काठमाडौं- एक महिनादेखि रामेछापका एक गाउँपालिका अध्यक्षलाई धम्की दिँदै मोटो रकम असुली गर्न खोज्ने दुई जनालाई प्रहरीले आज काठमाडौंबाट पक्राउ गरेको छ।
अपराध महाशाखाको टोलीले स्वयम्भूको विजेश्वरीबाट उनीहरुलाई पक्राउ गरेको हो। एक घरमा रहेका उनीहरुलाई पक्राउ गर्न खोज्दा भागेका थिए। त्यस क्रममा प्रहरीले गोली चलाउँदा लोप्चन लामा भन्ने मिलन तामाङको घुँडामा दुई वटा गोली लागेको छ। सँगै रहेका अमृत तामाङ पनि पक्राउ परेको महानगरीय प्रहरी कार्यालयका एसएसपी श्याम ज्ञवालीले जानकारी दिए।
धम्क्याउँदै भनेका थिए- गोली खर्च गर्नु नपरोस्
उनीहरुले एक महिनादेखि रामेछापको लिखु गाउँपालिकाका अध्यक्ष गोविन्द खड्कालाई फोनबाट धम्की दिँदै २ करोड माग्दै आएका थिए।
बानेश्वरमा समेत घर भएका खड्का केही समयदेखि काठमाडौं नै बस्दै आएका छन्। ती व्यक्तिहरुले २ करोड नदिए छोरीको अपहरण गरी हत्या गर्नेसम्मको धम्की दिने गरेका थिए। खड्काकी छोरी ८ वर्षकी छिन्।
घर नजिकै आएर रेकी गर्ने उनीहरुले खड्का कस्तो लुगा लगाएर कहाँ जाँदैछन् भन्नेसमेत फोनमा सुनाउने गरेका थिए। गोली खर्च गर्नु नपरोस् भन्दै एक महिनादेखि धम्की सहँदै आएका अध्यक्ष खड्का प्रहरीमा उजुरी दिन बाध्य भएका थिए।
तपाईंबाट तिमी र तँ सम्म भन्नु नपरोस् भन्दै धम्क्याउँथे, खड्काले भने, यहाँ होइन। वीरगन्ज र नेपालगन्जतिर २ करोड लिएर आउनु भन्दै धम्की दिन्थे।
उनहरुले लिखु हाइड्रोबाट २० लाख र रोड कन्सट्रक्सनबाट ३० लाखसमेत मागेको प्रहरीकहाँ मौखिक उजुरी परेको बताइएको छ।
गोली लागेका मिलन तामाङको ट्रमा सेन्टरमा उपचार भइरहेको छ भने अर्का अमृत तामाङ प्रहरी नियन्त्रणमा छन्।
वडाध्यक्षको योजना
गाउँपालिका अध्यक्ष खड्काले भने यो घटनाको मुख्य जिम्मेवार लिखु गाउँपालिका ७ नम्बरका वडाध्यक्ष सुवास बोहरा भएको आरोप लगाएका छन्।
प्रहरीसँग उनले रकम माग र अपहरणको योजना बोहराकै योजना भएको बताएका हुन्।
पहिले विवाद हुँदा बोहराले नै कुटपिट गराउने गरेको उनको भनाइ छ। म लोकप्रिय हुन्छु भन्ने लागेर बोहराले केटाहरु ल्याएर कुटाएको उनले बताए।
अस्ति केही दिनअघि पनि विवाद भएको थियो। त्यसपछि लगातार फोनबाट धम्की आउन थालेको हो, उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751533150.jpg)
-1749826086.png)
