काठमाडौं- नेपाली कांग्रेसले आगामी मंसिर १४ गतेको निर्वाचनलाई प्रभाव पार्ने गरी सरकाका सचिव र सहसचिवहरुको सरुवा गरेको भन्दै गम्भीर आपत्ति जनाएको छ।
प्रतिनिधिसभाको सोमबारको बैठकको विशेष समयमा बोल्दै नेपाली कांग्रेस संसदीय दलका सचेतक पुष्पा भुसाल गौतमले निर्वाचनलाई प्रभावित पार्ने गरी सरकारले सहसचिवहरुको सरुवा गरेको भन्दै आपत्ति जनाएकी हुन्।
श्रावण १६ गतेको मन्त्रिपरिषद् बैठकले आउँदो मसिर १४ गते रिक्त रहेका ५० स्थानमा तीन तहको निर्वाचन गर्ने निर्णय गरेको थियो। सोही निर्णय अनुसार निर्वाचन आयोगले पनि आफ्नो तयारी सुरु गरिसकेको छ।
निर्वाचनको तयारी भइरहेका बेला भदौ ४ गते सरकारले ७६ जना सहसचिवलाई सरुवा गरेको हो।
सांसद गौतमले सहसचिवलाई वरिष्ठताको आधारमा प्रदेशको सचिव बनाएर पठाउने भनी निर्णय गरेपनि सरकारले कसैलाई काखा र कसैलाई पाखा लगाएर सरुवा गर्ने काम गरेको टिप्पणी गरेकी हुन्। निर्वाचन आयोगका कर्मचारीलाई सरुवा गराउने कार्यशैलीले सकारको नियतमाथि शंका उब्जाएको र निर्वाचन माथि पनि प्रश्न उठाएको भन्दै उनले निर्वाचन आयोगका कर्मचारीको सरुवा अबिलम्ब रोक्न माग गरेकी हुन्।
नेकपाका सांसद खगराज अधिकारीले सामाजिक सञ्जालमा अराजकता व्याप्त भएको, संवेदना हराएको र प्रधानमन्त्रीलाई स्वर्गवासको कामना गर्ने अपराधिक मनोवृत्ति देखिएको भन्दै त्यस्ता व्यवहार गर्ने प्रति घोर भर्त्सना गरे।
डेगुंको प्रकोपले मुलक नै आक्रान्त परेको भन्दै सम्पुर्ण संयन्त्र प्रयोग गरी डेंगु विरुद्ध मुलुकभर अभियान सञ्चालन गर्न सरकारको ध्यानाकर्षण गराएका उनले सुरेश वाग्ले क्यान्सर अस्पताल शीघ्र निर्माण गर्ने व्यवस्था मिलाउन पनि माग गरे।
नेकपाका सांसद हृदयेश त्रिपाठीले नेपाल राष्ट्र बैकको प्रभावकारी नियमन नभएका कारण बैकहरुमाथि सर्वसाधरणको विश्वास गुम्दै गएको बताए। बैकहरुले राम्रो धितोलाई जसरी पनि हात पार्ने र ऋण लगानी गरेर चर्को व्याज असुल गरी सर्वसाधरणदाई मारमा पार्ने गरेको उनको भनाइ थियो। विगतमा बैकिङ कसूरको आरोप लागेका व्यक्ति तीनवटा बैकका सिईओ भएको दाबी पनि उनको थियो।
राष्ट्रिय प्रजातन्त्र पार्टीका सांसद राजेन्द्र प्रसाद लिङ्देनले एक जना सांसदले ‘भारतले चाह्यो भने सकेको दिन नेपाललाई सिक्किम बनाउँछ या भुटान बनाउँछ’ भन्ने अभिव्यक्ति दिएको भन्दै त्यसबारे थप स्पष्ट पारिनुपर्ने धारणा राखे। केही दिन अघि नेपाली कांग्रेसका सांसद प्रदीप गिरिले संसदीय समितिको बैठकमा नेपाल कुटनीति क्षेत्रमा असफल भएको भन्दै ‘भारतले चाह्यो भने सकेको दिन नेपाललाई सिक्किम या भुटान बनाउँछ’ भन्ने अभिव्यक्ति दिएका थिए।
सांसद लिङ्देनले पुर्व प्रधानमन्त्रीहरु तथा वर्तमान सरकारका उपप्रधानमन्त्री भारतीय विदेशमन्त्रीलाई भेट्न होटलमा जाने कुराले नेपाल र नेपालीको स्वभिमानमाथि प्रश्न उठाउने काम गरको भन्दै गम्भीर आपत्ति जनाएका छन्।
नेपाली कांग्रेसका सासद प्रदीप गिरीले गलत कुटनीतिक समझदारीका कारण नेपालको भविश्य चिन्ताजनक अवस्थामा पुग्ने भन्दै कुटनीतिप्रति सही बुझाई राख्न सम्बन्धीत निकायको ध्यानाकर्षण गराएका थिए। समय, परिस्थिति र दुवै देशका सरकार बदलिएको अवस्थामा पनि दुई बर्षको तोते बालकले भाषा सिके जस्तो गरी कालापानी, लिपुलेक, सुस्ता र १९५० को सन्धिको पुनरावलोकन भन्ने शब्द दोहोर्याउने काम भएको टिप्पणी गरे।
उनले नेपाल भारत संयुक्त आयोगको बैठकको उपलब्धिबारे परराष्ट्रमन्त्री प्रदीप ज्ञवालीले संसदलाई दिएको जानकारी र मन्त्रालयले निकालेको प्रेश विज्ञप्ति मेल नखाएको भन्दै त्यस तर्फ मन्त्रीको ध्यानाकर्षण गराए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778155080.jpg)
-1764146706.png)
