भक्तपुर– मन्त्रिपरिषद्को बिहीबारको बैठकले प्रदेश ३ को अस्थायी मुकाम (राजधानी) हेटौंडालाई तोकेपछि भक्तपुरका राजनीतिज्ञहरुले विरोध गरेका छन्।
सरकारका उपप्रधानमन्त्री कमल थापाको एकलौटी निर्णय अनुसार प्रदेश ३ को राजधानी घोषणा हुने तयारीमा रहेको भक्तपुरको साटो हेटौंडा तोकिएकोमा भक्तपुरबासी विरोधमा उत्रिनुपरेको प्रतिनिधिसभा भक्तपुर निर्वाचन क्षेत्र नम्बर २ का सदस्य एवं एमाले नेता महेश बस्नेतद्वारा जारी विज्ञप्तिमा उल्लेख छ।
विज्ञप्तिमा भनिएको छ, ‘सरकारले मनोमानी ढंगबाट भक्तपुरको सट्टा अन्यत्र राजधानी तोकेमा भक्तपुरबासीलाई कुनै हालतमा स्वीकार्य हुनेछैन।’
हेटौंडालाई राजधानी बनाउने सरकारको निर्णय सार्वजनिक भएपछि मध्यपुर थिमी नगरपालिकाले समेत विरोध जनाएको छ। नगरपालिकाका प्रमुख मदनसुन्दर श्रेष्ठले सरकारले एकलौटी तरिकाबाट निर्णय गरेको आरोप लगाए। उनले भने, ‘प्रदेश ३ को केन्द्रविन्दु भक्तपुर पूर्वाधारका रुपमा समेत उपयुक्त छ, राजधानीलाई कुनै पनि हालतमा अन्य क्षेत्रमा लैजान हामी दिँदैनौं।’
उनले सरकारले निर्णय फिर्ता नलिए भक्तपुरबासीले आन्दोलन गर्नुको विकल्प नरहेको बताए।
‘प्रदेश ३ को राजधानीका लागि भक्तपुरको सानोठिमी भौतिक संरचनाका दृष्टिले समेत सुविधासम्पन्न छ,’ उनले भने, ‘यहाँका भवनहरुलाई प्रदेशसभाको बैठक बस्नका लागि सभाहलका रुपमा प्रयोग गर्न तथा प्रदेशको मन्त्रालयका निम्ति समेत उपलब्ध गराउन सकिने भएकाले भक्तपुर नै उपयुक्त राजधानी हो।’
भक्तपुर निर्वाचन क्षेत्र नम्बर २ का प्रदेशसभा सदस्य शशिजंग थापाले प्रदेश राजधानीका लागि पूर्वाधार निर्माण गर्नु नपर्ने र १३ वटा जिल्लाको केन्द्रसमेत भक्तपुर भएकाले प्रदेशको राजधानी तोकिनुको विकल्न नभएको बताए। थापाले भने, ‘भौतिक र प्राविधिक रुपमा समेत उपयुक्त भक्तपुरलाई प्रदेश ३ को राजधानी नतोकिए यसको विरोधमा जनतालाई सडकमा उतार्नेछौं।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
