काठमाडौं- पार्टीका शीर्ष नेताले चुनावी समीक्षा गर्न माग गर्दै दबाब बढाएपछि पार्टी सभापति शेरबहादुर देउवा केन्द्रीय कार्यसमिति बैठक बोलाउने निर्णयमा पुगेका छन्।
कांग्रेस प्रवक्ता विश्वप्रकाश शर्माका अनुसार राष्ट्रियसभा निर्वाचनका लागि उम्मेदवार तय गर्न र अन्य पार्टीसँग मिलेर जाने विषयमा माघ ४ गतेलाई बैठक बोलाइएको हो। बैठकमा प्रदेश र प्रतिनिधिसभा निर्वाचनमा पार्टीले भोगेको पराजयका बारेमा पनि समीक्षा हुने शर्माले बताए।
कांग्रेसका वरिष्ठ नेता रामचन्द्र पौडेलले सभापति देउवालाई भेटेर पार्टीको केन्द्रीय समिति बैठक तत्काल नबोलाए आफ्नै हिसाबमा पार्टी रुपान्तरण थाल्ने चेतावनी दिएका थिए।
सोमबार बिहान नेता पौडेल र महामन्त्री शशांक कोइरालाले प्रधानमन्त्री निवास बालुवाटार पुगेर देउवासँग यस्तो माग गरेका थिए। भेटमा कृष्ण सिटौला र विमलेन्द्र निधिसमेत थिए। यस पटकको निर्वाचनमा कांग्रेस कमजोर देखिएपछि युवा नेताहरुले पार्टीको रुपान्तरण गर्नुपर्ने आवाज उठाइरहेका बेला पौडेल र कोइरालाले यस्तो माग गरेका छन्। पौडेलले संकटमा रहेको पार्टीलाई नवजीवन दिनका लागि भेला बोलाउन सभापति देउवालाई आग्रह गर्दै आएका थिए।
सोमबार नै १० युवा नेताहरुले पनि कांग्रेस रुपान्तरण हुनुपर्ने माग गरेका थिए। पार्टी केन्द्रीय समिति बैठक तत्काल बोलाउनुपर्ने तथा विधि र विधानविपरीत गठन भएका संसदीय समिति र कार्यसम्पादन समिति विघटन गर्नुपर्नेमा उनीहरुको जोड छ।
यसअघि गत साता नेता पौडेल निकट केन्द्रीय सदस्यहरुले छुट्टै भेला गरेका थिए। भेलाले प्रतिनिधि र प्रदेशसभा निर्वाचन समीक्षाका लागि तत्काडल केन्द्रीय समिति बैठक बोलाउन सभापति देउवालाई आग्रह गर्दै भेटेर कुरा गर्ने जिम्मा पौडेललाई दिएको थियो।
भेलाले सभापति देउवाले बैठक बोलाउन ढिलाइ गरे हस्ताक्षर अभियान चलाउने निष्कर्षसमेत निकालेको थियो। उनीहरुले राष्ट्रियसभा निर्वाचनमा उम्मेदवारको टुंगो केन्द्रीय समितिबाटै लगाउनुपर्ने माग राखेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
