काठमाडौं- बाग्लुङको ढोरपाटन नगरपालिका-८ बोबाङका स्थायी बासिन्दा हुन् भानबहादुर कामी। भानबहादुरलाई गाउँलेले ‘रेडियो कामी' भनेर पनि चिन्छन्।
६८ वटा हिउँदबर्खा काटेका कामीका दुई श्रीमती थिए। भानबहादुर जेठी श्रीमतीसँग बस्थे। बेलाबेलामा उनी कान्छी श्रीमती बीमा बस्ने ठाउँ बोबाङको 'कुइनेबाटो अनरे' पनि बस्न जान्थे।
बर्खाको समय थियो। बारीमा लगाएको अन्नबाली जंगली जनावरले खाने भएकाले उनी जनावर धपाउन भन्दै केही दिनअघि कान्छी श्रीमती भएको ठाउँ कुइनेबाटो अनरे पुगेका थिए। ढोरपाटन नगरपालिका–८ का वडाध्यक्ष नन्दे सुनारका अनुसार त्यस ठाउँमा बाघ, भालु, स्याल, दुम्सी, बाँदर लगायतका जंगली जनावरहरु आउने गर्छन्।
दुई श्रीमती भएका भानबहादुर दुवैतिर आउनेजाने, बस्ने गर्थे। सोही मेसोमा उनी कान्छी श्रीमतीकोमा पुगेका थिए। अनरेमा उनीहरूको ढुंगा माटोको गाह्रो लगाएको सानो छाप्रो छ। छाप्रो पनि कोल्टिएर लड्न लागेको जस्तो देखिन्छ। उनीहरू अनरेमा त्यही छाप्रोमा बस्थे।
गत शनिबार साँझदेखि पानी पर्न थालेको थियो। भानबहादुरको छाप्रो वरपर ५-६ घर छन्। त्यो पनि केही दूरीको टाढामा। रातभर झमझम पानी परिरह्यो। बिहान उज्यालो हुँदा भानबहादुर आफ्नो घर नजिकैको मकैबारीमा मृत फेला परे।
सर्ट र कट्टु लगाएका, मानबहादुर कोल्टो परेको अवस्थामा भेटिएका थिए। उनको टाउको र अनुहारमा गहिरो चोट लागेको थियो। जमिनमा रगत जमेर अख्रक्क भएको अवस्थामा उनको लाश फेला परेको थियो।
‘भानबहादुरको लास देखेपछि हामी उनको घरमा जान लाग्यौं। श्रीमती बीमा पनि घरमा मृत अवस्थामा भेटिइन्,’ त्यसबेलाको दुखद घटना सम्झन्छन् वडाध्यक्ष सुनार।
भानबहादुरका जेठी श्रीमतीतर्फ १ छोरा छन्। उनी मजदुरी गर्न भारत पुगेका छन्। कान्छीतर्फका छोरा बुहारी र नाती नातिना छन्। उनीहरू ढोरपाटन बस्छन्। त्यसदिन दम्पत्तिमात्रै घरमा थिए।
यी दम्पतीको शवको दूरी लगभग १० मिटरको अन्तरमा फेला परेको थियो। दम्पतीको विभत्स हत्या भएको स्थानीयले थाहा पाएपछि प्रहरीलाई खबर गरेका थिए। बुर्तिबाङ प्रहरी चौकी खबर पाउनासाथ घटनास्थल पुगेको थियो। बुर्तिवाङ प्रहरी चौकीले घटनास्थललाई कर्डन गरेर सुरक्षित गरेको थियो।
कसैसँग रिसराग नभएका वृद्ध दम्पत्तिको हत्याले स्थानीय नै आश्चर्यमा परेका थिए। ‘जंगल नजिकै एकान्त स्थानमा घर भएकाले जंगली जनावरको आक्रमणबाट ज्यान गयो कि भन्ने पनि लागको थियो,’ वडाध्यक्ष सुनार सुनाउँछन्, ‘शरीरभर हतियारको जस्तो चोट देखेपछि हामी अचम्ममा पर्यौ। कसले किन हत्या गर्यो , हामी त छक्क पर्यौं।’ वडाध्यक्षका अनुसार बन्चरोले हानेर हत्या गरेजस्तो देखिन्छ।
केही दिनमै रिजल्ट आउँछ : एसपी भट्ट
घटना भएको जानकारी आउनासाथ प्रहरी टोली घटनास्थल सुरक्षित गरेकाले अनुसन्धानमा धेरै सहज भएको प्रहरीले जनाएको छ। भानबहादुरको घर वरपर ५/६ घर मात्रै भएकाले प्रहरीले हत्यामा तिनै मध्येका कोहीको हुन सक्ने भन्दै अनुसन्धान गरेको छ।
अनुसन्धान अन्तिम चरणमा पुगेका र केही दिनमै नतिजा आउने बाग्लुङका एसपी नवराज भट्टले नेपाल लाइभलाई जानकारी दिए। उनले भने, ‘पत्ता लागेन भनेर आत्तिनु पर्ने अवस्था छैन। हामी अनुसन्धानको अन्तिम बिन्दुमा पुगेका छौं। केही दिनमै अपराधी सार्वजनिक गर्छौ।’
प्रहरीले दम्पत्तिको शंकास्पद हत्या भएपछि त्यस वरपरका मानिसको सोधपुछ गरेको थियो। त्यस राती त्यस वरपर सञ्चालित रहेका मोबाइलको विवरण केलाउनेदेखि रिसिइबी भएका तथा हुनसक्ने पाटाहरू समेत केलाएको जनाएको छ। सोही क्रममा भानबहादुरका भाई मसाने भन्नेले राति करिब १२ बजेतिर दाजुभाउजू कराएको सुनेको बयान दिएका थिए।
मसानेको भनाइ उद्धृत गर्दै स्रोतले नेपाल लाइभसँग भन्यो, ‘पहिला भाउजू कराएको सुनेँ। त्यसको केहीबेरमा दाजुको जस्तो आवाज पनि आयो। राती पानी परिरहेको थियो। जंगलको छेउ भएकाले बाघ आयो होला भन्ने पनि लाग्यो। त्यो भएर म घरमै सुतेँ। दाजुभाउजू भएको ठाउँमा गइनँ।’
बिहान दाजुभाउजूको शव देखेपछि उनै मसानेले प्रहरीलाई खबर गरेका थिए। दम्पतीको विभत्स हत्या भएपछि जिल्ला प्रहरी कार्यालय बाग्लुङले प्रहरी निरीक्षक नरेन्द्र कार्कीको नेतृत्वमा तीन सदस्यीय प्रहरी टोली गठन गरेको थियो। टोलीले घटनाको अनुसन्धान गरिरहेको छ। स्थानीयले बञ्चरो प्रहार गरेर हत्या गरेको बताए पनि प्रहरीले धारिलो हतियार प्रयोग गरेर हत्या गरेको भए पनि बञ्चरो नै हो भन्ने यकिन भइनसकेको जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
