काठमाडौं–नेपाली कांग्रेसको भ्रातृ संस्था नेपाल विद्यार्थी संघ (नेविसंघ) को आयोजनामा सोमबारदेखि राजधानीमा जय नेपाल कप टी–२० क्रिकेट प्रतियोगिता सुरु भएको छ।
प्रतियोगिताको प्रथम राष्ट्रपति डा. रामबरण यादवले एक कार्यक्रमकाबीच त्रिवि क्रिकेट मैदान कीर्तिपुरमा उद्घाटन गरेका छन्। प्रतियोगिता उद्घाटन गर्दै डा. यादवले खेलकुद संस्कृति, विचार र विभिन्न क्षेत्रको विविधतालाई जोड्ने कडी रहेको बताए।
पछिल्लो दुई दशकदेखि नेपालले क्रिकेटको क्षेत्रमा उदाउँदै गरेको देशको पहिचान स्थापित गर्न सफल भएको भएकोमा खुसी व्यक्त गर्दै खेलकुदमार्फत विश्वमा शान्ति र सद्भावको सन्देश फैलउन सकिने विश्वास व्यक्त गरे।
खेलकुदबाट देशको पर्यटन क्षेत्रको विकासमा टेवा पुग्ने र अनुशासित युवा शक्तिको विकासद्वारा समृद्ध नेपालको निर्माण हुने विश्वास व्यक्त गरे।
प्रतियोगिता अन्तर्गत आज भएको उद्घाटन खेलमा त्रिभुवन विश्व विद्यालयले विजयी सुरुआत गरेको छ। लोकेश बमको विष्फोटक ब्याटिङमा त्रिभुवन विश्वविद्यालयले बाबासाहेब भीम राव अम्बेडकर विश्वविद्यालय बिहारलाई ८ विकेटले पराजित गरेको हो।
बिहारले दिएको १३५ रनको लक्ष्य त्रिविले १५ ओभरमा २ विकेट गुमाएर पूरा गरेको थियो। त्रिविका लागि ओपनर लोकेशले शानदार ब्याटिङ गरे। ३६ बल खेल्दै ८९ रनको शानदार पारि खेले। खड्क बोहराले १८ रन जोड्दा आयुस भट्टराईले १७ रन बनाए।
पहिले ब्याटिङ गरेको बिहार १७.३ ओभरमा १३४ रनमा अलआउट भएको थियो। बिहारका लागि विशाल राजले ४२ तथा इमरान हस्मिले ४१ रन जोडे।
त्रिविका लागि सन्तोष क्षेत्रीले सर्वात्रिक ४ तथा मुकेश ओझा र खगेन्द्र सिंहले समान तीन विकेट लिए। लोकेश बम खेलको प्लेयर अफ दी म्याच घोषित भए। उनलाई कांग्रेस केन्द्रीय सदस्य राजीव ढुंगाना पुरस्कार प्रदान गरे।
प्रतियोगितामा नेपालका ४, भारतका ३ तथा बंगलादेशको १ विश्वविद्यालयको सहभागीता रहेको छ।
समूह ‘ए’ मा त्रिभुवन विश्वविद्यालय, ढाका विश्वविद्यालय, पूर्वाञ्चल विश्वविद्यालय र बाबासाहेब भीम राव अम्बेडकर विश्वविद्यालय बिहार छन्।
समूह ‘बी’ मा काठमाडौं विश्वविद्यालय, लखनऊ विश्वविद्यालय, दिल्ली विश्वविद्यालय र मध्यपश्चिम विश्वविद्यालय छन्।
नौं दिनसम्म चल्ने प्रतियोगिता जलवायु परिवर्तनको मुद्दालाई प्रवर्धन र ग्रासरुट क्रिकेटको विकासका लागि आयोजना गर्न लागिएको संघले जनाएको छ।
प्रतियोगिताको विजेताले नगद १५ लाख रूपैयाँ पाउनेछ भने उपविजेताले १० लाख रूपैयाँ प्राप्त गर्नेछ। उत्कृष्ट खेलाडीहरूका लागि थप ५ लाख रूपैयाँ छुट्याइएको छ, जसअनुसार कुल पुरस्कार राशी ३० लाख रूपैयाँ रहेको छ
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
