काठमाडौं- युट्युबको भ्युज र टिकटकको अभिनयले अहिले लोकप्रियता मापन गर्छ। सबै सुन्दर गीतले यी दुई आधुनिक माध्यममा ‘भाइरल’ हुने अवसर पाउँदैनन्।
केही हप्ताअघि रिलिज भएको ‘बोल्ने कोही छैन गाउँमा’ गीत यी माध्यममा हिट हुन सकेन। तर जतिले सुनिरहेका छन्, उनीहरुले रुचाइरहेका छन्।
शिशिर योगीको स्वरमा रहेको गीत कवि अर्जुन पराजुलीले लेखेका हुन् भने संगीत बिबी अनुरागीको रहेको छ।
गीतले बहुसंख्यक नेपालीको वर्तमान यथार्थ पस्केका छ। गीत सुरु यसरी हुन्छः
बोल्ने कोही छैन गाउँमा, बोल्ने कोही छैन
पाहुना आउँदा घरको ढोका, खोल्ने कोही छैन
.JPG)
युट्युबमा अपलोड भएको २१ दिन बितिसक्दा पनि यो गीत एक लाखले हेरिसकेकका छैनन्। यसले गीत सुनिसकेकाहरुको चित्त दुखेको छ। एक जना दर्शक/स्रोता भरत परियार कमेन्ट लेख्छन्, ‘युट्युबको ट्रेन्डिङमा र करोडौं क्लबमा यस्ता गीतले स्थान पाउनैपर्छ।’ गीत सुनिसकेपछि आफूलाई कमेन्ट गर्नेसमेत हिम्मत नआएको भन्दै उनले प्रशंसा गरेका छन्।
सामान्यतया सबै रुचाइएका गीतमा पनि नरुचाउनेहरु भेटिन्छन्। तर, यो गीतमा कमेन्ट गर्ने लगभग ४ सय जनामा धेरैजसोले प्रशंसा गरेका छन्।
गीत बजारमा हिट नभएकोप्रति पनि दर्शकहरुकै चित्त दुखाइ छ। एक दर्शक बहादुर थापा लेख्छन्, ‘यस्तो राम्रो शब्दको गीत सुन्ने को होला? अनेक छाडा शब्द भएको गीत दिनमा २/३ लाखले हेर्छन्। यस्ता मानव जीवनमा गाँसिएका गीत हेर्ने कोइ छैन।'
रामकृष्णलाई त समाजको यथार्थमा बनेको समधुर सांगीतिक कोशेली लागेको छ र यो अनन्तसम्म सुनिरहने उनको ठम्याइ छ।
गीतसंगीतप्रेमी शून्य सम्राटको मनभित्र यो ननिस्किने गरी बसेको छ। खेम रोकाया मार्मिक र समाजको प्रतिविम्बलाई गीतमार्फत् प्रस्तुत गरेकोमा गायक योगीलाई धन्यवाद दिन्छन्।
.JPG)
कुमार सुनुवारलाई त गीत सुन्दा मुटुको धड्कन रोकिएको अनुभव भयो। उनलाई लाग्छ, ‘गीतले नेपाली समाजको अवस्थालाई यसले हुबहु चित्रण गरेको छ।’
१३ वर्षदेखि भारतको दिल्लीमा काम गरिरहेका विवेक बिसी गीत सुनेर रोएको बताउँछन्। आफ्नो गाउँ सम्झेको बताउँछन्।
गीत सुनेर गाउँमा फर्किने चाहना समेत बढेको केही दर्शस्रोताले उल्लेख गरेका छन्।
६ महिनापछि सदाका लागि विदेश छाड्ने प्रण गरेका वीरबहादुर लेख्छन्, ‘अब चाहिँ हामीले देश फर्किन ढिलो गर्नुहुन्न। गाउँ पाखापखेरामा घरपरिवासँग बसेर दुःखजिलो गरेर खाइन्छ। महिनाको एक लाख रुपैयाँ कमाइ हुँदाहुँदै त अब ६ महिनापछि आफ्नै देश जाँदैछु।' उनी अरु नेपाली युवालाई पनि देशमै फर्किन आग्रह गर्छन्, ‘तीन वर्ष पूरा गर्नुभएको छ भने अब आफ्नै देश फर्किन र परिवारसँग रमाउने सोच बनाउन हार्दिक अनुरोध गर्दछु।’
अल्बर्ट खड्काले गायक योगीलाई सम्बोधन गर्दै आँखाबाट आँशु खसेको उल्लेख गरेका छन्। मर्मस्पर्शी गीत र लयका लागि धन्यवाद दिएका छन्।
यो गीत हिट दर्जामा नउक्लिएकोमा धेरै पीर पोखेका छन्। तीमध्ये एक प्रकाश भूषाल गीतकै तरिकामा कमेन्ट गर्छन्ः
बुझ्ने कोही छैन यो, गीत सुन्ने कोही छैन
छाडा भए देशका जनता बुझ्ने कोही छैन
सन्तोष भण्डारीलाई गीत हिट/फ्लपका आधुनिक तुलोमा गीतले प्रगति नगरेपनि आफ्नो मनले करोड भ्युज दिएको उल्लेख गरेका छन्।
प्रदेशमै भएका कुमार परियार गायक योगीको आफू फ्यान रहेको भन्दै लेख्छन्, ‘भावुक बनायो यो गीतले। शिशिर योगी सरकारको पहिलेदेखि नै फ्यान हो। अहिले झनै मन छुने गीत हेर्न पाइयो। अब एक वर्ष मात्रै विदेश बस्ने हो। त्यसपछि कुटो-कोदालो गरेर आटोपिठो खाइन्छ।’
गीत अन्तिमतिर अझ मार्मिक शब्द छन्।
बुन्ने कोही छैन डोको बुन्ने कोही छैन
गुहार लाउँदा पनि गाउँमा सुन्ने कोही छैन
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
