काठमाडौं- ‘तपाईँको छोरालाई जेलमुक्त गर्न आवश्यक पैसा (ब्लडमनी) जम्मा भयो, तपाईँ काठमाडौं आउनु पर्यो। म तपाईँलाई रकम आजै हस्तान्तरण गर्छु। काठमाडौ रिपोर्टस् क्लबमा तपाईँ बुधबार दिउँसो २ बजे आइपुग्नु पर्यो,’ सामाजिक अभियान्ता सागर लामिछानेले जलेश्वरका बुबा सुकराम महतोलाई फोनमा भने।
यो खबरले सुकराम निकै खुसी भए। विगत ३ वर्षदेखि धमिलिएको उनको मन हर्षले उज्यालो भयो।
उनी हतारहतारमा काठमाडौंको तयारी गरेर बिहान ९ बजे नै बस चढे।
दिउँसो २ बजे काठमाडौं आइपुग्ने गरी समय मिलाएर घरबाट निस्केका सुकराम ठाउँठाउँमा ट्राफिक जाममा परे। दिउँसो २ बजे काठमाडौंमा आइपुग्नै सकेनन्।
सामाजिक अभियन्ता सागरले फोन गरेर सोधे, ‘कहाँ आइपुग्नु भयो?’
नागढुंगा’ उनेले फोनमा उत्तर फर्काए।
क्यामेरा ठिक्क पारेर थुप्रै पत्रकार सुकरामको प्रतीक्षामा बसेका थिए।
झन्डै साढे ३ बजे सुकराम रिपोर्टस् क्लबमा आइपुग्छन्।
सुकराम खुसी हुँदै बल्लतल्ल रिपोर्टर्स क्लब पुगे।
हतास मुद्रामा, पसिनैपसिना भएका सुकराम कुर्सीमा थचक्क बस्छन्।
उनलाई सामाजिक स्वयंमसेवक नेपालका अभियन्ता सागर लामिछानेले जलेश्वर चौधरी बचाउ अभियानबाट संकलित ३८ लाख १५ हजार रकमको चेक हस्तान्तरण गर्छन्।
चेक हस्तान्तरण गर्ने क्रममा पनि सुकराम खुसी मुद्रामा भने देखिएका थिएनन्।
‘खोइ त मुस्कुराउनु भएको?, अब त तपाइँको छोरा नेपाल आउँदै हुनुहुन्छ, मुस्कुराउनुस् न,’ सुकराममाथि खुसीको अपेक्षा राखिन्छ।
तर अहँ मुस्कुराएनन् सुकराम।
खुसी छु, तर छोरा आएपछि मनैदेखि मुस्कुराउँछु। छोराआएपछि मुस्कुराउने भन्दै मुस्कान आफैँ भित्र थाति राख्छन् सुकराम।
छोरालाई जेलमुक्त गर्न संकलित ३८ लाख १५ हजारको चेक लिन्छन् र अब छोरा नेपाल आएपछि नेपालमै ट्रक चलाउन लगाउने प्रण गर्छन्।
‘अब छोरालाई विदेश पठाउँदिनँ, नेपालमै ट्रक चलाउन भन्छु,’ सुकरामले खुसी हुँदै भने।
आफू कति वर्ष भनेर सुकराम आफैँलाई थाहा छैन। ‘४५ वर्ष भएँ होला’ आफ्नो उमेर अड्कल काटे।
सुकरामका दुई जना छोरा छन्। जलेश्वर उनका कान्छा छोरा हुन्।
‘पारिवारिक अवस्था कमजोर छ। जेठो छोरो हामीसँग बस्दैन, कान्छो जलेश्वर साउदी गएपछि घरमा हामी बुढाबुढीमात्रै छौँ,’ सुकरामले सुनाए।
छोरा जलेश्वरलाई जेलमुक्त गर्न रकम संकलन अभियान चलाउने सागर लामिछानेलगायत रकम सहयोग गर्ने सम्पूर्णप्रति सुकरामले आभार व्यक्त गरे।
४ वर्ष अगाडी हेभी ट्रक चालकका रुपमा साउदी पुगेका जलेश्वर साउदी अरबस्थित अल क्वारायत अल जउफ कम्पनीमा हेभी ट्रक चालकका रुपमा कार्यरत थिए।
जलेश्वरले चलाएको ११०८१३० प्लेट नम्बरको ट्रकमा साउदी नागरिककै कारले ठक्कर दिन आई घट्नास्थलमै साउदी नागरिकको मृत्यु भएको थियो।
हेभी ट्रक चालकका रुपमा कार्यरत जलेश्वरसँग सवारी चालक अनुमति पत्र नभएका कारण साउदीको अदालतले जलेश्वरकै शतप्रतिशत गल्ती भएको ठहर गर्यो। उनलाई ३ लाख साउदी रियाल ब्लडमनी तिर्नुपर्ने फैसला सुनाइयो।
मृतकका परिवारले आधा रकम मिनाहा गरेपछि १ लाख ४८ हजार ९ सय ५८ साउदी रियाल अर्थात् ४२ लाख ६० हजार १ सय ९८ नेपाली रुपैयाँ क्षतिपूर्ति तिर्नुपर्ने भएको छ।
कम्पनीले उनलाई साउदीको लाइसन्स बिना ट्रक चालकका रुपमा काम लगाएको थियो।
कम्पनीले आफूलाई लाइसेन्स उपलब्ध गराउन आनाकानी गरेकाले कम्पनीसँग कुरा गरी लाइसेन्सका लागि पहल गरिदिन भन्दै जलेश्वरले उनी गएको जिआर म्यानपावर कम्पनीमा खबर गरेका थिए।
तर म्यानपावरले वेवास्ता गरेपछि उनी बिना लाइसन्स ट्रक चलाउन बाध्य थिए।
म्यानपावरको बेवास्ता र कम्पनीको लापरबाहीका कारण जलेश्वर जेलजीवन बिताउन बाध्य भएको सामाजिक अभियन्ता सागर लामिछाने बताउँछन्।
सामाजिक अभियन्ता लामिछानेले आवश्यक रकम संकलन गरेर बुधबार जलेश्वरका बुबा सुकरामलाई हस्तान्तरण गरिसकेका छन्।
बाँकी ४ लाख ४५ हजार ९ सय ५८ रुपैयाँ रकम गैह्रआवासीय नेपाली संघ साउदीले सहयोग गर्ने भएको छ।
सो रकम परराष्ट्र मन्त्रालयमार्फत् साउदीस्थित अदालतमा पेस गरेसँगै केही दिनमै साउदीबाट जलेश्वर चौधरी जेलमुक्त हुने बताइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791562069.png)
