काठमाडौं– ६ महिना लामो परीक्षण पछि नेपालकै पहिलो व्यवसायिक सामाजिक सञ्जाल ‘रोलिङ नेक्सस डटकम’ सार्वजनिक गरिएको छ। ‘नयाँ सम्भावनाहरुको सञ्जाल’ मुल नारासहित रोलिङ प्लान्स प्राइभेट लिमिटेडले ‘रोलिङ नेक्सस डटकम’ मंगलबार सार्वजनिक गरेकाे हाे।
यस सञ्जालको अवधारणालाई मुख्यत: ‘फो ई’को सिद्धान्त अनुरुप सञ्चालन गरिएको छ। यो सञ्जालको मुख्य लक्ष्य रोजगारी सृजना तथा प्रवर्द्धन र त्यससम्बन्धि दक्षता अभिवृद्धि, सामाजिक वा व्यवसायिक रुची, गतिविधि, पृष्ठभूमी भएकाहरुले एकै सञ्जालमा रही सम्बन्धको विकासगरी साझेदारी गर्ने प्लेटफर्म, व्यवसायिकबाहेक पनि सञ्जालमा खेलकुदका गफगाफमा सहभागिता, फोटो वा भिडियो प्रतिस्पर्धा, दैनिक क्वीज जस्त सामाग्रीबाट मनोरञ्जन लगायत रहेको छ।
गीग इकोनोमीको अवधारणमा रहेर अवसर र सम्भावनाहरुको खोजी, उद्यमशीलता प्रवर्द्धन तथा व्यवसायिक वृद्धि, महिला, विपन्न समूह, फरक सक्षमता भएका र सेवानिवृत समूहलाई पनि अवसर र सम्भावना दिनका लागि विशेष पेजमार्फत प्रवर्द्धन गर्ने लक्ष्य एपको छ।
रोलिङ नेक्ससको मुल एप बाहेक, अन्य दुई मोवाइल एप्लिेकसन पनि सार्वजनिक गरेको छ जुन रोलिङ कर्मसिल स्वदेश र रोलिङ कर्मसिल विदेश रहेका छन्। यस अर्थमा कर्मसिल शब्दले कर्म र श्रममा निर्भर हुने श्रमिकलाई जनाउँदछ र यसलाई प्रयोगकर्ताको प्राथमिकता अनुसार स्वदेश र विदेशमा विभाजित गरिएको छ।
रोलिङ कर्मसिल स्वदेश एपबाट दक्ष, अदक्ष श्रमिकलाई उपयोगी हुने रोजगारी र अन्य अबसरका जानकारी मोवाइल नोटिफिकेसन मार्फत पाउन सकिनेछ। साथै स्वतन्त्र रोजगारी गर्न चाहनेहरुका लागि आफ्नो सीप अनुसारको घर सेवा तथा आफ्नो सवारी साधन भएकाले वितरण सेवाको अवसर खोजी गर्न सकिनेछ।
रोलिङ कर्मसिल विदेश एपबाट भरपर्दो वैदेशिक रोजगारीको खोजी, विदेश बसाईका क्रममा परेका समस्याको समाधानका लागि पहल र स्वदेश फर्केर केही गर्न चाहानेका लागि अवसरहरुको लाभ लिन सकिनेछ।
रोलिङ नेक्ससको एप समाजका हरेक वर्गलाई सम्बोधन गर्न सकोस् भनी विभिन्न ७ वटा समूहहरुमा विभाजन गरिएको छ।
रोलिङ जबः स्वदेशी रोजगारी र अवसरको खोजी तथा सीप अभिवृद्धि गर्नको लागि।
रोलिङ टेण्डरः व्यवसायीले आफ्नो काम अनुरुपको अवसर हेरी सम्पुर्ण विड तथा टेन्डर खोजी, दर्ता तथा व्यवस्थापन अनलाइन मार्फतनै पुर्ण सम्पन्न गर्नका लागि ।
रोलिङ फ्रिलान्सः विदेश अथवा स्वदेशबाट माग आउने छोटो वा लामो कार्यहरुको घरै बसी गर्न मिल्ने स्वतन्त्र रोजगारीको अवसरको खोजी गर्नका लागि।
रोलिङ क्याट: आफ्नो सीप, शैक्षिक तह तथा कार्यक्षेत्र अनुरुपको वौद्धिक परीक्षण अनलाइनमै गर्न तथा कम्पनी तथा शैक्षिक संस्थाले छनाेट प्रक्रियाका लागि गर्ने परीक्षा तथा मुल्यांकनका कार्य अनलाइनबाट सञ्चालन गर्नका लागि।
रोलिङ इभेन्टः भर्चुअल कक्षा कोठा, भर्चुअल मेला, विज्ञबाट परामर्श, विभिन्न कार्यक्रम, सेमिनारको अनलाइन मार्फत प्रवर्धनको लागि।
रोलिङ छलफलः आफ्नो कार्यक्षेत्र र रुचीको क्षेत्र अनुरुपको विभिन्न विषय सम्बन्धित लिखित प्रश्नोतर तथा छलफलमा सहभागी भई वौद्धिक बिकास गर्नका लागि।
रोलिङ बजारः रोलिङ बजार मार्फत नेपाली घरेलु उद्यमीलाई प्रवद्र्धन गर्ने काम हुनेछ। अन्य ई–कमर्सभन्दा फरक यसमा नेपाली घरेलु उद्यमीका सामानहरुको मात्र बजार प्रवद्र्धन गरिने दाबी कम्पनीले गरेको छ।
मुलुकमा रोजगारी र उद्यमशीलताका अवसर उत्साहजनक नरहेको यस अवस्थामा नयाँ सम्भावना र अवसरहरुलाई एउटै प्लाटफर्ममा समेट्ने उद्देश्यले रोलिङ नेक्सस सुरु गरिएको कम्पनीले जनाएको छ।
१८ वर्षदेखि ६५ वर्षका उमेर समुहमा पर्ने करिव २ करोड श्रम शक्तिका रुपमा रहेका नेपाली नागरिकलाई प्रत्यक्ष वा अप्रत्यक्ष रुपमा एउटा पूर्ण व्यवसायिक सामाजिक सञ्जालको प्लाटफर्म दिई उत्पादनशीलता र रचनात्मक कार्यमा लगाउन प्रतिवद्ध रहेको कम्पनीको दाबी छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751793737.png)
-1749826086.png)
