काठमाडौं– झापा बिर्तामोडका व्यवसायी मोहम्मद खान (नाम परिवर्तन) लाई असार २८ गतेदेखि सामाजिक सञ्जाल इमो र मोबाइलमा अपरिचित नम्बरबाट बारम्बार फोन आउँछ। फोन गर्ने युवती आफ्नो नाम जया खान रहेको बताउँछिन्।
उनले व्यवसायी मोहम्मदलाई बारम्बार भेट्न आग्रह गर्छिन्। युवतीको नरम बोलीले मोहम्दलाई पनि भेट्ने इच्छा जाग्छ। भेट्ने मिति तय हुन्छ साउन १ गते।
साउन १ गते साँझ साढे ७ बजे बिर्तामोड–४ स्थित कुमारी बैंक छेउमा युवती जया ती व्यवसायीलाई भेट्न पुग्छिन्। बिर्तामोडमै व्यवसाय गर्दै आएका उनी पनि कुमारी बैंक आइसकेका हुन्छन्।
त्यसपछि कुमारी बैंकभित्रको गल्लीको एक घरमा ती युवतीले व्यवसायीलाई राति १० बजे पुर्याउँछिन्। त्यसैबेला उनीहरु बसिरहेको कोठमा २-३ जना युवाहरु पुग्छन्।
व्यवसायी मोहम्मदलाई पेस्तोल ताक्दै र कुट्दै उनीहरुले भन्छन्, ‘चुप लागेर बस्। नत्र तेरो दिन सकिन्छ।’
त्यसपछि मोहम्मद जसो भन्यो उसै गर्न बाध्य हुन्छन्। त्यसपछि उनको सम्पूर्ण कपडा खोलेर नांगै बनाइन्छ। र, नांगो भिडियो खिचिन्छ। भिडियो खिचिसकेपछि ती युवाहरुले भन्छन्, ‘युट्युबमा भिडियो हालेर भाइरल बनाइदिन्छौं। होइन भने ४० लाख रुपैयाँ ले।’
व्यवसायी मोहमदले साउन ५ गतेसम्म ४० लाख रुपैयाँ दिने वचन दिँदै युट्युबमा भिडियो पोस्ट नगर्न आग्रह गर्छन्। उनीहरुले साउन ५ गतेसम्म पनि ४० लाख नदिए ज्यान नै मार्ने धमकी व्यवसायीलाई दिन्छन्।
त्यसपछि ती युवाहरुले मोहम्मदलाई मेराज खानको रोहबरमा छाडिदिन्छन्। त्यसपछि दैनिक रुपमा उनीहरुले ४० लाख रुपैयाँ माग्दै व्यवसायीलाई मोबाइल नम्बरबाट फोन गर्छन्।
पैसाका लागि भन्दै बारम्बार फोन आएपछि आजित भएका व्यवासीले साउन ३ गते प्रहरीकहाँमा उजुरी दिन्छन्। पीडितको उजुरीको आधारमा अनुसन्धानमा खटिएको इलाका प्रहरी कार्यालय बिर्तामोडले उक्त घटनामा संलग्न ४ जनालाई झापाकै चारआलीबाट साउन ५ गते पक्राउ गर्छ। उनीहरुलाई जिल्ला अदालत झापाबाट ७ दिनको म्याद थप भइरहेको इलाका प्रहरी कार्यालय झापाका डिएसपी मोहन थापाले बताए।
पक्राउ पर्नेमा बिर्तामोड नगरपालिका–४ भद्रपुर रोड बिजुली अफिस पश्चिम बस्ने वर्ष २९ को मेराज खान, इलाम फाकफोकथुम गाउँपालिका–१ घर भई बिर्तामोड–२ चारपाने बस्ने २० वर्षीया ऋतु फियाक लिम्बु, भारत दार्जिलिङ थाना खोरिबारी घर भएका २७ वर्षीय सञ्जु क्षेत्री भन्ने सुजन शंकर र झापा बिर्तामोड–४ का २५ वर्षीय प्रकाश दास छन्।
पक्राउपछि सार्वजनिक गरिँदै
