कैलाली- टीकापुरमा जारी थरुहट/थारुवान राष्ट्रिय सम्मेलनमा थरुहट प्रदेशका लागि आन्दोलन अघि बढाउने प्रस्ताव प्रस्तुत भएको छ।
बन्द सत्रमा थरुहट प्रदेश निर्माणका लागि संविधान संशोधन गर्न दबाब दिने पनि प्रस्ताव गरिएको छ।
सम्मेलनको दोस्रो दिन आइतबार सुरु भएको बन्द सत्रमा थरुहट प्रदेशको स्थापनाका लागि शान्तिपूर्ण आन्दोलन गर्नुपर्ने प्रस्ताव गरिएको जनाइएको छ।
बन्द सत्रमा नेपालका २५ जिल्लाका एक हजार बढी थारु अगुवाहरू सहभागी रहेका आयोजकले जनाएको छ।
आन्दोलनका लागि आवश्यक पर्ने संगठनको नामाकरणका लागि पनि प्रस्ताव गरिएको छ। त्यससँगै आन्दोलनका लागि आवश्यक पर्ने जनशक्ति, संगठन, आन्दोलनका चरण र गतिविधिका बारे पनि छलफल भइरहेको छ।
२०७२ भदौ ७ गते थरुहट आन्दोलनका क्रममा भएको हिंसामा एक वरिष्ठ प्रहरी उपरीक्षक (एसएसपी)सहित ८ प्रहरी र एक डेढ वर्षीय बालकको मृत्यु भएको थियो।
बन्द सत्रमा सम्मेलन तयारी समिति संयोजक मीनराज चौधरीले थरुहट आन्दोलन, अबको बाटो र आन्दोलनका चरणबारे प्रस्ताव प्रस्तुत गरेका थिए।
उनले थारु बहुल क्षेत्रमा शान्तिपूर्ण प्रदर्शन, आमसभा लगायतका कार्यक्रमहरू गर्ने प्रस्ताव पेस गरे। त्यस्तै, थरुहट विरोधीहरूलाई सामाजिक बहिष्कारदेखि संघर्षका कार्यक्रम गर्ने प्रस्ताव गरिएको छ।
सो प्रस्तावमाथि बन्द सत्रमा छलफल जारी रहेको जनाइएको छ। सम्मेलनको तेस्रो दिन सोमबार घोषणासभामार्फत सम्मेलनबाट पारित प्रस्तावहरू सार्वजनिक गरिने आयोजकले जनाएको छ।
'कञ्चनपुरदेखि दाङसम्मका जिल्ला जोडेर थरुहट प्रदेश बनाइनुपर्ने'
नेकपा (क्रान्तिकारी माओवादी)का अध्यक्ष मोहन वैद्य ‘किरण’ले कञ्चनपुरदेखि दाङसम्मको तराई जिल्ला जोडेर थरुहट प्रदेश बनाइनुपर्ने बताएका छन्।
क्रान्तिकारी पत्रकार महासंघ कैलालीले आइतबार धनगढीमा आयोजना गरेको पत्रकार सम्मेलनमा बोल्दै अध्यक्ष वैद्यले अहिलेको संरचनामा थारु समुदायको पहिचान संकटमा परेको बताए।
‘यतातिर सुदूरपश्चिम अखण्ड हुनुपर्ने माग छ भने अर्कोतिर मधेश एक हुनुपर्छ भन्ने माग पनि छ,’ उनले भने, ‘यसले थारुको माग र पहिचान नै दुई तिरबाट चेपुवामा परेको छ।’
उनले टीकापुरको कार्यक्रममा सहभागी हुँदा पनि आफूले थारु समुदाय दुई तिरबाट चेपुवामा परेको महसुस गरेको बताए।
उनले अब उत्पिडीत वर्गको पहिचान जोगाउनका लागि संयुक्त वर्गीय आन्दोलनको आवश्यकता परेको औंल्याए। ‘उत्पिडित जाति, वर्ग, समुदायलगायत अब एक हुनुपर्छ,’ उनले भने, ‘संयुक्त आन्दोलनले मात्रै आफ्नो अधिकार प्राप्त गर्न सहज हुन्छ।’
थारुलाई स्वायत्त प्रदेश दिए मात्रै थारुको अधिकार पाउने र पहिचान जोगिने उनले बताए।
नेता वैद्यले अहिलेको सरकार नाम मात्रैको कम्युनिष्ट सरकार भएको भन्दै आलोचना गरे। जसरी जनताको भवना र राष्ट्रियताको निम्ति काम गर्नुपर्ने हो त्यसरी सरकारले काम गर्न नसकेको उनले आरोप लगाए।
संविधान नयाँ बनाएको बाहानामा पुरानै संविधानअनुसार देश चलिरहेको भन्दै उनले कम्युनिष्ट साँच्चिकै कम्युनिष्ट नभएर पुरानै संसदवादी दल र सोही व्यवस्थामा लागेको जिकिर गरे।
नेता वैद्यले तत्काल नेत्र विक्रम चन्द (विप्लव)सँग पार्टी एकता हुन नसक्ने स्पष्ट पारे। नजिकको कम्युनिष्ट पार्टीसँग एकता गर्ने पार्टीको योजना रहेपनि विप्लवको पछिल्लो राजनीतिक गलत बाटोमा गइरहेकाले अहिलेका लागि पार्टी एकता असम्भव भएको उनले बताए। तर, विप्लवलाई सरकारले प्रतिबन्ध लगाएर गलत गरेको उनको मत छ।
सोही अवसरमा उनले आफ्नो पार्टी अब हुन गइरहेको उपनिर्वाचनमा सहभागी नहुने जानकारीसमेत दिए। निर्वाचन जनताको हितमा नहुने निष्कर्ष निकाल्दै पार्टीको पोलिटब्युरो बैठकले उपनिर्वाचनलाई बहिस्कार गर्ने निर्णय गरेको उनले बताए।
नेता वैद्य शनिबार टीकापुरमा आयोजित थरुहट/थारुवान राष्ट्रिय सम्मेलनमा सहभागी हुन कैलाली आएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
