डडेलधुरा- बैतडीको सिगास गाउँपालिका-१ को कार्यालयमा मजदुरहरुले तालाबन्दी गरेका छन्। गत आर्थिक वर्षमा सम्पन्न भएको खानेपानी योजनामा काम गरेको रकम नदिएको भन्दै मजदुरहरुले वडा कार्यालयमा तालाबन्दी गरेका हुन्।
वडा कार्यालयसम्म पुग्ने रेलापानी खानेपानी योजना गत वर्ष नै फरफारक गरिएको भए पनि आफूहरुले काम गरेको पैसा नपाएकाले तालाबन्दी गरेको स्थानीय मजदुर मोहन ऐरले बताए। आफूहरुको समस्या समाधानका लागि पटक-पटक आग्रह गरिएको भए पनि समस्या सम्बोधन नभएपछि बाध्य भएर तालाबन्दी गर्नुपरेको उनको भनाइ छ।
‘हामी काम गरेर खाने मान्छे हौँ। योजनाको भुक्तानी लिएर पनि हाम्रो पैसा दिइएको छैन। यस्तो अवस्थामा हामीले के गर्ने?,' आक्रोशमिश्रित स्वरमा ऐर बोले, 'जनप्रतिनिधिहरुसँग पनि पटक-पटक छलफल गर्यौं। तर, हाम्रो समस्या समाधान भएन।’
आफूहरुले काम गरेकोवापत करिब २ लाख रुपैयाँ रकम नपाएको अर्का मजदूर कृतसिंह पन्तले बताए। ‘मजदुरी गरेरै घरपरिवार चलाइरहेका मजदुरहरुको काम गरेको रकम भुक्तानी नगरेपछि सोमबार वडा कार्यालयमा तालाबन्दी गरेका हौँ। हाम्रो माग पूरा नहुँदासम्म ताला खोल्दैनौँ,’ पन्तले स्पष्ट पारे।
सिगास गाउँपालिका-१ का वडाध्यक्ष गगनसिंह धामीले भने कार्यालयमा तालाबन्दी गरेको कुरा सुनेको र स्थानीयसँग छलफल गरेर ताला खोल्न प्रयास गरिने बताए। धामीका अनुसार मजदुरहरुले नपाएको रकमका लागि गाउँसभाबाट डेढ लाख रुपैयाँ पास गरिसकिएकाले केही दिनभित्रै भुक्तानी गर्ने तयारीमा गाउँपालिका रहेको छ। उनले भने, ‘वडा कार्यालयमा तालाबन्दी गरेको कुरा सुन्नमा आएको छ। मजदुरहरुका समस्या समाधानका लागि मैले कार्यपालिकाबाट डेढ लाख बजेट विनियोजन गरेको छु।’
१६ लाख रुपैयाँको लागतमा निर्माण गरिएको खानेपानी योजनाको रकममध्ये आफूहरुले काम गरेको पैसा नपाएको मजदुरहरुले गुनासो गरे। आफूहरुका माग पूरा नहुँदासम्म तालाबन्दी नखोल्ने उनीहरुको अडान छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791562069.png)
