बलात्कृत बालिकाले मजदुरी गर्ने लक्ष्मीबल्लभ नर्सिङ्ग माविको प्रांगणमा निर्माण भईरहेको भवन
राजविराज- मदिरा खुवाएर दलित बालिकालाई बलात्कार गरिएको घटना सार्वजनिक भएको छ। घटना भएको ७ दिन बितिसक्दा पनि प्रहरीमा उजुरी भने पुगेको छैन।
तिलाठी कोईलाडी गाउँपालिका-७ वभनगामा कट्टीस्थित लक्ष्मीबल्लभ नर्सिङ्ग माविको प्रांगणमा निर्माण भईरहेको भवनमा मजदुरी गर्ने १४ वर्षीया बालिकाको गत बुधबार साँझ बलात्कार भएको हो। उपप्रधान एवम् स्वास्थ्य तथा जनसंख्या मन्त्री उपेन्द्र यादवको पहलमा उपलब्ध भएको करिब ३ करोड रुपैयाँको बजेटमा उक्त भवन निर्माण भईरहेको छ।
घटनामा विद्यालयका कार्यालय सहयोगी शिवशंकर मण्डल र भारतीय मजदुरको नेतृत्व गरेका अर्का एक मजदुर पनि संलग्न भएको जनाइएको छ। उनीहरु दुवै जना फरार छन्। मजदुरको नेता नै फरार भएपछि अन्य कामदार समेत भागेकाले निर्माणको काम समेत प्रभावित भएको स्थानीयले जानकारी दिए।
छलफलवाट समाधान खोज्ने प्रयास
स्थानीयवासी र प्रहरी श्रोतका अनुसार बुधबार भएको घट्ना छलफलवाट समाधान गर्ने प्रयास भइरहेको बताइएको छ। तर, शुक्रबारदेखि नै घटनाको विषयमा प्रहरी जानकार छ। पीडित बालिकाकी आमासहित स्थानीयवासीले प्रहरी चौकी कोईलाडी बरसाईनमा पुगेर समस्या सुनाएका थिए। शनिबार बिहान करिब ८ बजे दुवै पक्षबीच छलफल समेत भएको थियो। तर, सहमति बन्न नसकेपछि आईतबारदेखि पीडित पक्ष जिल्ला प्रहरी कार्यालयको सम्पर्कमा छन्। तर बालिकाको तर्फबाट उजुरी नआएको जिल्ला प्रहरी कार्यालय सप्तरीका डिएसपी भावेश रिमालले बताए।
‘बलात्कार हो वा बलात्कार उद्योग मात्रै हो भन्ने विषयमा हामी अनुसन्धान गर्दैछौं,’रिमालले भने,‘मंगलबार पीडित परिवारले जाहेरी दर्ता गर्ने भनेका छन्, त्यसपछि प्रहरीले थप कदम अघि सार्छ।’
प्रहरीले सोधपुछका लागि एक महिलालाई नियन्त्रणमा लिएको छ। तिनै महिलाले फकाएर बालिकालाई मजदुरीमा लगेको पीडित परिवारले कोइलाडी प्रहरी चौकीमा बताएका छन्। बालिका विगत सात दिनदेखि उक्त भवन निर्माणमा खटिएकी थिईन्।
‘उनले नै (पक्राउ महिला) आफूलाई जबरजस्ति मदिरा खुवाएको बालिकाले बताएकी छिन्,’ चौकीका एक प्रहरीले भने,‘उनकै योजनामा सबै घटना भएको हुन सक्छ।’
भुत लागेको नाटक
घटनालाई दबाउन खोज्दा सार्वजनिक हुन समय लागेको प्रहरीहरु नै बताउँछन्। घटना भएको दिन प्रहरीलाई जानकारी नदिन परिवारका सदस्यले बालिकालाई भुत लागेकाले धामीलाई देखाउन हिडेको भन्दै ढाँटेको प्रहरीको दाबी छ।
'गत बुधबार राती करिब ११ बजे एक हुल मान्छे सडकमा निस्किए। हामी गस्तीमा भएकाले के भयो भनेर सोध्यौं,’ एक प्रहरी भन्छन्,‘बालिकालाई भुत लागेकाले धामीकोमा लान आँटेको भनेपछि हामीले नै अस्पताल लाने सल्लाह दियौं।’
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।