काभ्रे २ मा एमालेबाट प्रतिनिधिसभाको प्रत्यक्षतर्फका उम्मेदवार हुन्, गोकुल बाँस्कोटा। अघिल्लो संविधानसभामा क्षेत्र–३ बाट उम्मेदवार बनेका उनले जित भने निकाल्न सकेनन्। यसपटक एमाले र माओवादी केन्द्रबीच वाम गठबन्धन भएकाले पनि जित्नेमा उनी ढुक्क छन्। बाँस्कोटासँगको समय-संवादः
प्रतिनिधिसभामा तपाईंको प्रतिनिधित्व रह्यो भने देशको समग्र विकास र सुशासनको पक्षमा कस्तो मुद्दा उठाउनुहुन्छ?
हामीलाई भ्रष्टाचारले गाँजेको छ। भ्रष्टाचार यति मौलाएको छ कि सबै कुरा टेबल मुनिबाट चल्छ। अहिले चन्दा दिन खोज्ने साथीहरु पार्टीलाई चन्दा बुझाएर रसिद लिएर जाऊ भन्दा मान्दैनन्, बरु उम्मेदवारलाई ३–५ हजार दिन आउँछन्। त्यसलाई मैले ग्रहण गरेको छु र खुला रुपमा पनि भनिरहेको छु। किनकि, म हिजो मिडियामा पनि काम गरेको मान्छे हुँ। लुकाएर कुरा गर्नुहुँदैन। हामीले यस्तो अभ्यास गरेछौं कि व्यक्ति धनी बन्नुपर्योन, राष्ट्र जेसुकै होस्!
घोषणापत्रमा जे कुरा उल्लेख छ, तिनै मुद्दा अगाडि बढाउने हो। अन्तर्राष्ट्रिय सम्बन्धका विषयमा पनि विचित्र छ। कनेक्टिभिटीका हिसाबले चीनसँग जाने बाटो त दुई वटा हो। एउटा केरुङ र अर्को तातोपानी। कस्तो छ भने एकातिरको लगानी पनि स्वीकार गर्न नहुने, जस्तो हालसालै बूढीगण्डकीमा देखियो। केही त्रुटि छ भने परिवर्तन गरौं न। तर, परियोजना नै किन ध्वस्त गर्ने? त्यसैले एउटा हाम्रो राष्ट्रिय स्वाधीनताको मुद्दा उठाइनेछ। तर, खोक्रो राष्ट्रिय स्वाधीनता बाँच्छ कि बाँच्दैन? राष्ट्रियता बचाउन आत्मनिर्भर अर्थतन्त्र निर्माणका विधि, प्रक्रिया र मान्यताहरु चाहिन्छ।
मैले त भन्ने गरेको छु, अबको यात्रा समाजवादको, अबको दशक निर्माणको। तीव्रतर निर्माण गर्नुपर्छ। एउटा मान्छेको नेतृत्वले फरक पर्छ नि। हुन त समयको माग भन्छौं, तर लि क्वान यु थिएनन् भने सिंगापुर के हुन्थ्यो? जसलाई चार वटा देशले शासन गरेको थियो। त्यसैले अब हाम्रो देशलाई समृद्धितिर लैजानुपर्छ। त्यसैले मैले संरचनागत सुधारको पनि कुरा गरेको छु। अहिले म सेक्युरिटी हेरिरहेको छु, देशको प्रहरीसित तेल हाल्ने पैसा हुँदो रहेनछ। अरु कसैले दिएकाले होला, ०७० को निर्वाचनमा गाडी चाहिँ छ भन्थे।
निर्वाचन आयोगभन्दा बढी सुरक्षा निकायले खर्च गरिरहेको छ भन्ने कुरा आएको छ नि!
होला, तर तेल हाल्नेसम्म पैसा छैन। पर्याप्त गाडी छैन। अनि तेल नै हाल्न नसकेपछि उसले के गर्छ? कसैसित माग्नुपर्योब। भ्रष्टाचारलाई पनि संस्थागत गर्न खोजिरहेको देखिन्छ। सबैतिर त्यो नहोला, मलाई थाहा छैन। यो हालतमा राज्यका संस्थाहरु राख्न हुन्छ कि हुँदैन? संख्या बरु कम गर, तर प्रविधिसम्पन्न चाहिँ हरेक संस्थालाई बनाऊ। त्यसैले संस्थागत, संरचनागत र आर्थिक सुधार तथा यसमा तीव्रता दिने कुरा, लगानी भित्र्याउने कुरा, जे पायो त्यही अनुदान स्वीकार नगर्ने कुरा त हाम्रा मुद्दा नै हुन् नि! ती विषयलाई हामी अगाडि बढाउँछौं।
अघिल्लो प्रतिस्पर्धामा तपाईं पराजित हुनुभएको थियो, यस पटक चाहिँ जित निकाल्ने कुरामा कत्तिको विश्वस्त हुनुहुन्छ?
