काठमाडौं- पत्रकार शालिकराम पुडासैनीको आत्महत्या प्रकरणमा आरोपीहरुमध्ये टेलिभिजन कार्यक्रम प्रस्तोता रवि लामिछाने र पत्रकार युवराज कँडेलको आझ बयान हुँदैछ।
नेपाल प्रहरीले जिल्ला सरकारी वकिलको कार्यालयमा आइतबार अभियोगपत्र दायर गरेको गरेको थियो। सो अभियोगपत्रको अध्ययनपछि जिल्ला सरकारी वकिलको कार्यालय चितवनले मुलुकी फौजदारी संहिताको दफा १८५ अनुसार आत्महत्या गर्न दुरुत्साहन गरेको भन्दै लामिछाने, कँडेल र 'रुकु' भनिने अस्मिता कार्कीलाई विपक्षी बनाउँदै आत्महत्या दुरुत्साहनको मुद्दा जिल्ला अदालत चितवनमा दायर गरेको थियो।
मुद्दा दायर गरिएसँगै आरोपीहरुमाथि अदालतमा बयान लिन सुरु गरिएको थियो। आइतबार न्यायाधीश हेमन्त रावलको इजलासमा कार्कीको बयान लिइएको थियो। समय अभाव भएपछि आइतबार लामिछाने र कँडेलको बयान लिन बाँकी थियो। आज दुवैको बयान लिइने छ।
कार्कीले बयानमा पुडासैनीसँग आफू साथीको रुपमा रहे पनि आत्महत्या गर्ने कार्यमा भने उक्साहट नगरेको दाबी गरेकी छन्। उनले उक्त अभियोगबाट आफूले सफाइ पाउनुपर्ने माग गरेकी छन्।
आझ लामिछाने र कँडेलको बयान सकिएमा थुनछेक बहस सुरु हुनेछ। सरकारी र आरोपी पक्षका कानुन व्यवासायीको दुईतर्फी बहसपछि अदालतले आदेश गर्नेछ। अदालतको आदेशले उनीहरुलाई थुनामा पठाउने कि हिरासतमा राख्ने भन्नेबारे निर्णय गर्नेछ।
आरोप पत्रमा उनीहरुलाई हदैसम्मको अर्थात् पाँच वर्ष कैद र ५० हजार रुपैयाँ जरिवाना हुनुपर्ने माग गरिएको छ।
यसैबीच चितवन प्रहरीले आइतबार राति एक सूचना जारी गर्दै निषेधित क्षेत्रको चारकिल्ला तोकेको छ। चितवनका प्रमुख जिल्ला अधिकारी जितेन्द्र बस्नेतले एक सूचना जारी गर्दै निशेधित क्षेत्रको चारकिल्ला तोकिएको जनाएका हुन्।
हिरासतमा रहेका लामिछानेलगायतको रिहाइको माग गर्दै प्रदर्शनमा उत्रिएका प्रदर्शनकारीहरुबाट भरतपुर महानगरपालिका-१० स्थित मुद्दाको अनुसन्धान, अभियोजन र न्यायिक निरुपण गर्ने निकाय रहेका क्षेत्रमा हुलदंगा र अशान्ति हुनसक्ने देखिएकोले ‘स्थानीय प्रशासन ऐन २०२८’ को दफा ६ को ३ ‘क’ बमोजिम निषेधित क्षेत्र तोकिएको प्रजिअको आदेशमा भनिएको छ।
उक्त आदेश आज बिहान ६ बजेदेखि लागू भएको छ। तोकिएका चारकिल्ला क्षेत्रभित्र हुलदंगा वा अशान्ति मच्चाउने उद्देश्यले एकै स्थानमा ५ जनाभन्दा बढी मानिस जम्मा हुन नपाउने समेत स्पष्ट पारिएको छ। निषेधित क्षेत्रका बारे जानकारी दिन प्रहरीले बिहानैदेखि माइकिङ गरिरहेको छ। सो क्रममा ५ जनाभन्दा बढी जम्मा नहुन र निषेधित क्षेत्र नतोड्न पनि चेतावनी सुझाइएको छ।
यस्तो छ निषेधित क्षेत्रको चारकिल्लाः
पूर्व- बाइपास सडकतर्फको आन्तरिक राजश्व कार्यालयको चोकदेखि घरेलु कार्यालयको चोकसम्म।
पश्चिम- पूर्वपश्चिम राजमार्गको सप्तगण्डकी अस्पताल चोकदेखि चौबीसकोठी चोकसम्म।
उत्तर- बाइपास सडकतर्फको आन्तरिक राजस्व कार्यालयको चोकदेखि भरतपुर अस्पताल, पुरानो मेडिकल कलेज जाने चोक, नारायणी मावि चोक, कृषि ज्ञान केन्द्र हुँदै पूर्वपश्चिम राजमार्गको चौबीसकोठी चोकसम्म।
दक्षिण- बाइपास सडकतर्फको घरेलु कार्यालयको चोकदेखि दूरसञ्चार चोक हुँदै पूर्वपश्चिम राजमार्गको सप्तगण्डकी अस्पताल चोकसम्म।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791562069.png)
-1786602170.png)
