जनकपुर- स्थानीय तहका कानुनी समस्या छिटो समाधान होस् र जनताले न्याय पाउन भन्न प्रत्येक स्थानीय तहमा उपप्रमुखको संयोजकत्वमा न्यायिक समिति खडा गरिएको हुन्छ। तर, न्यायिक समितिकै प्रमुख अन्याय परिन् भने? खासमा यसको जवाफ सामान्य छ- अदालत।
महोत्तरीको औरही नगरपालिकाकी उपप्रमुख (उपमेयर) तथा न्यायिक समितिका संयोजक रेणु झा अहिले यस्तै दौडबाट गुज्रिरहेकी छिन्।
नगरपालिकाकी उपप्रमुख तथा न्यायिक समिति संयोजक झाले आफैं अन्यायमा परेको दुखेसोसहित जिल्ला अदालत सप्तरीमा मुद्दा दर्ता गराएकी छिन्। विगत २ वर्षदेखि नगरपालिकाको हरेक गतिविधिमा आफूलाई सहभागी नगराएको र आफ्नो अधिकार खोसिएको भन्दै नगर प्रमुख (मेयर) सुनिल कुमार यादवको कार्यशैलीप्रति झा असन्तुष्ट बन्दै आएकी थिइन्।
मेयर यादवले असार ७ गते शनिबार साँझ ७ बजेसम्म कार्यालयमा बसेर काम गरी कागजपत्र मिलाएर भ्रष्टाचार गरेको आरोप लगाउँदै राजपाका समर्थक तथा नेता कार्यकर्तासहित उपमेयर झा नगरपालिकको कार्यालय पुगिन्। सामान्य भनाभनबाट सुरु भएको विवाद चर्किंदै जाँदा कार्यालयमा तोडफोडको स्थितिसमेत बन्यो।
सोही घटनामा उपमेयर झाले आफूमाथि मेयरले अभद्र व्यवहार गरेको भन्दै जिल्ला अदालत महोत्तरीमा मुद्दा दर्ता गराएकी हुन्।
यता मेयर यादवले भने नगरपालिकाका कामकाजमा उपप्रमुखको सहयोग र समर्थन नपाएकाले काम गर्न निकै समस्या भएको बताए। आफूले उपमेयरलाई कुनै दुर्व्यवहार नगरेको पनि मेयर यादवले स्पष्टीकरण दिँदै आएका छन्।
नगरपालिकामा कर्मचारीको चरम अभाव रहेको बताउँदै मेयर यादवले आर्थिक वर्षको अन्त्यमा शनिबार पनि काम गर्नुपरेको जिकिर गरे। 'भ्रष्टाचार गरेको कसैले भन्छ भने प्रमाण देखाए कारबाही भोग्न तयार छु,' यादव भन्छन्।
२ वर्षदेखि नगरपालिकामा मेयर र उपमेयरबीच कुरा नमिल्दा जनताका काम प्रभावित बन्दै आएको स्थानीय बताउँछन्। नगरपालिकामा लामो समयदेखि विवाद रहेकाले औरहीका जनता अन्यायमा परेका स्थानीय सरोज यादवले गुनासो गरे।
नगरपालिकाको न्यायिक समिति एक वर्ष अगाडि नै गठन गरिएको भए पनि नगरपालिकाले आवश्यक व्यवस्था नमिलाएका कारण अहिलेसम्म न्यायिक समितिले काम सुरु गर्न सकेको छैन। मुद्दा दर्ता गर्ने कर्मचारी, वकिल, अमिनलगायत आवश्यक प्राविधिक कुराका लागि पटक–पटक ताकेता गर्दा पनि मेयरले बेवास्ता गरेपछि न्यायिक समितिले काम सुचारु गर्न नसकेको समिति संयोजक तथा उपमेयर झाको दाबी छ।
न्यायको माग गर्दै निवेदन लिएर नगरपालिका पुग्ने नगरबासीलाई अहिले प्रहरी समक्ष वा पञ्चायतीतर्फ फर्काउने गरिएको औरही-५ का सिया साहले बताए। ‘नगरको झगडाले नगरबासीमा निराशा छाएको छ', स्थानीय श्रवण कुमारले भने, 'विवाद चर्किंदै गएपछि नगरपालिकाबाट सञ्चालन हुने योजना पनि अन्योलमा पर्ने हो की भन्ने चिन्ता छ।'
मेयर यादव र उपमेयर झा भने एकअर्कामाथि नै दोष देखाइरहेका छन्। मेयर यादव उपमेयरको सहयोग र समर्थन नपाएकाले काम गर्न समस्या भएको भन्दै उपमेयर नै विकासको बाधक बनेको बताउँछन्। उपमेयर झाले भने मेयर यादवले आफूसँग कुनै पनि विकासे योजनाका विषयमा छलफलसम्म नगरेकाले नगरभित्र भ्रष्टाचार मौलाउँदै गएको दाबी गर्दै आएकी छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1773643707.png)
