गाईघाट- मुसहर समुदाय मादक पदार्थ सेवन र बिक्री वितरण कार्य नियन्त्रण अभियानमा लागेका छन्।
दिनभर ज्यालामजदूरी गरी कमाएको पैसाले साँझ भट्टीपसल वा होटलमा गएर मादक पदार्थ सेवन गरेर फजुल खर्च गर्ने त्रियुगा नगरपालिका–९ गैरुन, बरुवाभटा तथा मुसहरटोलका अधिकांश मुसहर जाति हिजोआज सचेत भई आफ्नो टोलमा मादक पदार्थ सेवन र बिक्री वितरण कार्य नियन्त्रण अभियानमा लागेका हुन्।
विगतमा अर्काकोमा मजदूरी गरेर कमाई गरी ल्याएको पैसाले मादकपदार्थ सेवन गर्ने र घरका परिवार भोकै हुने गरेका कारण घरझगडासमेत हुने गर्दथ्यो। मुसहर टोलका केही अगुवा नै मादक पदार्थ सेवन गरेर रातभर हो-हल्ला गर्ने र पटक–पटक झगडा हुने गरेको गैरुन मुसहरटोलका सबुरलाल सदा बताउँछन्।
केही महिनायता आएर आफूहरु जस्ता युवाले टोलवासीमा जनचेतना जगाउन थालेको उनले बताए। मादक पदार्थ सेवनका कारण नै घरपरिवार भोकभोकै बस्नुपर्ने र दिनभरिको कमाई पनि मादक पदार्थमा खेर जाने भएपछि अब यस्तो संस्कृति र व्यवहारलाई पूर्णरूपमा नियन्त्रण गरेर आफ्नो टोल सुधार गर्न अहिले मादक पदार्थ सेवन र बिक्रीमा समेत स्थानीय समिति नै गठन गरेर रोक लगाएको मुसहर टोलका ललु सदाले बताए।
मुसहरटोलका अगुवा बद्री सदाको अध्यक्षतामा ९ सदस्यीय समिति बनाएर अहिले बरुवाभट्टा तथा गैरुन मुसहरटोलमा पूर्णरूपमा मादक पदार्थ सेवन तथा बिक्रीवितरण गर्न प्रतिबन्ध नै गरिएको छ। मादक पदार्थ नियन्त्रण समितिकी सदस्य पुनम सदाका अनुसार टोलमा मादक पदार्थ सेवन गर्नेलाई पहिलोपटक ५ सय ५१ रुपैयाँ जरिवाना र दोस्रोपटक १ हजार रुपैयाँ जरिवाना गरिने नियमसमेत समितिले निर्धारण गरेको छ।
स्थानीय प्रहरी चौकी र वडा नम्बर ९ का वडाध्यक्ष धनबहादुर दनुवारको उपस्थितिमा गठन गरिएको मादक पदार्थ नियन्त्रण समितिले अहिले सक्रिय भएर काम सुरु गरेपछि मुसहर बस्तीमा पादक पदार्थ सेवन र बिक्रीवितरण पूर्णरूपमा नियन्त्रणमा आएको त्रियुगा नगरपालिका–९ का वडाध्यक्ष धनबहादुर दनुवार बताउँछन्।
गाउँमा मादक पदार्थ नियन्त्रण गर्न गठन गरिएको समितिले राम्रो काम गर्न थालेपछि अहिले यो गैरुन, बरुवाभट्टा टोलका मुसहरटोल साँच्चिकै मादक पदार्थ प्रयोगरहितको शान्तपूर्ण टोलमा परिणत भएको स्थानीय फुलकुमारी सदा बताउँछिन्।
अहिले दिनभर कमाई गरेको पैसाले बेलुकी घर फर्कंदा गाउँका युवा चामल दाल, मासु किनेर ल्याउने गरेको र घरपरिवारसँग मिलेर खुसीले खाने गरेपछि गाउँ शान्तिपूर्ण बन्न पुगेको स्थानीयहरुको भनाइ छ। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
