काठमाडौं– आइसिसी एकदिवसीय विश्वकप क्रिकेट प्रतियोगिता बिहीबारबाट सुरु हुँदैछ। इंग्ल्यान्ड र वेल्समा हुने विश्वकपमा यसपटक १० टिमले प्रतिस्पर्धा गर्दैछन्। बिहीबार अपरान्ह लन्डनमा हुने उद्घाटन खेलमा आयोजक इंग्ल्यान्ड र दक्षिण अफ्रिकाबीच प्रतिस्पर्धा हुनेछ। विश्वकप सुरु हुनुअघि टिममा प्रदर्शनबारे विश्लेषण भइरहेका छन्।
कुन टिम सबैभन्दा अनुभवी?
२१औं शताब्दीमा भारतले जति अरु कुनै पनि टिमले एकदिवसीय खेल खेलको छैन। त्यसैले पनि बिहीबारदेखि सुरु हुने विश्वकपमा भारतीय टिम सबैभन्दा अनुभवी टिम देखिएको छ। भारतीय टिममा रहेका खेलाडीले कुल १५ सय ७३ एकदिवसीय खेल खेलेका छन्। दोस्रो स्थानमा कुन टिम होला त? अस्ट्रेलिया पनि होइन इंग्ल्यान्ड पनि होइन्। दोस्रो स्थानमा बंगलादेश छ। २००७ को विश्वकपमा भारतमाथि सनसनीपूर्ण जित हात पारेको बंगलादेशको टिममा रहेका पाँच खेलाडीले एक सय भन्दा बढी एकदिवसीय खेल खेलेका छन्।
खेलाडीको औषत अनुभव
उच्चतम औषत अनुभवमा भने इंग्लिस टिममा छ। इंग्ल्यान्डको टिमका खेलाडीको औषत अनुभव ८२ एकदिवसीय खेल रहेको छ। दोस्रो स्थानमा रहेको दक्षिण अफ्रिकाको ६६ खेल छ। समग्रमा अनुभवमा शीर्ष स्थानमा रहेको भारतीय टिम औषत अनुभवमा भने तेस्रो स्थानमा छ। भारतीय टिमको औषत अनुभव ६३ खेल छ। अफगानिस्तानको ५६, श्रीलंकाको ५५, न्युजिल्यान्डको ५१, बंगलादेशको ४६, पाकिस्तानको ४६, अस्ट्रेलियाको ४४ र वेस्ट इन्डिजको ३५ औषत खेल छ।
युवा र अनुभवी टिम
विश्वकमा सबैभन्दा बढी उमेर भएका खेलाडीको टिम श्रीलंका हो। श्रीलंकाका खेलाडीको औषत उमेर ३०.४३ वर्ष छ। दोस्रो स्थानमा रहेको दक्षिण अफ्रिकाका खेलाडीको औषत उमेर ३०.३९ वर्ष छ। विश्पकपका १० टिमका १ सय ५० खेलाडी मध्ये सबैभन्दा पाका उमेरका खेलाडी दक्षिण अफ्रिकाकै इमरान ताहिर हुन्। उनी जारी विश्वकपमा ४० वर्ष पुगेका एक्ला खेलाडी हुन्। दक्षिण अफ्रिका टिममा हसिम अमला (३६), डेल स्टेन (३६), जेपी डुमिनी (३५) र कप्तान फाप डु प्लेसिस (३४) बढी उमेरका खेलाडी हुन्। ताहिर र डुमिनीले विश्वकपछि संन्यास लिने घोषणा गरिसकेका छन्।
३० वर्ष भन्दा माथि औषत उमेर भएको टिममा भारत र अस्ट्रेलिया पनि पर्छन्। अस्ट्रेलियाका खेलाडीको औषत उमेर ३०.३४ वर्ष र भारतको औषत उमेर ३०.०६ वर्ष छ।
विश्वकपमा सबैभन्दा युवा टिम अफगानिस्तानको हो। अफगानिस्तानका खेलाडीको औषत उमेर २७.७ वर्ष छ। त्यसपछि बंगलादेश (२७.७९) र पाकिस्तान (२७.९२) औषत वर्ष भएको टिम युवा टिममा पर्छन्।
पछिल्लो विश्वकपछि कसको प्रदर्शन राम्रो
सन् २०१५ को विश्वकपपछि ब्याटिङमा विराट कोहलीको प्रदर्शन उत्कृष्ट रहेको छ। उनले विश्वकपपछि ६९ खेल खेलेर ४३ सय भन्दा बढी रन बनाएका छन्। जसमा १९ शतक समावेश छन्। ६९ मध्ये २ खेलमा भने कोहली शून्यमा आउट भएका थिए।
दोस्रो स्थानमा भारतकै रोहित शर्मा छन्। उनले ७१ खेल खेल्दा ३७ भन्दा बढी रन बनाउने क्रममा १५ शतक बनाएका छन्। तेस्रो स्थानमा रहेका इंग्ल्यान्डका जोए रुटले ४ वर्षमा ३४ सय बढी रन बनाउदा १० शतक हिर्काएका छन्। चौथो स्थानमा इंल्यान्डका इयान मोर्गानले ३ हजार रन बनाउन ५ शतक र पाँचौ स्थानका दक्षिण अफ्रिकाका क्वान्टन डेक ककले २९ सय रन बनाउदा ८ शतक हिर्काएका छन्।
बलिङतर्फ इंग्ल्यान्डका अदिल रसिद अघि छन्। उनले ५ वर्षमा ८३ खेल खेलेर १ सय २९ विकेट लिएका छन्। अफगानिस्तानका रसिद खान दोस्रो स्थानमा छन्। उनले ५९ खेलमा १ सय २५ विकेट लिउका छन्। न्युजिल्यान्डका ट्रेन्ड बोल्टले ५४ बेलमा १ सय ७ विकेट र दक्षिण अफ्रिकाका कागिसो रबाडाले ६६ खेलमा १ सय ६ विकेट लिएका छन्।
इंग्ल्यान्ड फर्ममा
यसपटकको विश्वकपमा इंग्ल्यान्डलाई दाबेदारको रुपमा लिइएको छ। किनकी जितको औषत दरमा इंग्ल्यान्ड शीर्ष स्थानमा छ। इंग्ल्यान्डको जितको औषत २.५० छ। दोस्रो स्थानमा रहेको भारतको १.८१ र तेस्रो स्थानको दक्षिण अफ्रिकाको १.६५ छ। पुछारको वेस्ट इन्डिजको ०.२९ र पुछारबाट दोस्रो स्थानको श्रीलंकाको ०.३१ जितको औषत छ।
.JPG)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787723619.jpg)
-1786602170.png)
