सुर्खेत- दैलेखको श्रीस्थान लैजाने भन्दै नेपालगन्जको कान्जीहाउसबाट लगिएका गाईलाई सुर्खेतको वीरेन्द्रनगरमा भिरबाट खसालिएको छ।
बिहीबार राति ११ बजे नेपालगन्जबाट आठ वटा ट्रकमा २ सय ९१ वटा गाई र गोरुलाई सोतर्फ लगिएको थियो। कर्णाली प्रदेशको राजधानी वीरेन्द्रनगरको बाटो हुँदै दैलेख लैजाने क्रममा वीरेन्द्रनगर-८ को कटकुवामा गाईहरुलाई बिहान ३ बजे ट्रकबाट ओरालिएको थियो।
सोपश्चात् गाईलाई भीरबाट खसालिएको थियो। जसमध्ये १६ वटा गाई कटकुवामा मृत भेटिएका छन्।
बिहान उज्यालो भएपछि बाँचेका गाईहरु सडक र बारीमा देखिएपछि मात्र घटनाबारे थाहा पाएको स्थानीय दुर्गा बानियाँले बताए। बिहान ९ बजे, नेपाल प्रहरी, ट्राफिक प्रहरी, नागरिक समाज, सञ्चारकर्मी लगायतको टिम कटकुवामा पुगेर घटनाबारे अनुसन्धान थालिएको थियो।
गाईको कानमा लगाइएका ट्यागअनुसार कानुनी प्रक्रिया पूरा नगरी ल्याइएको पाइएको कर्णाली प्रदेशका प्रहरी प्रमुख डिआइजी पूर्णचन्द्र जोशीले बताए। नेपालगन्जबाट ल्याइएका गाई दैलेख नपुर्याउँदै बीच बाटोमै के कारणले खसालिए भन्नेबारे अनुसन्धान भइरहेको डिआइजी जोशीले जानकारी दिए।
‘१६ वटा गाईहरु मृत भेटिएका छन्। अन्य ७ गाईको अवस्था गम्भीर छ,’ डिआइजी जोशीले भने, 'उताबाट कोचाकोच गरेर ल्याइयो। गाडीभित्रै गाईहरु मर्न थालेपछि सबै गाईलाई बिच बाटोमा ओराली भिरबाट खसालिएको हुनसक्ने प्रारम्भिक अनुसन्धानका क्रममा खुलेको छ।'
उनक अनुसार जंगल तथा गाउँमा फेला परेकामध्ये एक सय ५० भन्दा बढी गाई, गोरु घाइते छन्। प्रहरीका अनुसार बिहीबार राति साढे १२ बजेतिर चौपाया बोकेका ८ वटा ट्रक सुब्बाकुना प्रहरी चौकीमा इन्ट्री भएका थिए।
प्रहरीले मृतक तथा घाइते गाईगोरुको तथ्याङ्क संकलन गरिरहेको छ। करिब दुई/तीन किलोमिटरको दूरीमा चौपायाहरु भेटिएका छन्। डिआइजी जोशीका अनुसार जिल्ला प्रहरी कार्यालय सुर्खेतले मुचुल्का उठाइरहेकाले मृतक चौपायाहरुको संख्या अझै बढ्नसक्नेछ।
गाईगोरु छोडेर नेपालगञ्ज फर्कंदै गरेका ५ वटा ट्रकलाई बबईबाट प्रहरीले नियन्त्रणमा लिई अनुसन्धान गरिरहेको डिआइजी जोशीले बताए।
घटनास्थलमा रहेका प्रहरी नायव निरीक्षक लुद्र केसीका अनुसार ठाउँ-ठाउँमा प्रहरीको टोली बाँडिएकाले गाईगोरुको पूरा तथ्यांक तथा अवस्थाबारे जानकारी पाउन केही समय लाग्नेछ। प्रहरी र भेटेनरीको टिमले थप अनुसन्धान गरिरहेको बताइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
