जनप्रतिनिधिको शैली : अरुबेला आलटाल, बाढी आउँदा दौडधुप

विनय बाह्रकोटी | २०७६ असार २७ शुक्रबार | Friday, July 12, 2019 २२:००:०० मा प्रकाशित

इटहरी– इटहरी उपमहानगरपालिकाका जनप्रतिनिधिलाई अहिले भ्याइनभ्याई छ। इटहरीमा मात्र होइन बाढी प्रभावित हरेक क्षेत्रका जनप्रतिनिधिहरुमा व्यस्तता बढेको देखिन्छ।

दुई दिनदेखिको अविरल वर्षाको कारण तराई तथा समथर क्षेत्रमा काटान र डुबान बढेको छ। इटहरी बजारमा डुबान भएपछि शुक्रबार बिहानैदेखि डोजर र टिप्पर लिएर जनप्रतिनिधिहरु खोला र बस्तीमा पुगेका छन्। उपमहानगरको डोजरले बिहानैदेखि खोला सफा गर्न थालेको छ। इटहरी बीच बजार भएर बग्ने टेङ्ग्रा खोला सफाई नहुँदा खोला भरिएपछि पानी वस्तीमा पसेको छ। खोला बीचमा जमेको फोहोर र झारले खोला थुनिएको हो।

उपमहानगरका ३ वटा जेसिबी र २ वटा टिप्पर ल्याएर सफाइ थालेको छ। इटहरी उपमहानगरका प्रमुख प्रशासकीय अधिकृत केसव बिमलीका अनुसार बिहानैबाट खोला सफाइमा जेसिबी र टिप्पर खटाइएको हो।  खोलामा बगेर आएका जलकुम्भी र अन्य खोला थुन्ने फोहोर उपमहानगरको विभिन्न संयन्त्रले निकालिरहेको बिमलीले बताए।

हरेक वर्ष असार र साउनमा आउने सम्भावित बाढीको जोखिम न्यूनीकरण गर्न इटहरीमा खोला सफाइ हुने गरेको थियो। इटहरी बजार क्षेत्र भएर बग्ने टेङ्ग्रा, बुढी र खेती खोलामा डोजर र एस्काभेटरद्वारा बाढी आउनुअगाडि नै सफाइ हुन्थ्यो। यो वर्ष भने स्थानीय सरकारले ध्यान नदिँदा खोला थुनिएको इटहरीका स्थानीय प्रकाश तिम्सिनाले बताए। तिम्सिनाका अनुसार खोला मिचेर बनेका संरचना नभत्काउनु र खोला समयमै सफाइ नहुँदा बाढीको प्रभाव बढेको हो।

सुन्दरहरैचा नगरपालिकामा बुढी र गछिया खोलाको बाढी वस्तीमा पसेको छ। सुन्दरहरैचाका मेयर शिव प्रसाद ढकाल पनि डोजर लिएर वस्ती, खोला तथा प्रभावित क्षेत्रमा पुगेका छन्। उनका अनुसार अहिलेसम्म मानवीय क्षति नभएको र हुन नदिने प्रयास भइरहेको छ।

विगतमा विभिन्न काममा लाग्नु परेकोले यस्तो जोखिम होला भन्ने सोच्न नभ्याएको उनको भनाइ छ।

पूर्वका बिराटनगर, बिर्तामोड, इटहरी, इनरुवा, दमकलगायत सहरहरु डुवानमा परेका छन्।