मलाई के विश्वास छ भने काभ्रे जिल्लामा आजसम्म जति पनि विकास भएको छ, त्यो हामीले नै गरेको हो। जिविसको नेतृत्व पनि तत्कालीन एमालेले गर्योआ। सांसद पनि हामीले जित्यौं। केन्द्रीय सरकारमा हाम्रो पहुँच जहिले पनि कम भयो। वामपन्थीहरुले त जम्मा ६ वर्षजति न सरकार चलाएका छौं। कांग्रेसले १२ पटक सरकारको नेतृत्व गर्योभ। बहुदल यताका २८ वर्षमा उसैले २२ वर्ष सरकारको नेतृत्व गर्योम। तर, देशमा विकासको नयाँ एजेन्डा र तरंग त वामपन्थी सरकारले नै ल्याएका हुन्।
अस्तिसम्म हामीलाई उडाउने कांग्रेसले पनि अहिले त घोषणपत्रमा पानीजहाज र रेलको कुरा गरेको छ। त्यतिबेला बालुवाटारअघि त कागजका पानीजहाज बनाएर गुडाउँदै थिए नेविसंघका केटाहरु। गगनजीहरुले हावादारी कुरा भनेर उकास्नुभएको थियो, तर घोषणापत्रमा त्यही लेख्नुपरेको छ। त्यसैले विचार, विकास र परिवर्तनको नेतृत्व वामपन्थीहरुले गर्दै आएका छन्। तर, उदेकलाग्दो कुरा के देखिन्छ भने लोकतन्त्र खतरामा पर्यो रे। लोकतन्त्र होइन, २२ वर्षको कांग्रेसी सरकार, त्यसका अभ्यासहरु, त्यसको नेतृत्व र त्यसका थोत्रा विचारहरु म्युजियमतिर जाने भए, सिंहदरबारमा अब कांग्रेस हुँदैन। त्यसैले खतरामा कांग्रेस परेको छ।
तपाईं अलि बढी उत्साहित देखिनुभएको छ, वाम गठबन्धनको कारणले हो कि!
गठबन्धन नहुँदा पनि काभ्रे त्यो जिल्ला हो, जहाँ १३ वटा स्थानीय तहमा ७ वटा एमाले एक्लैले जितेको थियो। माओवादी र कांग्रेसले दुई–दुई वटा जितेका हुन्। के हाम्रो संगठन थिएन? हाम्रो कपाल फुल्यो नि, युवा हुँदाहुँदै पनि। मलाई लाग्छ, पृथ्वीलाई चन्द्रमाले फन्का मारे जस्तो त्यो जिल्लामा ३२ वर्ष फन्को मारिएको छ, पार्टी निर्माण र जनतालाई सेवा र सहयोग गर्न।
संकटको बेलामा अर्काले नाकाबन्दी लगाउँदा पनि प्रधानमन्त्रीको कुर्सीमा बसेर यो देश बनाउन सक्छु भनेर राष्ट्रिय जागरणको भाव पैदा गराउने सामर्थ्य राख्ने केपी ओलीको पार्टीका कार्यकर्ता हौं हामी। त्यसैले हामी निराशाजनक कुरा गर्दैनौं। कालो बादलमा पनि चाँदीको घेरा हुन्छ। त्यसैले म जित्छु वा हार्छु, यो जनताको हातमा छ नि! म त मत मागिरहेको छु।
कोलम्बसले अमेरिका कहिले पत्ता लगाए? अहिले त्यही अमेरिका विश्वको ठेकेदार प्रहरी बनेर बसेको छ। गरेरै भएको होला। जापान एकपटक ध्वस्त भएर फेरि उठ्दै छ। नेपाल पनि त यही पृथ्वीको एउटा भूभाग हो। त्यसैले यो देशमा पनि गर्न सकिन्छ भन्ने कुरा हो। हामीसित खानी, पानी सबै छ। अरुले पनि प्राकृतिक स्रोत-साधनको सही सदुपयोग, दोहन र वितरण गरेर सम्पन्नता हासिल गरेका हुन्। हामीले पनि त्यही गर्ने हो। म जुन मुद्दा लगिरहेको छु, ती मुद्दालाई जनताले अनुमोदन गरिरहेका छन्। त्यसैले ६ सिट नै जितिन्छ काभ्रेमा, कुनै १ सिट वा ३ सिटको कुरा होइन। ४ वटा एमाले र २ वटा माओवादीका तर्फबाट छन्, ती सबैले जित्छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
