ७/८ महिना अगाडि नेपाल आउँदा ठमेलमा चिनजान भई सो कार्य गरेको खुलेको छ।
पक्राउ अभियुक्तले विदेशीहरुलाई विभिन्न एटिएम बुथमा पुर्याई एटिएमबाट अनाधिकृत रुपमा निकालिएको रकम बाँडफाँड गरी लिने गरेकोसमेत खुलेको छ। यस कार्यमा संलग्न विदेशीहरुले भने नेपाल छोडी सकेको बुझिएको प्रवक्ता रेग्मीले बताए।
प्रवक्ता रेग्मीका अनुसार सिआइबीले हालसम्म गरेका विभिन्न अनुसन्धानबाट एटिएमबाट ठगी गरेको ९५ लाख ६२ हजार ८ सय ५० रुपैयाँ, ७५ हजार २ सय २५ अमेरिकी डलर, ७३ हजार ८ सय ७५ युरो, ३३ हजार इन्डोनेसियन रुपी, ४ सय ७० फिलिपिन करेन्सी र विभिन्न १ जार ३ सय ६९ थान एटिएम कार्ड बरामद गरेको छ।
एटिएम कार्ड ठगीमा ब्युरोले हालसम्म ६ नेपाली, ४ रोमानियन, ४ टर्किस, ४ बुल्गेरियन, २ भारतीय र ४ माल्दोभियन गरी जम्मा २४ जनालाई पक्राउ गरेको जनाएको छ। (प्रतिकात्मक तस्बिर)
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।