जनकपुर– धनुषाको हंसपुर नगरपालिकाको कार्यालय विवादलाई जिल्ला समन्वय समितिले प्रमुख र उपप्रमुखबीच सामञ्जस्यताबाट निकास खोज्ने प्रयास गरेको छ।
जनकपुरस्थित जिल्ला समन्वय समिति धनुषाको पहलमा मेयर रामज्ञान मण्डल र उपमेयर रेणु झाबीच संवाद गराएर हंसपुर नगरपालिका कार्यालय सार्ने लगायत विभिन्न समस्याको निकास खोज्ने सहमतिपछि हालका लागि विवाद साम्य भएको छ।
दुबै पक्षबीच सामञ्जस्यता कायम गराई कार्यालयका विषयमा कानूनी निकास खोज्नका लागि ७ सदस्यीय अनुगमन समिति गठन गरिएको छ।
जिल्ला समन्वय समिति धनुषाको प्रमुख रामदेव वनरैत, संयोजक रहने गरी गठन गरिएको अनुगमन समितिमा, जिल्ला समन्वय समिति धनुषाका उपप्रमुख दीपक झा, हँसपुर नगरपालिकाका प्रमुख रामज्ञान मण्डल, उपप्रमुख रेणु झा, नगरपालिकाका प्रमुख प्रशासकीय अधिकृत र मुख्यमन्त्री तथा मन्त्री परिषद कार्यालयका एक जना अधिकृतलाई सदस्य राखिएको छ। सो समितिले स्थलगत निरीक्षण गरेर दुवै पक्षबीच सामञ्जस्यता कायम गराई कार्यालय सम्बन्धी विवादको निकास खोज्ने गरी सुझाव दिने बताइएको छ।
अनुगमन समितिले समेत यसको कानूनी निकास खोज्न नसकेको खण्डमा प्रदेशका मुख्यमन्त्री तथा मन्त्रिपरिषद कार्यालयसँगको परामर्शका आधारमा निकास खोज्ने निर्णय गरिएको छ।
जिल्ला समन्वय समिति धनुषाको सभाहलमा भएको दुबै पक्षबीचको छलफलपछि हंसपुर नगरपालिकाको अनुगमन समितिले सिफारिसको आधारमा योजनाको भुक्तानी गर्ने, हंसपुर नगरपालिका-२ स्थित बघचौडामा प्रहरी र स्थानीयबासी बीचको झडपमा परी घाइते भएकाहरुको सम्पूर्ण उपचार खर्च तथा सशस्त्र प्रहरीको गाडीमा भएको तोडफोडको मर्मत सम्भार गर्ने लगायतका समेत निर्णय गरिएको छ।
मेयर रामज्ञान मण्डलको नेतृत्वमा गत मंगलबार कार्यकर्ता सहित प्रहरीको एक टोलीले बघचौडास्थित हंसपुर नगरपालिकाको कार्यालयबाट कार्यालय सामग्री लैजाँदा दुई पक्षबीच झडप भएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
