काठमाडौं– सत्तापक्षका सांसदहरुको प्रस्ताव संसदबाट पारित भयो भने पत्रकारिता गर्न प्रवेश परीक्षा दिनुपर्ने भएको छ।
राष्ट्रियसभामा पेस भएको मिडिया काउन्सिल विधेयकमाथि संशोधन प्रस्ताव दर्ता गर्दै नेकपाका १४ जना सांसदले पत्रकारलाई प्रवेश परीक्षाको व्यवस्था थप गर्न सुझाएका हुन्।
विधेयकको दफा १५ पछि २३ सम्म थप्दै परीक्षाको व्यवस्था गर्नुपर्ने सुझाइएको हो। प्रस्तावित दफा १६ मा वर्षको दुईपल्ट पत्रकार व्यवसायी परीक्षा हुने भनिएको छ। परीक्षामा लिखित तथा मौखिक प्रश्नहरु सोधिनेछन्। मौखिकको पूर्णांक लिखितको १० प्रतिशत प्रस्ताव गरिएको छ।
उपदफा २ मा विज्ञहरु समावेश भएको तीन सदस्यीय परीक्षा व्यवसायी समिति गठन गर्न सुझाइएको छ। जसले पत्रकारिता गर्नेका लागि लाइसेन्स परीक्षा लिनेछ।
लाइसेन्स परीक्षा दिनका लागि कम्तीमा स्नातकसम्मको अध्ययन हुनुपर्नेछ। पत्रकारितामा विषयमा स्नातक गरेकोले सिधै र अन्य विषयमा स्नातक गरेकोले तीन वर्षपछि सञ्चार प्रतिनिधि भई काम गरेपछि मात्रै लाइसेन्स परीक्षामा समावेश पाउनेछन्।
प्रेस प्रतिनिधि भई काम गर्न पत्रकारितामा कक्षा १२ उत्तीर्ण गरेको वा अन्य विषयमा स्नातक गरेको हुनुपर्नेछ।
यसैगरी पत्रकार वरिष्ठ हुने मापदण्ड पनि निर्धारण गरिएको छ। निरन्तर १५ वर्ष पत्रकारिता गरेको पत्रकारले मिडिया काउन्सिल बोर्डको सिफारिसमा सूचना सञ्चार तथा प्रविधि मन्त्रालयबाट वरिष्ठ पत्रकारको उपाधि पाउनेछ।
ऐन प्रारम्भ हुनुअघिका पत्रकारको लगत एक वर्षभित्र काउन्सिलले लिएर प्रमाणपत्र उपलब्ध गराइसक्नुपर्ने प्रावधान पनि विधेयकका थप्न भनिएको छ।
राष्ट्रियसभाका सांसदहरु ठगेन्द्रप्रकाश पुरी, शेरबहादुर कुँवर, रामलखन चमार, उदया शर्मा पौडेल, सिंहबहादुर विश्वकर्मा, खिमकुमार विश्वकर्मा, नन्दा चपाईं, युटोल तामाङ, हरिचरण सिवाकोटी, मीना बुढा, दिलकुमारी रावल थापा पार्वती, चक्र स्नेही जीवन बुढा र भैरवसुन्दर श्रेष्ठले संयुक्त रुपमा संशोधन प्रस्ताव पेस गरेका हुन्। तस्बिर : thoughtco.com)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
