काठमाडाैं- कोभिड-१९ विरुद्धको खोप अभियान अस्तव्यस्त देखिएको छ। सरकारले जेठ २५ गते भेरोसेलको पहिलो डोज लगाएकालाई मंगलबार दोस्रो डोज लगाउन सूचना जारी गरेअनुरुप खोपका लागि खोप केन्द्रमा लाइन बस्न पुगेका वृद्धवृद्धाहरु कैयौंले खोप लगाउन नपाइ फर्कनुपर्यो।
उपत्यकाका निजामती अस्पताल, प्रसूति गृह, वीर अस्पताल, टेकु लगायत १३ स्थानमा काठमाडाैं महानगरपालिकाले खोप केन्द्र तोकेको थियो। खोप लगाउन बिहानैदेखि लाइन बस्न पुगेका वृद्धवृद्धाहरु दिउँसोसम्म खोप लगाउन नपाएपछि सरकारको व्यवस्थापनप्रति आक्रोशित बने। उनीहरुले सरकारले सही सूचना नदिएका कारण आफूहरुले दु:ख पाएको भन्दै ज्येष्ठ नागरिकलाई सम्मान गर्न र सही सूचना प्रवाह गर्न ध्यानाकर्षण पनि गराए।
मिनभवनका उपेन्द्र पौडेल बिहान ६ बजेदेखि लाइन बसेर २ बजेसम्म पनि खोप लगाउन पाएनन्। खोप लगाउने विषयमा सरकारले खेलवाड गरेको र जनताको अभिभावकको भूमिका निर्वाह गर्न नसकेको भन्दै उनले आक्रोश पोखे।
'धेरै गाह्रो भयो। प्रेसर-सुगर भएका मान्छेहरु सबै बाटोमै लडे। यो सरकारको नालायकपन हो। यो नालायकपनले जनतालाई दु:ख दिएको छ,' उनले भने, 'सरकारले खोपसम्बन्धी सूचना प्रवाह राम्रोसँग दिनुपर्छ कि पर्दैन? सरकारले भन्दा तीन महिनामा इन्जेक्सन भन्छ यहाँ तीन वर्षमा पनि इन्जेक्सन नपुग्ने भइसक्यो।'
बानेश्वरका तेजबहादुर दाहाल पनि बिहान ६ बजे नै निजामती अस्पताल खोप केन्द्रमा लाइन बसे तर दिउँसो २ बजेसम्म पनि खोप लगाउन नपाएपछि व्यवस्थापनप्रति आक्रोश पोखे। उनले भने, 'ज्येष्ठ नागरिक भनेपछि त्यहीअनुसारको सम्मान दिएर कुपनको व्यवस्था गरेर यतिजना भोलि आऊ, यति जनालाई आज दिन्छु भनेर त्यो व्यवस्था गर्नुपर्ने हो। यस्तो किसिमको नालायक प्रशासनिक व्यवस्था कहीँ पनि छैन। यो जनस्वास्थ्यले मिलाउनुपर्ने हो। हामीलाई भोलिका लागि कुपन भनेर दिएको भए हामी भोलि आइहाल्थ्यौं नि।'
आलोकनगर टोल सुधार समितिको अध्यक्षसमेत रहेका डीआर पोख्रेल बिहान ३ बजेदेखि खोप लगाउन लाइनमा बसे पनि दिउँसोसम्म खोप लगाउन पाएनन्। बिहानदेखि लाइन बसे पनि खोप केन्द्रले दिउँसो मंगलबार जम्मा पाँच सय जनालाई मात्रै खोप लगाउने सूचना निकालेपछि उनको धैर्यता टुट्यो। सरकारलाई बोलेर नभई काम गरेर देखाउन र जनतामा भ्रम छर्ने काम बन्द गर्न उनले अनुरोध गरे।
सरकारले स्थानीय सरकारमार्फत् जेठ २५ गते भेरोसेलको पहिलो डोज लगाएकालाई मंगलबार दोस्रो डोज लगाउन सूचना जारी गरेको थियो। काठमाडाैं महानगरपालिकाभित्र १३ स्थानमा खोप केन्द्र तोकिएको छ भने अन्य नगरपालिकामा प्रत्येकमा दुई खोप केन्द्र तोकिएको छ। महागरभित्रका खोप केन्द्र व्यवस्थित हुन नसक्दा वृद्धवृद्धाले दु:ख पाएका छन् भने संक्रमणको जोखिम पनि बढाएको छ।
-1764146706.png)
-1770562345.jpg)
