जनकपुर- महोत्तरीमा करेन्ट लागेर एक जनाको मृत्यु भएको छ। जिल्लाको भङ्गहा नगरपालिकामा बिहेमा दुलहा घुमाउनका लागि ल्याइएको रथमाथि राखेको डिजेबाजा बजाउने क्रममा करेन्ट लागेर एक युवकको मृत्यु भएको हो।
मृत्यु हुनेमा मनरासिस्वा नगरपालिका-४ बस्ने सिधु पण्डितका छोरा १९ वर्षीय सञ्जय पण्डित रहेको जिल्ला प्रहरी कार्यालय महोत्तरीका प्रहरी नायव उपरीक्षक माधवप्रसाद बुढाथोकीले बताए।
आइतबार राति १ बजे भङ्गहा नगरपालिका-२ बस्ने सन्तोष साहकी छोरीको बिहेमा दुलहा घुमाउनका लागि मनरा-४ बस्ने सदाम खानको बिपीभी ५०९७ नम्बरको रथ र डिजे बाजा ल्याइएको थियो। सोही रथमाथि राखेर डिजेबाजा बजाउने काम गर्दै आएका सहायक पण्डितको मोबाइलबाट डिजे बाजा बजाउने क्रममा करेन्ट लागेर मृत्यु भएको हो।
घटनापछि सख्त घाइते युवक पण्डित बेहोस भई रथबाट भुइँमा झरेपछि उनलाई आइतबार राति नै उपचारका लागि जनकपुर अञ्चल अस्पताल लगिएको थियो। उनको उपचारका क्रममा सोमबार बिहान ४ बजे मृत्यु भएको हो।
मृतक युवकको शव परीक्षणका लागि जनकपुर अञ्चल अस्पतालमै राखिएको छ भने डिजे बाजासहित आएको रथलाई नियन्त्रणमा लिइएको प्रहरीले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791562069.png)