व्यवसायीलाई फसाउन जया नामबाट फोन गर्ने तिनै युवती हुन् ऋतु।
प्रहरीले उनीहरुको साथबाट बा १५ च ७३३९ नम्बरको कार, स्कुफ लेखिएको १ सय मिलिको शिलप्याक बोतल ३ थान, प्रोप्रानोलोल १५ चक्की, नाइट्रोसन लगायतको लागुऔषध र नक्कली पेस्तोल १ थान बरामद गरेको छ।
घटनामा प्रयोग भएकी ऋतु फियाक लिम्बुलाई सञ्जु क्षेत्री भन्ने सुजन शंकरले ती व्यवसायीको मोबाइल नम्बर दिई कुरा गर्न लगाएको देखिएको डिएसपी थापाले जानकारी दिए।
उक्त नम्बरमा लिम्बुले व्यवसायी मोहमदसँग ३-४ दिनसम्म भिडियो तथा फोनमा कुराकानी गरेकी थिइन्। भिडियो कलमार्फत भेट्ने कुरा भएपछि युवतीले सो कुरा सुजन शंकरलाई बताएकी थिइन्।
त्यसपछि शंकरले आफ्नै निर्देशनमा बिर्तामोड–४ स्थित भद्रपुर रोड कुमारी बैंक नजिकको एक घरको कोठाको चाबी लिम्बुलाई दिई व्यवसायी भेट्न पठाएका थिए।
उक्त कोठा पक्राउ परेका प्रकाश दासको नाममा ५ महिनाअघिदेखि नै बुक भएको पाइएको छ। तर कोठामा कुनै सरसामान राखिएको थिएन।
शंकरले मुखमा मास्क लगाएर हातमा छुरी लिएर कोठामा प्रवेश गरेका थिए। त्यसपछि व्यवसायी मोहम्मदलाई छुरी, नक्कली पेस्तोल देखाउँदै गालीगलौज तथा कुटपिट गरेर नांगो भिडियो बनाइसकेपछि आफ्ना साथी मेराज खानलाई बोलाएका थिए।
बरामद नक्कली पेस्तोल र लागुऔषध
त्यसपछि युवती लिम्बुलाई शंकरको निर्देशनमा प्रकाशले चारपानेस्थित दिदीको घरमा स्कुटरमा पुर्याइदिएका थिए।
उनीहरुले सुरुमा व्यवसायीसँग ५० लाख डिल गरेका थिए। पछि ४० लाखमा सहमति भएपछि व्यवसायीलाई छाडिएको थियो।
प्रहरीमा उजुरी आएपछि पीडितलाई धम्की दिँदा प्रयोग भएका मोबाइल नम्बरहरुको कल डिटेल विश्लेषण, फेसबुक, इमो लगायतका सामाजिक सञ्जालहरुवाट प्राप्त सूचना, प्रतिवादीहरु बीचको लिंक अध्ययन, प्रतिवादी मध्येका मिराज खानको निगरानी लगायतका काम प्रहरीले गरेको थियो। सोही आधारमा उनीहरु पक्राउ परेको डिएसपी थापाले बताए।
पक्राउ परेकाहरुले प्रयोग गरेको कार
पक्राउ परेका उनीहरु विरुद्ध शरीर बन्धक बनाई आपराधिक आर्थिक लाभ उद्योग गरेको तथा लागुऔषधमा मुद्दा दर्ता गरी अनुसन्धान अघि बढाइएको छ।
पक्राउ परेका मध्ये सञ्जु क्षेत्री भन्ने सुजन शंकर २०७४ सालमा २ जना महिलालाई जबरजस्ती यौन धन्दामा लगाएकोले मानव बेचबिखन तथा ओसारपसार मुद्दामा झापा जिल्ला अदालतबाट १० वर्ष कैद सजाय तोकिएर फरार रहेका व्यक्ति भएको प्रहरीले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
