काठमाडौं– महोत्तरी भाङ्हा नगरपालिका ३ का गफुर मियाँले २५ वर्षको हुँदै परदेशको यात्रा रोजे। जवान छँदा र परदेशको रहर हुँदा उनी लागि मलेसिया पुगे।
‘जवानीको रहरले परदेशको दुःखमा पुर्याएर नराम्रोसँग पछार्यो,’ ६० वर्षे उनी विगत सम्झन्छन्।
आजभन्दा ३५ वर्षअघि मलेसिया पुगेका गफुरसँग हातमा कुनै सिप थिएन। लेवर कामका लागि मलेसिया पुगेका गफुरले पाम ओएल कम्पनीमा काम गरे। सो कम्पनीले एक किसिमको वनस्पतिको फलबाट तेल निकाल्ने काम गर्थ्यो। गफुरले पाम ओएल निकाल्ने फल टिप्ने, केलाउने, फलको बोटको स्याहारसुसार गर्ने काम पाए। दैनिक १२ घन्टाभन्दा पनि काममा खटिनुपर्थ्यो।
‘तलब ६ सय मलेसियन रिंगिट मात्रै थियो, खानबस्न सबै आफ्नै खर्च,' उनी भन्छन्, 'सोचे जस्तो पैसा बचाएर फर्कन मनै लागेन।’
३ वर्षमा डेढ लाख
२ लाख साहुको ऋण लिएर विदेशिएका गफुरले ३ वर्ष मलेसिया बस्दा मासिक ६ सय मलेसियन रिंगिटका हिसाबले ५ लाखभन्दा बढी कमाइ गरे। तर उनले कमाएको ५ लाख रकमबाट नै साहुको ऋण तिर्नका लागि २ लाख पठाए। खानबस्न सबै खर्च आफ्नै कमाइबाट गर्दा डेढ लाख मात्रै बच्यो।
फेरि मलेसिया
मलेसियाको पाम ओएल कम्पनीमा काम सोचे जस्तो नभएपछि पनि गफुरको वैदेशिक रोजगारीको रहर अझै कम भएको थिएन। उनलाई अर्को राम्रो कम्पनीमा गएर धेरै कमाएर ल्याउने रहर जाग्यो। त्यसपछि उनी फेरि मलेसिया नै पुगे। यहाँबाट कम्पनीभित्रकै काम भनेर गएका उनी निर्माण सम्बन्धी काममा परे।
त्यहाँ कम्पनीले बस्न दिन्थ्यो तर खाना खर्च आफ्नै। कमाइ पनि पहिलेले जस्तै ६ सय रिंगिट।
गफुरलाई सजिलो काम र राम्रो कमाइ फेरि पनि भएन। बाहिर सडकमा बेल्चा चलाउने काम गर्न सकेनन्। आफन्तसँग पैसा मगाए र गएको दुई महिनामै आफ्नै खर्चमा फर्किए।
झन्डै एक लाख ऋण
पैसा कमाएर ल्याउने र परिवारलाई पाल्ने सपना बोकेर मलेसिया पुगेर ३ वर्ष २ महिना दुःख गर्दा पनि गफुरलाई झन्डै एक लाख ऋणले थिच्यो। ‘परदेशमा गएर पसिना बगाउँदा पनि कमाइ नभएपछि के गर्नु, परिस्थितिसँग सम्झौता गरेर फर्किएँ,' उनले भने, 'अब कहिल्यै परदेश नजाने।'
दोस्रो पटक मलेसिया जाँदा काम अप्ठ्यारो परेपछि २ महिनामै फर्किएका थिए उनी। आफैले खर्च गरेर फर्कनुपर्दा उनलाई जम्माजम्मी ८५ हजार ऋण लागेको थियो।
आफ्नै खेतमा खुसी
गफुरको काम गरेर खान पुग्ने खेत थियो। त्यही भएर मलेसियाबाट फर्कंदा खेतमै काम गरेर परिवार पाल्ने सोच बनाएका थिए उनले।
खेतमा धान, गहुँ र तरकारी रोपे। तरकारी बजारसम्म लगेर बेच्न थाले। खेतबारीकै काम गरेर घर बसीबसी गफुरले मासिक २० हजारभन्दा बढी कमाइ गर्छन्।
खेतमै काम गरेर केही महिनामा मलेसिया जाँदा लागेको ऋण पनि तिरे।
३ छोरी र एक छोराका बुबा गफुरका सबै छोराछोरीको विवाह भइसकेको छ। 'अहिले घरमा श्रीमति छोरा र बुहारीसँग छु,' उनी भन्छन्, 'बल्ल खुसीको अनुभव गर्न पाइरहेछु।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
