काठमाडौं- संघीय मामिला तथा सामान्य प्रशासनमन्त्री लालबाबु पण्डितले पुरानो नीतिलाई निमिट्यान्न पारी सम्पूर्ण नयाँ संरचना निर्माण गर्छु भन्ने कुरा सम्भव नभएको बताएका छन्।
संघीय संसद् प्रतिनिधिसभाअन्तर्गतको राज्य व्यवस्था तथा सुशासन समितिको आइतबारको बैठकमा मन्त्री पण्डितले कर्मचारीसँग सम्बन्धित नीतिनियमहरु भताभुंग बनाएर सबै नया गर्ने विषय सम्भव नभएको बताएका हुन्।
उनले विगतमा गरिएको व्यवस्था विभेदकारी भए परिर्वतन गर्दै जान सकिने र भविष्यमा पनि आवश्यकताअनुसार परिर्वतन गर्न सकिने भन्दै विद्यमान सम्पूर्ण नीतिगत व्यवस्थामा डोजर लगाउन सम्भव नभएको बताए।
उनले भने, 'विगतमा गरिएको कुराले विभेद भयो भनेर विगतकालाई हमी स्वीकार गर्छौं, के हामी विभेदकारी थियौं भन्ने? कि समय अनुकूल परिर्वतन भइरहन्छ? त्यसकारण हिजो गरेनम्। आज त्यो एकदम अनिवार्य छ। भविष्यमा अझै अनिवार्य हुनसक्छ। हिजो जुन ऐन आएको छ। सबै कुरा भताभुंग बनाएर, पुरानो घरलाई डोजर लगाएर सम्म बनाएर नयाँ जग खन्ने गरी होइन। अहिले त्यो सम्भव छैन।'
सरकारको विभिन्न संरचना र संगठनहरु पनि त्यो व्यवस्थाअनुसार तयार नभएको भन्दै उनले विभिन्न पदमा कार्यरत व्यक्तिको कार्यगत स्थिति कहाँ कति परिर्वतन गर्ने भन्ने अनुसार अतिकतमसम्म मिलाएर अघि बढेको उल्लेख गरे।
उनले भने, 'अहिले हामी देख्छौं। एकातिर नेपाल आर्मी, अर्कातिर सशस्त्र प्रहरी, अर्कोतिर जनपद प्रहरी, अर्कातिर अनुसन्धान र अर्कोतिर निजामति छ। यी सबै सरकार त सरकारकै हुन्, तर मिल्दैन। त्यसकारण जहाँसम्म मिल्छ, मिल्दै, मिलाउँदै जाने कुरामा कुनै दुई मत छैन। सबै भताभुंग गरेर फेरि अर्को आँधीबेहरी सिर्जना गर्नेगरी अहिले सम्भव छैन। सम्भव भएजति छलफल गरेर ल्याइएको छ। अहिले त्यो गर्यो भने नीतिगत रुपमा विधेयक फिर्ता लैजानुस् भन्नुपर्ने हुन्छ। हामी त्यो ठाउँमा छैनौ। समग्र परिवेशले कहाँनेर कति चेन्ज गर्न सकिन्छ। त्यति बुझेर अगाडि बढ्यौं भने हामी निकासमा पुग्छौं।'
लामो समयसम्म श्रेणी र तहगत प्रणालीमा छलफल गरेर स्थानीय र प्रदेशमा गएको भन्दै उनले भविष्यमा तात्कालीन वस्तुस्थितिअनुसार परिर्वतन गरेर अघि बढ्न सकिने स्पष्ट पारे।
समितिले संघीय निजामती सेवाको गठन, सञ्चालन र सेवाको सर्त सम्बन्धमा व्यवस्था गर्न बनेको विधेयकमाथिको छलफलका लागि विभागीय मन्त्री पण्डितलाई समितिमा बोलाएको हो। (फाइल तस्बिर)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1781621001.png)
-1781591850-1781592603.jpg)
-1764146706.png)
