काठमाडौं– नेपाल कम्युनिस्ट पार्टी (नेकपा)का सांसदहरु प्रधानमन्त्री केपी शर्मा ओलीका अघि आक्रामक रुपमा प्रस्तुत भएका छन्। नेकपा संसदीय दलको बैठकमा बोलेका २९ जना सांसदहरुले सरकार सञ्चालन, बजेट विनियोजन र पार्टी सञ्चालका विषयमा आफ्ना प्रश्न राखेका थिए। धेरै प्रश्न भने सरकारको आलोच्य कामकारबाही र बजेट विनियोजनमा ठूला नेता र मन्त्रीले गरेको मनोमानीमा केन्द्रित थिए।
पार्टी नेतृत्वप्रति पछिल्लो समय आलोचनात्मक टिप्पणी गरिरहेका नेकपा नेता जनार्द्धन शर्माले प्रधानमन्त्री केपी शर्मा ओली समक्ष खुलेरै भने, ‘सरकार ठिक छ भन्नुपर्ने अवस्था छैन । ठिक छैन भनेर हामीले कहाँ भन्ने हो ?’ आफ्नै पार्टीको सरकार भएका कारण बाहिर आलोचना गर्दै हिँड्न नमिल्ने पार्टीमा पनि आफूलाई लागेको कुरा भन्ने वातावरण नभएको उनले दर्शाएका थिए।
केही सांसदले प्रधानमन्त्रीले १८ घन्टा काम गरिरहेको भनेर दिएको अभिव्यक्तिलाई लिएर जिम्मेवारीमा बाँडफाँडमा समानता नभएको कुरा उठाएका थिए। निकटस्थहरुलाई दोहोरो–तेहोरो जिम्मेवारी दिने तर अरु सांसदहरुलाई भूमिका विहिन बनाउने गरेको गुनासो प्रधानमन्त्री ओली समक्ष राखेका थिए। यस्तो गुनासो राख्नेमा एक नेकपा नेत्री रामकुमारी झांक्री थिइन्। उनले प्रधानमन्त्रीलाई भनिन्, ‘१८ घन्टा एक्लैले काम गरेर हुँदैन । सवै सांसदलाई काम दिनुपर्यो । त्यसो गर्दा काम सहज पनि हुन्छ र देखिन्छ पनि।’
सरकार सिंहदरबारबाट नभइ बालुवाटारबाट चलाइएको गुनासो पनि केही सांसदको थियो । जनताले मत दिएका व्यक्तिहरुलाई बाइपास गरेर केही आसेपासेहरुले सरकार चलाए जस्तो देखिएको भन्दै एक सांसदले भने, ‘राज्य सिंहदरबारबाट चलाउनुपर्यो। अहिले बालुवाटारबाट चलिरहेको छ।’
पाँच मिनेटको समय निर्धारण गरिएपनि पछिल्लो क्रममा बोल्ने नेताहरुले आक्रोशित हुँदै समय मिचेका थिए। उनीहरुले विचौलियाका मान्छे नियुक्ति भएको र त्यस्ता प्रकरणमा नेताहरु समेत जोडिएको विषय समेत उजागर गरेका थिए।
धेरै सांसदहरुले समृद्ध नेपाल सुखी नेपालीको कार्याभार पूरा गर्न सिंगो संसदीय दललाई कसरी गाइड गर्ने, पार्टीलाई कसरी अघि बढाउने र सरकार कसरी चलाउने ? भन्ने विषयमा वृहद् छलफल गरेर गाइडलाइन बनाउन जरुरी भएको मत राखेका थिए।
विधेयकको विवाद र स्थानीय तहको अनियमितताका विषयमा समेत कुरा उठेको थियो । संविधानअनुसार ७५३ छुट्टै सरकार भएपनि त्यहाँ चुनिएका पार्टीका सदस्य भएकाले केही न केहीले उनीहरुलाई ‘साइज’मा राख्नुपर्ने मत सांसदहरुको थियो। सांसदहरुको भनाइ थियो, ‘अहिले स्थानीय सरकारका प्रतिनिधीहरुका गतिविधीका कारण जनताले स्थानीय सरकार भन्न मन नपराउने अवस्था छ। उनीहरुका गतिविधीलाई कुनै न कुनै तरिकाले नियन्त्रण गर्नुपर्छ।’
स्थानीय तहको जनप्रतिनिधी र प्रदेश जनप्रतिनिधीको मनलाग्दी सेवासुविधा लिने निर्णयले संघीयता धरापमा परेको समेत एक सांसदले बताएका थिए। यी गतिविधीले सरकारप्रतिको धारणा नकरात्मक बनाएको भन्दै आक्रोश पोखेका थिए।
भीम रावल र महासेठको बाझाबाझ
सांसदहरुका साथै केही मन्त्रीहरु बोलेका थिए। त्यही क्रममा भौतिक पूर्वाधार तथा यातायात व्यवस्था मन्त्री रघुवीर महासेठले केही गैरसंसदीय शब्द बोलेका थिए। उनले व्यक्तिगत आक्षेप लाग्ने खालका शब्द समेत प्रयोग गरेपछि नेता भीम रावल र सांसद लालबहादुर थापा उठेर प्रतिवाद गरेका थिए।
ठूला नेता र मन्त्रीहरुले आफ्नो ठाउँमा बजेट विनियोजन गरेको विषयले ठाउँ पाएको थियो। सांसदहरुले भने, ‘सक्नेहरुको ठाउँ खोलै छ, नसक्नेको ठाउँमा सुख्खा लागेको छ।’ बजेटको विनियोजन न्यायोचित नभएको भन्दै मन्त्रीहरुको आलोचना भएको थियो।
मैले डकुमेन्ट बनाए, ओलीले नहेरी साइन गर्नुभयो– प्रचण्ड
नेकपा अध्यक्ष पुष्पकमल दाहाल प्रचण्डले अविश्वास बढ्दै गएकोप्रति चिन्ता प्रकट गरेका थिए। दुई अध्यक्षवीचको विश्वासलाई दर्शाउन उनले भनेका थिए, ‘एकता गर्दा हामीमा विश्वास थियो । मैले डकुमेन्ट बनाएँ, ओलीले नहेरी साइन गर्नुभयो।’ प्रचण्डले पार्टी एकता ढिलो भएकोमा समेत चिन्ता व्यक्त गरेका थिए। केही समयमै आफूहरुले सक्ने आश्वासन समेत दिएका थिए।
शान्त ओली
अरुले बेला क्रियाको प्रतिक्रिया दिने प्रधानमन्त्री ओलीबाट सोमबारको बैठकमा सांसदहरुले त्यस्तै अपेक्षा गरेका थिए। सांसदहरु चर्को रुपमा प्रस्तुत भएपछि प्रधानमन्त्री ओलीको जफाव पनि चर्कै हुने उनीहरुको आंकलन विपरित प्रस्तुत भए । एक सांसदले भने, ‘आज उहाँले सदाको झैं ओठे जफाव दिनुभएन । सरल र सन्तुलित रुपमा प्रस्तुत हुनुभयो।’
दिउसो १ः३० बाट सुरु भएको बैठक साझ ६ बजेसम्म चलेको थियो। बैठकमा २९ सांसद, तीन मन्त्री र दुई पार्टी अध्यक्ष गरी ३४ जनाले आफ्ना भनाइ राखेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778036869.gif)
-1764146706.png)
