काठमाडौं– नेपाली राष्ट्रिय फुटबल टिमका पहिलो रोजाइका गोलकिपर किरणकुमार लिम्बु (चेमजोङ) भारतको आइ लिग क्लब मिनेर्भा पञ्जावमा आवद्ध भएसँगै उनको व्यावसायिक करिअरले फड्को मारेको छ। मंगलबार पञ्जावले किरण क्लबमा आवद्ध भएको घोषणा गरेपनि उनीसँग गरिएको सम्झौता रकम खुलाएको भने छैन।
नेपालका पहिलो रोजाइका गोलकिपर किरण सामू अब भारतको माथिल्लो डिभिजनको फुटबल लिगको शीर्ष स्थानमा रहेको पञ्जावको पहिलो रोजाइमा पर्नुपर्ने चुनौती छ। पञ्जावले सुरुवाती ९ वटै खेलमा गोलकिपरमा रक्षित दागरलाई खेलाएको छ। अर्का गोलकिपर अर्शदिप सिंहले भने सिजनमा अहिलेसम्म मौका पाउन सकेका छैनन्। गोलकिपर भस्कर रोएले पञ्जाव छाडेपछि किरणसँग सम्झौता गरिएको हो। किरण, रक्षित र अर्शदिप मध्ये किरण अनुभवी देखिएका छन्।
आइलिगको उपाधि जित्ने अभियानमा रहेको पञ्जावले सिजनका सुरुवातमा मौका दिएका रक्षितले पछिल्ला २ खेलमा पहेंलो कार्ड पाएका थिए। पञ्जावले गत माघ ४ गते सिलोङ लोजाङलाई १–० गोलले पराजित गर्दा रक्षितले अन्तिम समयमा पहेंलो कार्ड पाए। त्यसअघि पञ्जावले मोहन बगानलाई पनि २–१ गोलले हराएको थियो। खेलमा रक्षितसहित पञ्जावका ३ खेलाडीले पहेँलो कार्ड पाएका थिए। राष्ट्रिय टिमको अनुभव नभएका रक्षित अघिल्ला २ सिजन शिभाजिया एफसीमा आवद्ध थिए। तर उनले एक खेलमा पनि मौका पाएनन्। शिभाजियन गत सिजन आई–लिगबाट रेलिगेशनमा परेको थियो। त्यसअघि रक्षितले सन् २०१२ देखि २०१४ देखि सिक्किम युनाइटेडबाट ६ खेलमा मौका पाएका थिए। सिक्किम अहिले भारतको दोस्रो डिभिजनको लिग खेलिरहेको छ।
पञ्जावमा रहेका अर्का गोलकिपर २० अर्शदिपले गत वर्ष आई लिगमा डेब्यु गरेका थिए। खेलमा पञ्जावलाई सिलोङले २–१ ले हराएको थियो। त्यसयता उनले टिममा स्थान बनाउन सकेका छैनन्।
गत सिजन माल्दिभ्सको टिसी स्पोट्सबाट लिग खेलेका किरणले प्रेरणादायी खेल पस्केका थिए। टिसी स्पोट्सले माल्दिभ्सको माथिल्लो डिभिजनमा गत सिजन दोस्रो स्थान हात पारेको थियो। त्यसअघि २७ वर्षीया किरणले सन् २०१६ मा मनाङ मस्याङ्दीबाट खेलेका खेलेका थिए। एन्फा एकेडेमीका उत्पादन किरणले २००९ देखि २०१६ सम्म थ्री स्टार क्लबबाट खेले। त्यसक्रममा उनले थ्री स्टारलाई लिगसहित दर्जनौ घरेलु फुटबल प्रतियोगिताको उपाधि जिताउन उत्कृष्ट प्रदर्शन गरेका थिए। नेपाली राष्ट्रिय फुटबल टिममा २००८ मा डेब्यु गरेका किरण सन् २०१० देखि नेपाली टिमको नम्बर एक गोलकिपर हुन्। धनकुटाका स्थायी बासिन्दा उनले राष्ट्रिय टिमबाट ५० खेल पूरा गरिसकेका छन्।
आई–लिग अन्तर्गत पञ्जावले आगामी शनिबार महत्वपूर्ण खेलमा नेरोका एफसीसँग प्रतिस्पर्धा गर्दैछ। पञ्जाव लिगको शीर्ष स्थानमा छ भने नेरोका लिगको दोस्रो स्थानमा रहेको टिम हो। लगत्तै पञ्जावले मंगलबार इस्ट बंगालसँग खेल्दैछ। पन्जावका लागि दुवै खेल अवे खेल हो। अनुभवी गोलकिपरको रुपमा आवद्ध भएका किरणले आगामी साता आई–लिगमा डेब्यु गर्ने सम्भावना छ।
जारी आई लिगको शीर्ष स्थानमा रहेको पन्जावले ९ खेलबाट २२ अंक जोडेको छ। दोस्रो स्थानको नेरोकाले २ खेल बढी खेल्दै २१ खेल जोडेको छ। शनिबार नेरोकामाथि जित निकाल्न सके पञ्जावले ४ अंकको अग्रता लिने पक्का छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
