सुर्खेत- प्रदेश ६ को पहिलो प्रदेशसभा बैठकले संघीयता संस्थागतसँगै आर्थिक समृद्धिको ढोका खुलेको भन्दै वीरेन्द्रनगरमा दीप प्रज्ज्वलन गरिएको छ। आईतबार प्रदेशसभाको पहिलो बैठक सम्पन्न भए लगत्तै सुर्खेत उद्योग वाणिज्य संघले आर्थिक समृद्धिको अपेक्षासहित दीप प्रज्ज्वलन गरेर खुसीयाली मनाएको हो।
संघीयता अनुसार प्रदेश सरकार गठन प्रक्रियामा रहेको भन्दै व्यवसायीहरुले स्थानीय वीरेन्द्रचौकमा दीपावली गरेका हुन्। सुर्खेत उद्योग वाणिज्य संघका अध्यक्ष प्रकाश अधिकारीले गरिबी र अशिक्षाले पछाडि परेको प्रदेश ६ मा थुप्रै सम्भावना रहेको बताए। उनले जलस्रोत, जडिबुटी, खानी, वन, कृषिका दृष्टिकोणले अन्य प्रदेशको तुलनामा प्रदेश ६ मा थुप्रै सम्भावना रहेको उल्लेख गरे।
उनले लगानीमैत्री नीतिको अभावले कर्णाली क्षेत्र पछाडि परेको भन्दै अबको प्रदेश सरकारले लगानीमैत्री नीति निर्माण गर्नुपर्ने बताए। प्रदेश समृद्ध बनाउने आधारमा निजी क्षेत्रको प्रतिनिधित्व अनिवार्य पर्ने भन्दै उनले सरकारले त्यसतर्फ ध्यान दिनुपर्नेमा जोड दिए।
दीप प्रज्वलन कार्यक्रममा नेपाल उद्योग वाणिज्य महासंघ प्रदेश ६ का अध्यक्ष पदमबहादुर शाही, वीरेन्द्रनगर नगरपालिकाका प्रमुख देवकुमार सुवेदी, उप–प्रमुख मोहनमाया ढकाललगायतको उपस्थिति थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
