काठमाडौं- रोजगारीका लागि कतार पुगेका २४ जना युवा अलपत्र परी नेपाल फर्किएका छन्। उनीहरुलाई पश्चिम नेपाल ओभर्सिज प्रालिले कतार पुर्याएर अलपत्र पारेको हो।
राम्रो काम र कमाईको प्रलोभन देखाएर युवालाई कतार पुर्याएर महिनौँसम्म वेवास्ता गर्ने म्यानपावर विरुद्ध उनीहरुले वैदेशिक रोजगार विभागमा मुद्दा दायर गर्ने तयारी गरेका छन्।
१ लाख ८० हजारदेखि २ लाखसम्म म्यानपावरलाई बुझाएर कतार पुगेका युवालाई कतारको एउटा कोठामा लगेर राखिएको थियो।
कतार पुर्याइएका २४ जना युवाबाट म्यानपावरले ४० लाखभन्दा बढी रकम असुल गरेको थियो।
युवाहरुलाई कतारमा क्लिनर, मार्केटिङ र डेलिभरीलगायत काम गर्नुपर्ने सुनाइएको थियो।
गोरखाको सरोज तिवारी डेढ महिना अघि म्यानपावरमा पैसा बुझाएर रोजगारीका लागि कतार पुगेका थिए।
‘कतारमा मजस्तै थुप्रै युवाहरु महिनौँदेखि अलपत्र देखेपछि मात्रै आफू अलपत्र परेको थाहा भयो,’ नेपाल लाइभसँगको संवादमा तिवारीले भने।
उनलाई कतार पुर्याउने म्यानपावर पश्चिम नेपालले कतारमा दैनिक ८ घन्टा काम गर्दा मासिक १४ सयदेखि १८ सय रियालसम्म हुने र ओभरटाइम सुविधासमेत रहेको प्रलोभन देखाएको थियो।
रामेछापका सञ्जय कुँवर पनि पश्चिम नेपाल म्यानपावर कम्पनीमार्फत डेढ महिना अघि कतार पुगेका थिए।
वैदेशिक रोजगारीमा जाने सोच बनाइरहेका कुँवरलाई पश्चिम नेपाल म्यानपावर कम्पनीका सञ्चालक सन्देश केसी भनेर चिनाउने निरबहादुर कटवालले कतारमा राम्रो रोजगारीको अवसर भएको सुनाएका थिए।
भिडियो: ‘कतारमा लुलु माकेर्टमा मार्केटिङको काम छ, कमाई पनि राम्रो छ, त्यसका लागि २ लाख रकम तिर्नुपर्छ भनेर आफूलाई सन्देश केसी भनी चिनाउने निरबहादुरले प्रलोभन देखाएपछि २ लाख तिरेर कतार पुगेको थिएँ। तर कतारमा मलाई अलपत्र पारियो,’उनले सुनाए।
कतारमा पुगेपछि उनीजस्तै अन्य युवाहरु एउटै कोठामा महिनौँदेखि अलपत्र थिए।
पीडित युवाका अनुसार उनीहरुलाई कतार पुर्याउने म्यानपावर सञ्चालक निरबहादुर कटवाल पनि कतारमै छन्। उनीहरुलाई कतार पुर्याएर अलपत्र पारी म्यानपावर सञ्चालक सम्पर्कविहीन छन्।
‘एक छाक खाएर बस्नुपर्ने बाध्यता थियो। हामी बसेको कोठाको भाडा पनि नतिरेकाले कोठामा घरबेटीले ताल्चा लगाइदियो। कति दिन हामी सडकमा पनि बस्यौँ, कतारमा कति दुःख भोगियो हामीलाई मात्र थाहा छ,’पीडित युवा सञ्जय कुँवरले सुनाए।
महिनौँसम्म अलपत्र पारी काममा नलगाएपछि केही युवा मिलेर आफन्तसँग पैसा मगाएर स्वदेश फर्किएका छन्।
गोरखा पालुङटारका मिलन गुरुङ, गोरखाकै मन बहादुर कुँवर, काभ्रेका राजकुमार ढकाल, सिन्धुपाल्चोकका राकेश घिमिरलेसहित ९ जना युवा अझै कतारमै अलपत्र भएको फर्किएका पीडितहरुले बताएका छन्।
अलपत्र परेका ९ जना युवाको ट्राभल डकुमेन्ट नभएकाले उनीहरु नेपाल फर्कन समस्या रहेको उनीहरूका आफन्तले बताएका छन्।
नेपाल फर्किएका पीडितहरु म्यानपावर कम्पनीसम्म पुग्दा उनीहरुलाई म्यानपावर सञ्चालक नभएको र उनैसँग कुरा गर्नुपर्ने जवाफ दिएको पीडितले बताएका छन्।
पश्चिम नेपाल म्यानपावर कम्पनीमा कार्यरत अर्चना सिंहले नेपाल लाइभसँगको संवादमा आफूले व्यक्तिगत रुपमै ६ लाखभन्दा बढी रकम खर्च गरेर पीडितलाई नेपाल झिकाएको बताइन्।
‘मलाई युवा अलपत्र छन् भनेर कतारस्थित दूतावासबाट फोन आएपछि निर सर (म्यानपावर सञ्चालक)सँग कुरा गरेको, वास्ता नै गर्नु भएको छैन,’सिंहले भनिन्।
वैदेशिक रोजगार विभागका निर्देशक भोलानाथ गुरागाँइले पीडितलाई ठगिएको प्रमाणलगाएत आवश्यक कागजात लिएर विभागमा म्यानपावर विरुद्ध ठगीको उजुरी दर्ता गराउन सल्लाह दिएका छन्।
‘यस्ता घटना बढ्दै गइरहेका छन्, त्यसैले विदेश जानु अघि आफू कुन कम्पनीमा जाँदैछु, तलब कति छ, यस्ता सबैकुरा बुझेर मात्रै जानुपर्दछ,’निर्देशक गुरागाँइले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791562069.png)
