झापा- सामाजिक सञ्जाल फेसबुकको दुरुपयोग भइरहेका बेला केहीले भने यसलाई समाज सेवाको माध्यम बनाएका छन्।
बाह्रदशी गाउँपालिका–७ निवासी आर्थिकरुपले अति विपन्न एक क्यान्सर पीडित युवतीलाई उपचारका लागि खर्च जुटाएर राजवंशीसहित तुलसीप्रसाद राजवंशी, गोपालचन्द्र राजवंशी, कुवित राजवंशी, श्याम राजवंशी समाजका उदाहरणीय पात्र बनेका छन्। ।
आर्थिक अभावले मृत्युसँग छटपटाइरहेकी फूलकुमारी राजवंशीको उपचारका लागि उनीहरुले फेसबुकमार्फत रकम जुटाएर सहयोग गरेका हुन् । फूलकुमारीको उपचारका लागि फेसबुकबाटै रु दुई लाख ४० हजार संकलन भएपछि सोही रकमबाट उनको भरतपुर क्यान्सर अस्पतालमा उपचार भएको हो। उपचारपछि फूलकुमारीले नयाँ जीवन पाएकी छिन्।
छोरीको जीवन बचाइदिन आग्रह गर्दै फूलकुमारीका बुबा शेषलालले हारगुहार गरेपछि राजवंशी समाज विकास समितिका पूर्वअध्यक्षसमेत रहेका टोमले फूलकुमारी बचाउ अभियान सुरु गरेका थिए।
उनको उपचारका लागि नेपाल तथा विदेशमा रहेका नेपालीले नबिल बैंकको २११००१७५०३६४० नम्बरको खाता रकम उपलब्ध गराएका थिए । सहयोग पाएपछि फूलमायाको क्यान्सरको शल्यक्रिया गरेर सञ्चो भएपछि अहिले उनलाई घरमा ल्याइएको छ । सबैको सहयोगमा नयाँ जीवन पाएपछि फूलकुमारीका वुबा–आमा मात्र होइन अहिले डाँगीबारीवासी हर्षित छन् ।
सामाजिक कार्य गर्न रुचाउने राजवंशीले यसअघि पनि आर्थिकरूपले अति विपन्न परिवारका लागि सहयोग गर्दै आएका छन्। राजवंशीले फेसबुकमार्फत चलाएको अभियानका कारण आफ्नो विद्यार्थीले नयाँ जीवन पाएको भन्दै गौरीशंकर माविका प्रधानाध्यापक लेखनाथ कटुवालले अभियानकर्तालाई धन्यवाद दिए।
शेषलाललाई खुशीसंगै पीडा पनि
सबैको सहयोगमा छोरी फूलकुमारीले नयाँ जीवन पाएकामा शेषलाल अति खुशी भएपनि उत्तिकै पीडा पनि थपिएको छ । २०६६ सालमा विरिङ खोलामा आएको बाढीले उनको परिवारलाई विस्थापित बनाएको थियो । भएको जग्गा जमिन कटान गरेर बगरमा परिणत गरिदिएपछि अर्कैको जग्गामा आश्रय लिइ छाप्रोमा बस्दै आएका थिए। आश्रय लिएको ठाउँमा पनि साउनको अन्तिम साता आएको बढीले क्षति पु¥यायो । त्यसबेला उनी छोरीको उपचारका लागि भरतपुर क्यान्सर अस्पतालमा थिए।
उनको परिवार अहिले छिमेकीको शरणमा छन्। दैनिक ज्यालादारी गरेर जीविकोपार्जन गर्दै आएको राजवंशी परिवारको अहिले न खाने अन्न छ न त बस्ने बास नै । ‘मजदुरी गरेर परिवार पाल्दै थिँए, छोरी बिरामी भएपछि उनको उपचारका लागि अस्पताल बस्दा अहिले गर्जो टार्ने उपाय नै रहेन,’ शेषलालले भने। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1750327258.png)
-1749826086.png)
