काठमाडौं- बि-बोइङको विश्व च्याम्पियनसिपमा बि-ब्वाय चुन्टुले नेपालको प्रतिनिधित्व गर्ने भएका छन्।
नेपाल हिपहप फाउन्डेसन तथा गोविन्द एजुकेसनले आयोजना गरेको 'नेपाल बि-ब्वाय सिटी-२०१९'को उपाधि जितेसँगै बि-बोइङको विश्व च्याम्पियनसिपमा चुन्टुले नेपालको प्रतिनिधित्व गर्ने भएका हुन्।
बि-बोइङको विश्व च्याम्पियनसिप डिसेम्बर ७ देखि ८ सम्म ताइवानमा हुनेछ।
चुन्टु भक्तपुर 'डार्कनेस क्रु'का सदस्य हुन्। कार्यक्रममा विभिन्न ५ विधामा कूल १ सय ३४ प्रतिस्पर्धी सहभागि थिए।
प्रतियोगिताको 'वान-अन-वान अल स्टायल'तर्फ मुकेश ढकाल पहिलो भए। उनले २० हजार रुपैयाँ र प्रमाणपत्र प्राप्त गरे। 'वान-अन-वान अल स्टायल किड्स'तर्फ बि-ब्वाय आर्यन, 'वान-अन-वान अन्डिस्प्युटेड बि-गर्ल'तर्फ द ब्याटल फ्युजन क्रुकी सदस्य रहेकी बि-गर्ल फेथले उपाधि हात पारिन्। दुवैले नगद १० हजार रुपैयाँ र प्रमाणपत्र प्राप्त गरे।
त्यस्तै 'फो-अन-फो ब्रेकिङ'को उपाधि जित्दै भनेलेट्स ब्रेक क्रुले ३० हजार रुपैयाँ र प्रमाणपत्र हात पारे।
प्रतियोगितामा उत्कृष्ट प्रदर्शन गर्दै योजना धमलाले गोविन्द एजुकेसन राइजिङ स्टार अवार्ड प्राप्त गरिन्।
सबै विजेतालाई हेल्थ करियर्स् इन्टर्नेसनल अष्ट्रेलियाको नेपालका लागि बजार व्यवस्थापक धीरज सिंह र गोविन्द एजुकेसनका कार्यकारी निर्देशक विज्ञान कँडेलले प्रदान गरे।
कार्यक्रममा गायिका समृद्धि राई, र्यापर निर्णय डिएन एसके, प्रोफेसर ट्रिक्सलगायतको उपस्थिति रहेको थियो।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।