म्यान्चेस्टर- अर्जेन्टिनी स्ट्राइकर सर्जियो अग्वुइरोको ह्याट्रिक मद्दतले न्यु क्यासल युनाइटेडमाथि ३–१ को जित हासिल गरेपछि म्यान्चेस्टर सिटीका प्रशिक्षक पेप ग्वार्डिवालाले यो सिजन सिटीले इंग्लिस प्रिमीयर लिगमा हालसम्मकै सर्वाधिक अंक बनाउने आशा व्यक्त गरेका छन्।
सन् २०१२ र २०१४ को लिग च्याम्पियन सिटीले यो सिजन हालसम्म खेलेका २४ खेलमा ६५ अंक जोड्दै पहिलो स्थानमा रहेको छ। दोस्रो स्थानमा रहेको म्यान्चेस्टर युनाइटेडले समान खेलबाट ५३ अंक जोड्दा यी दुईबीचको अंक दुरी १२ पुगेको छ।
यो सिजनमा खेल्न बाँकी १४ खेलमध्ये १० खेलमा जित र एउटामा मात्रै बराबरी गरे पनि सिटीले यसअघि २००४/२००५ सिजनमा चेल्सीले बनाएको सर्वाधिक ९५ अंकको रेकर्ड तोड्नेछ।
सिटीको जर्सीबाट ११औँ ह्याट्रिक गरिसकेका अग्वुइरोको यो सिजनको भने दोस्रो हो। उनले यसअघि १६ सेप्टेम्बरमा भएको खेलमा वार्टफोर्डलाई ६–० ले हराउँदा सिजनको पहिलो ह्याट्रिक गरेका थिए। योसँगै वर्ष २०१७/०१८ को लिगमा उनको गोल संख्या २२ पुगेको छ।
खेल सुरु भएको ३४ मिनेटमा पहिलो व्यक्तिगत गोल गरेका अग्वुइरोले ६३ मिनेटमा प्राप्त पेनाल्टीको अवसरलाई पनि सदुपयोग गरे। खेल सकिन मात्र ७ मिनेट बाँकी रहँदा उनले निकै सुन्दर ढंगबाट बललाई गोलपोस्टको दिशा दिँदै ह्याट्रिक पूरा गरे।
न्यु क्यासलका लागि एक मात्र सान्त्वना गोल दोस्रो हाफको ६७ मिनेटमा मर्फीले गरेका थिए।
प्रशिक्षक ग्वार्डिवालाले न्यु क्यासल युनाइटेडमाथिको विजयले गत आइतबार लिभरपुलसँग भोगेको ४–३ को पराजयलाई बिर्साइदिएको बताए। ‘अब मात्र १० खेलमा जित आवश्यक छ। हामी त्योभन्दा धेरै अंक जोड्न प्रयासरत छौँ’, ग्वार्डिवालाले भने।
यसैबीच इंग्लिस प्रिमियर लिगअन्तर्गत नै गएराति भएका अन्य खेलहरुमा शीर्ष क्लबहरु म्यान्चेस्टर युनाइटेड, चेल्सी, तथा आर्सनल विजयी भएका छन्। बर्नलीमाथि युनाइटेडले १–० को कठिन जित निकाल्दा चेल्सीले भने ब्राइटनलाई ४–० ले पाखा लगायो। आर्सनलले क्रिस्टल प्यालेसलाई ४–१ गोल अन्तरले पराजित गर्यो।
त्यस्तै अन्य खेलहरुमा लेस्टर सिटी वार्टफोर्डमाथि र स्टोक सिटी हडर्सफिल्ड टाउनमाथि समान २–० ले विजयी भए। उता इभर्टन र वेस्ट बु्रमविच अल्वीओन तथा वेस्टह्याम युनाइटेड र एएफसी बर्नमाउथले १/१ गोलको बराबरी खेले।
प्रिमियर लिगअन्तर्गत आज एक मात्र खेल हुनेछ। सेन्ट मेरिज रंगशालामा साउथह्याम्पटनले टोटेनह्याम हट्स्परसँग खेल्नेछ भने भोलि स्वान्सिया सिटीले लिभरपुलको सामना गर्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
