भक्तपुर– नेकपा एमालेका उपाध्यक्ष वामदेव गौतमले अहिले सरकार नछाडेर कांग्रेसले गरिरहेको आलटाल डुबिरहेको मानिसले सिन्का समातेजस्तो भएको बताएका छन्।
भक्तपुरमा आयोजित एक कार्यक्रममा नेता गौतमले संविधानको सानो सिन्कालाई आधार बनाएर सरकार नछाडिएको आरोप लगाए।
'डुबिरहेको मानिसले बग्दै आएको सानो सिन्कोलाई जोगिन्छु कि भनेर समात्छ रे', उनले भने, 'अहिले त्यो कोसिस भइरहेको छ।'
गौतमले थपे, 'अहिले एमाले र माओवादीको एकता संकल्पलाई तोड्ने प्रयास भइरहेको छ। तोडिसकेपछि कांग्रेसको समर्थनमा नयाँ सरकार बनाउने।'
प्रधानमन्त्रीले कसको बहुमत आएको छ भनेर केही दिनअघि दिएको अभिव्यक्तिलाई गौतमले कटाक्ष गरे। उनले भने– 'वाम गठबन्धनलाई जनताले वरदान दिएर आज बहुमतमा आएको छ। के यति थाहा छैन प्रधानमन्त्रीलाई? नकचरो भएपछि, लाज समाप्त भएपछि जे पनि भन्न मिल्छ?'
निर्वाचन आयोगलाई कठपुतली बनाएर कांग्रेस सभापति तथा प्रधानमन्त्रीले आफ्नो व्याख्या गरेर बसिरहेको गौतमले आरोप लगाए।
'दुई-चार महिना अरु टिकाउने र त्यो भित्र षड्यन्त्र सफल हुन्छ कि भन्नेतिर गइरहनुभएको छ', उनले भने, 'कांग्रेसका निम्ति लोकतन्त्र षड्यन्त्रभन्दा अरु होइन रहेछ भन्ने आजसम्मको इतिहासले प्रस्ट पारिरहेको छ।'
पार्टी एकता कम्युनिस्ट पार्टीमा प्रवेश गरेदेखिको आफ्नो सपना भएको गौतमले बताए।
'त्यो कामको सुरुवात भएको छ, यसमा दुई पार्टीका अध्यक्ष प्रचण्ड र केपी ओलीको सबैभन्दा प्रमुख भूमिका छ', उनले भने, 'त्यो भूमिका सम्पन्न हुनका लागि किलाकाँटीको काम मैले पनि गरेको छु।'
'लोकतान्त्रिक पार्टी भन्ने कांग्रेसले २०६४ सालमा चार महिनासम्म जितेर आउनेलाई सत्ता सुम्पेन', गौतमले झन्डै एक दशक अघिको घटना सम्झिए, 'तत्कालीन प्रधानमन्त्री गिरिजाप्रसाद कोइरालाले कम्युनिस्ट पार्टीलाई सत्ता सुम्पनुहुन्न भनेर अनेकौं किसिमको प्रयत्न गर्नुभयो।'
त्यतिबेलाको सत्ता संघर्षलाई सम्झँदै गौतमले भने, 'माओवादी पहिलो, कांग्रेस दोस्रो र एमाले तेस्रो भएको थियो। त्यतिबेलाका पार्टी अध्यक्ष झलनाथ खनाललाई कोइरालाले अनेकौं पटक बोलाउनुभयो र तपाईं प्रधानमन्त्रीको निम्ति तयार हुनुहोस्, बहुमत पुर्याउने जिम्मा मेरो भयो भन्नुभयो।'
अन्तर्राष्ट्रिय समर्थन दिलाउने जिम्मा पनि लिने भनेर गिरिजाप्रसादले भनेको उनले थपे। चार महिनाको प्रयास असफल भएपछि मात्रै कोइरालाले सरकार छाडेको गौतमले बताए। अहिले पनि सोही प्रयास भइरहेको उनको भनाइ छ।
अहिले जनादेश कांग्रेस प्रतिपक्षमा बस्ने र एमाले-माओवादीले सरकार चलाउने भएको गौतमले बताए।
'यो जनादेशलाई आफूलाई लोकतन्त्रको मसिहा भन्ने कांग्रेसका सभापतिले आलटाल गरेर रोक्न खोज्दै छन्', उनले भने।
गौतमले प्रतिनिधिभाको चुनावमा आफू पराजित हुन्छु भनेर कल्पनै नगरेको पनि बताए। प्रतिनिधिसभाको उम्मेदवार बनेका गौतम बर्दियामा पराजित भएका थिए।
गौतमले पराजित भएको खबरले आफूलाई रत्तिभर दुःख नलागेको बरु हल्का महसुस भएको अनुभव समेत सुनाए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
