काठमाडौं- ग्रीन हाउस लैनचौरमा सरेको उपराष्ट्रपतिको कार्यालय हातामा आज सरसफाई गरिएको छ। बुधबारबाट औपचारिक रुपमा बहादुर भवन, कान्तिपथबाट लैनरस्थित उपराष्ट्रपति भवनमा स्थानान्तरण भएको कार्यालय हाता सरसफाई गर्ने क्रममा उपराष्ट्रपति नन्दबहादुर पुन स्वयम् उपस्थित भएका थिए।
उनी आज (शुक्रबार) बिहान आफ्ना सहयोगी, सुरक्षाकर्मी र कर्मचारीहरु सहित ग्रीनहाउस परिसरको सरसफाईमा जुटेका थिए। परिसरमा झार उखेल्नेदेखि कोदालोले जमिन सम्याउने काममा समेत उनी खटिएका थिए।
सो क्रममा उपराष्ट्रपति पुनले महिनामा कम्तीमा एक दिन श्रममा खट्ने बताए।
मन्त्रिपरिषद् बैठकले लैनचौरस्थित समाज कल्याण परिषद्को कार्यालयलाई उपराष्ट्रपतिको निवास तथा उपराष्ट्रपतिको कार्यालय बनाउने निर्णय गरेपछि उक्त भवनको मर्मतसम्भार गरिएको थियो। मर्मतसम्भारपछि आज परिसरमा सरसफाई गरिएको हो।
उपराष्ट्रपतिको निवास उक्त भवनमा यसअघि नै स्थानान्तरण भइसके पनि मर्मतसम्भारको काम बाँकी रहेकाले उपराष्ट्रपतिको कार्यालय औपचारिक रुपमा बुधबार मात्रै स्थानान्तरण भएको उपराष्ट्रपतिको कार्यालयले जनाएको छ।
परिसर वरपर हरियाली भएको र थप वातावरणमैत्री बनाउनका लागि भवनमा हरियो रङ नै लगाएर ‘ग्रीन हाउस’ नामाकरण गरिएको छ।
उपराष्ट्रपतिको कार्यालय स्थापनाकालदेखि नै निर्वाचन आयोगको कार्यालय रहेको बहादुर भवन कान्तिपथको एक भागमा थियो।
उपराष्ट्रपति निवास भने कपुरधारा मार्गमा थियो। अब उपराष्ट्रपतिको कार्यालय र निवास आफ्नै स्वामित्वमा एकै स्थानमा भएको छ।
सरसफाईका क्रममा लिइएका अन्य तस्बिरहरु:
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
