जनकपुर– संविधानसभाका सभासद् सञ्जय साह (टकला) को वास्तविकता उनी निर्वाचित हुनुअघि खुलेको भए संसदको गरिमामा त्यति ठूलो आँच आउने थिएन। जनकपुरबाट निर्वाचित उनको आपराधिक पृष्ठभूमिका कारण सिंगो संविधानसभा बारम्बार आलोचनाको केन्द्रमा रह्यो।
२० वर्षपछि हुन भइरहेको स्थानीय तह निर्वाचनको तेस्रो चरणमा धनुषाबाट मात्रै चार हजारभन्दा बढी उम्मेदवार चुनावी मैदानमा छन्। शुक्रबार उम्मेदवारीको अन्तिम नामावली आइसकेपछि यतिबेला प्रदेश प्रहरी र जनकपुर प्रहरी उम्मेदवारको विगतको आपराधिक पृष्ठभूमि खोतल्न व्यस्त छ।
जिल्ला प्रहरी कार्यालय धनुषाले एउटा बेग्लै इकाइखडा गरेर उम्मेदवार बनेकाहरुको अपराधसँगको साइनो खोज्न थालेको हो। इकाइले प्रहरीको डाटाबेसमा कतै कुनै उम्मेदवारको नाम त छैन? खोज्न थालेको छ। समाजमा भएका ठूला र जघन्य घटनामा मुछिएका व्यक्ति समेत निर्वाचनमा उम्मेदवार हुन सक्ने आशंकापछि धनुषा प्रहरी सक्रिय भएको हो।
धनुषामा रहेको जनकपुर उपमहानगर सहित ११ नगरपालिका र ६ गाउँपालिकाका करिब चार हजार उम्मेदवारको विगत केलाउन यतिबेला प्रहरीलाई भ्याइनभ्याई छ।
धनुषा प्रहरीका निमित्त प्रमुख डिएसपी प्रवीण धिताल निर्वाचन कार्यालयले उपलब्ध गराएको उम्मेदवार सूचीका विषयमा आउने उजुरी बाहेक प्रहरी आफै पनि उम्मेदवारको आपराधिक पृष्ठभूमि रहे नरहेको खोज्न सक्रिय रहेको बताउँछन्।
उनका अनुसार विगतमा कुनै अपराध वा आपराधिक घटनामा प्रतिवादी र आरोपी बनाइएका व्यक्ति समेत उम्मेदवार हुन सक्ने आशंका प्रहरी र निर्वाचन कार्यालयलाई छ। 'धनुषाबाट उम्मेदवार बनेका व्यक्तिका विषयमा खोजबिन हुनु नियमित प्रक्रिया हो, हामी त्यसमा खटिइरहेका छौं,’ डिएसपी धितालले नेपाल लाइभसँग भने।
निर्वाचनमा अवरोध गर्न सक्ने भूमिगत समूहका सदस्य सीमापारि रहेको भन्दै उनले र त्यस्ता गतिविधि निगरानी गरिरहेको बताए।
यस्तै, जिल्लामा नेकपा विप्लव समूहका गतिविधि देखिएकाले उनीहरु उपर पनि निगरानी बढाएको डिएसपी धितालकोव भनाइ छ।
उनले भने, ‘सीमापारि रहेका केही व्यक्ति हाम्रो निगरानीमा छन्, यस्तै निर्वाचन बिथोल्ने नीति लिएका अमूक दलका क्रियाकलापका विषयमा समेत प्रहरी सचेत छ।’
धनुषाका सबै मतदान स्थल संवेदनशील
धनुषाका सबै मतदान स्थल संवेदनशील र अति संवेदनशीलको श्रेणीमा छन्। सुरक्षाका दृष्टिकोणले सामान्य भन्ने कुनै मतदान स्थल र केन्द्र नै नरहेको डिएसपी धिताल बताउँछन्।
जिल्लामा कायम गरिएका जम्मा तीन सय २७ मतदानस्थलमा रहेका पाँच सय ३२ मतदान केन्द्र नै अति संवेदनशील र संवेनशीलको श्रेणीमा राख्दै सोही अनुसार सुरक्षा प्रबन्ध मिलाइएको छ।
प्रहरीका अनुसार तीन सय २७ मतदान स्थलमध्ये दुई सय २२ अति संवेदनशील र एक सय पाँच संवेनशीलको श्रेणीमा राखिएका हुन्। अति संवेदनशील रहेका मतदानस्थलमा सुरक्षाकर्मीको संख्या सहित सुरक्षा प्रबन्ध तथा सुरक्षा सामग्री समेत सोही अनुसार रहने डिएसपी धितालले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
