काठमाडौं– चिकित्सा विज्ञान तथा प्रयोगशाला सम्बन्धी दोस्रो बृहत् प्रदर्शनीको तयारी पूरा भएको छ। मंसिर २८ गतेदेखि हुने प्रदर्शनीका लागि सम्पूर्ण तयारी पूरा गरेको आयोजकले पत्रकार सम्मेलनमार्फत जनाएको हो ।
सर्जिकल म्यानुफ्याक्चर एन्ड ट्रेडर्स एसोसिएसन र एसडी प्रोमो मिडिया प्रालि भारतले केमिकल एन्ड मेडिकल सप्लायर्स नेपालसँगको सहकार्यमा प्रदर्शनी आयोजना गर्न लागेको हो । प्रदर्शनी काठमाडौंस्थित भृकुटीमण्डपमा हुँदैछ।
मंसिर २८ देखि पुस १ सम्म चल्ने प्रदर्शनीमा निःशुल्क प्रवेशको व्यवस्था गरिएको छ । मेडिकल सर्जिकल क्षेत्रका व्यवसायी, स्वास्थ्य पेशाकर्मी र विभिन्न मेडिकल क्षेत्रका विद्यार्थीका लागि यो प्रदर्शनी लाभदायी हुने एसडी प्रोमोका सतिश कुमारले बताए । उनका अनुसार प्रदर्शनीमा व्यावसायिक भेटघाट र छलफलका साथै विज्ञहरुले उपकरण सम्बन्धी जानकारीमूलक प्रस्तुति दिनेछन्।
चिकित्सा विज्ञान र प्रयोगशालाका विषयमा बृहत् जानकारी दिन प्रदर्शनीको आयोजना गर्न लागिएको केमिकल एन्ड मेडिकल सप्लायर्स एसोसिएसनका अध्यक्ष सुरेश घिमिरले बताए । तीनदिने प्रदर्शनीमा राष्ट्रिय तथा अन्तर्राष्ट्रिय क्षेत्रका प्रतिनिधिको सहभागिता रहनेछ।
नेपाल मेडिकल एशोसियसनका अध्यक्ष मुक्तिराम श्रेष्ठले यस्ता प्रदर्शनीले चिकित्सकलाई समेत फाइदा पुग्ने बताए । उनले भने, ‘चिकित्सा वर्गलाई गुणस्तरीय उपकरण बारे जान्न यस्ता प्रदर्शनीले सघाउँछ ।’
प्रदर्शनीमा सर्जिकल सामग्री, उद्धार र आपतकालीन सामग्री, मेडिकल डिस्पोजेबल, अस्पतालका लागि फर्निचरहरु, अस्पतालका सूचना संयन्त्र प्रदानकर्ता, औषधिजन्य फोहोर व्यवस्थापन, सुविधा व्यवस्थापन र अन्य सेवा प्रदायक कम्पनीहरु एकै ठाउँमा भेटिनेछन्।
दुई सयभन्दा बढी स्टल रहने प्रदर्शनीमा ५ सयभन्दा बढी ब्रान्ड उपकरण एवं स्वास्थ्य सामग्री राखिनेछ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749200817.png)
