काठमाडौं- आगामी महिना नामिबियामा हुने आइसिसी विश्व क्रिकेट लिग डिभिजन–२ प्रतियोगिताका लागि नेपालले अन्तिम तयारी दुबईमा गर्ने भएको छ। नेपालले यसअघि दक्षिण अफ्रिकाको भ्रमणमा जाने बताइए पनि आगामी साता दुबई भ्रमण गर्ने भएको हो।
डिभिजन–२ प्रतियोगिता आगामी फेब्रुअरी ६ देखि १६ सम्म हुँदैछ। डिभिजन–२ मा ६ टिमबीच प्रतिस्पर्धा हुनेछ। डिभिजन–२ मा नेपाल, युएई, नामिबिया, केन्या, क्यानडा र ओमानले खेल्नेछन्। डिभिजन–२ का शीर्ष २ टिम विश्वकप छनोट प्रतियोगिताका लागि छनोट हुनेछन्।
नेपाली टिमका प्रमुख प्रशिक्षक जगत टमाटाका अनुसार नेपालले १० दिन दुबईमा अभ्यास गर्नेछ।
'हामी आगामी १२ वा १३ माघमा दुबई पुग्नेछौं। त्यहाँ १० दिन अभ्यास गर्न आइसिसीले अनुमति दिएको छ।'
नेपालले आइसिसीको ग्लोबल एकेडेमीमा अभ्यास गर्ने टमाटाले बताए।
हाल नेपाली टिम कीर्तिपुरस्थित त्रिवि क्रिकेट मैदानमा अभ्यास गरिरहेको छ। अभ्यासमा पहिलो चरणका २१ जना खेलाडी सहभागी छन्। दुबई भ्रमणमा जानुअघि नेपालले अन्तिम टिम घोषणा गर्नेछ। प्रशिक्षक टमाटाले डिभिजन–२ नेपालका लागि महत्त्वपूर्ण प्रतियोगिता भएकाले उत्कृष्ट खेल्न सबै शक्ति खर्चने बताए।
नेपाली टिमको ब्याटिङ सुधारका लागि मुम्बईका कन्सल्ट्यान्ट प्रशिक्षकको रुपमा सुलक्षण कुलकर्णी केही दिनमै आउँदै छन्। उनी आएपछि नेपाली टिमको ब्याटिङमा सुधार आउने टमाटाले विश्वास व्यक्त गरे।
युएईले त्रिकोणात्मक सिरिज खेल्दै
डिभिजन–२ को तयारीका लागि युएईले आयरल्यान्ड र स्कटल्यान्डसँग त्रिकोणात्मक सिरिज खेलिरहेको छ। दुबईमा भइरहेको सिरिजमा युएईले आफूभन्दा बलिया टिमसँग खेल्दै डिभिजिन–२ को राम्रो तयारी गरिरहेको हो।
यद्यपि युएई सिरिजका सुरुवाती दुवै खेलमा पराजित भएको छ। युएईलाई आयरल्यान्डले पहिलो खेलमा ४ विकेट तथा दोस्रो खेलमा ६७ रनले पराजित गरेको थियो। अब युएईले स्कटल्यान्डसँग दुई खेल खेल्न बाँकी छ।
युएईका कप्तान रोहन मुस्ताफाले डिभिजन–२ अगाडि युएई र स्कटल्यान्ड जस्ता बलिया टिमसँग खेल्दा तयारी राम्रो भइरहेको बताएका छन्।
नामिबिया दक्षिण अफ्रिकाको भ्रमणमा
डिभिजन–२ को आयोजक नामिबियाले प्रतियोगिताको तयारी दक्षिण अफ्रिकामा गरिरहेको छ। नामिबियाको टिमले तयारीस्वरुप दक्षिण अफ्रिकाको प्रदेशस्तरीय प्रतियोगिता खेलिरहेको छ। पूर्वी प्रदेशस्तरीय प्रतियोगितामा तीनदिवसीय खेल भइरहेको छ।
पोर्ट एलिजावेथमा भइरहेको प्रतियोगितामा नामिबियाले लगातार पाँच खेलमा जित निकालेको 'द नामिबियन' पत्रिकाले जनाएको छ।
केन्याले जिम्वाबेमा तयारी गर्ने
केन्या क्रिकेट टिम डिभिजन–२ को तयारीका लागि जिम्बावे जाने भएको छ। केन्याका सहायक प्रशिक्षक पिटर अन्गोन्डोका अनुसार अहिले केन्याको टिमले स्वदेशमै अभ्यास गरिरहेको छ। त्यसपछि अन्तिम तयारी गर्न जिम्बावे जाने उनले बताए।
केन्याले जिम्बावेमा १० दिन अभ्यास गर्नेछ। त्यस क्रममा जिम्बावेको 'ए' टिमसँग अभ्यास खेल खेल्ने कार्यक्रम रहेको अन्गोन्डोले बताए।
क्यानडा पनि दक्षिण अफ्रिका जाँदै
डिभिजन-२ को तयारीका लागि क्यानडाले राष्ट्रिय टिम घोषणा गरिसकेको छ। बार्बडोसमा एक साता अभ्यास गरेपछि क्यानडाले नितिश कुमारको कप्तानीमा १४ सदस्यीय टिम घोषणा गरेको हो। अब क्यानडाले अन्तिम तयारी दक्षिण अफ्रिकामा गर्नेछ। टिम क्यानडा जनवरी २५ मा दक्षिण अफ्रिका पुग्ने क्रिकेट क्यानडाले जनाएको छ।
२ सिरिज जितेको ओमान स्वदेशमै व्यस्त
उदीयमान एसोसिएट टिम ओमान डिभिजन–३ को च्याम्पियन बन्दै डिभिजन–२ मा बढुवा भएको हो। गत वर्ष टी–२० विश्वकप खेलेको ओमानले डिभिजन–२ को तयारीका लागि गत महिना अमेरिका र हङकङसँग सिरिज खेलेको थियो।
घरेलु मैदानमा भएको तीन खेलको सिरिजमा ओमानले अमेरिकालाई ३–० ले हराएको थियो। युएईमा खेलिएको हङकङ विरुद्धको सिरिज पनि ओमानले २–१ ले जितेको थियो।
डिभिजन–२ का लागि ओमानले दुई साताअघि नै राष्ट्रिय टिम घोषणा गरिसकेको छ। अहिले ओमान घरेलु प्रतियोगितामै व्यस्त छ। घरेलु प्रतियोगिता ५० ओभरको भएकाले डिभिजन–२ का लगि फाइदा पुग्ने प्रशिक्षक दुलिप मेन्डिसले बताएको मस्कट टाइम्सले आफ्नो अनलाइन संस्करणमा लेखेको छ। मेन्डिस श्रीलंकाका पूर्व कप्तान हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
