काठमाडौं- नक्कली एटिएमबाट पैसा झिक्दै गरेको अवस्थामा शनिबार ५ जना चिनियाँ नागरिक पक्राउ परेपछि नेपालको बैंकिङ प्रणाली ह्याकरहरुको निशानामा परेको भन्दै अधिकांश बैंक तथा वित्तीय संस्थाको एटिएम सेवा बन्द गरिएको थियो।
नेपाल इलोक्ट्रोनिक पेमेन्ट सिस्टम (नेप्स)सँग स्विच प्रयोग गर्ने बैंक तथा वित्तीय संस्थासँगै आफ्नो छुट्टै स्विच प्रयोग गर्ने बैंकहरुले पनि एटिएम सेवा बन्द गरेका थिए।
सोही विषयमा नेपाल राष्ट्र बैंकले आइतबार बिहान आकस्मिक बैंठक बोलाएर नेप्स तथा बैंकका सूचना प्रविधि शाखा प्रमुखहरुसँग छलफल गरेको छ। छलफलपछि अधिकांश बैंक तथा वित्तीय संस्थाका एटिएम सञ्चालनमा आएका छन् भने एनआइसी एसिया र प्रभु बैंकका एटिएम अझै सञ्चालनमा आइसकेका छैनन्।
नेपाल राष्ट्र बैंकले केही समयका लागि एटिएम प्रयोगकर्ताहरुलाइ जुन बैंकको एटिएम हो, सम्बन्धित बैंकको एटिएमबाट मात्रै कारोबार गर्न पनि आग्रह गरेको छ।
प्रहरीले एटिएम ह्याक गरेर रकम निकाल्ने ५ जना चिनियाँ नागरिकलाई पक्राउ गरेपछि सुरक्षा खतराका कारण बैंकहरुले तत्कालका लागि एटिएम बन्द गरेका थिए।
पक्राउ परेका ५ चिनियाँ नागरिकको साथबाट १ करोड २६ लाख २९ हजार ४५ रुपैयाँ र ९ हजार अमेरिकी डलर बरामद गरिएको प्रहरीले जनाएको छ। नबिल बैंकका खातावालाको रकम उनीहरुले अनधिकृत रुपमा निकालेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
