नेकपा एमालेका निर्वाचित केन्द्रीय सदस्य जीवनराम श्रेष्ठ प्रतिनिधिसभा निर्वाचनमा काठमाडौं क्षेत्र नम्बर ८ बाट वाम गठबन्धनका साझा उम्मेदवार छन्। उनी अन्तर्राष्ट्रिय मान्यताप्राप्त नेपाल ओलम्पिक कमिटिका अध्यक्ष हुन्।
अघिल्ला दुई संविधानसभा निर्वाचनमा कांग्रेसले जितेको काठमाडौं ८ मा वाम गठबन्धनको चुनावी एकताले आफू स्थापित हुनेमा श्रेष्ठ ढुक्क छन्। चुनावी प्रचारको अन्तिम दिन प्रचार कार्यक्रम समापन गरेका श्रेष्ठसँग नेपाल लाइभका हिम विक्रमले गरेको कुराकानीः
अन्तिम दिनको चुनावी प्रचार समेत सक्नुभएको छ, काठमाडौं ८ मा आफ्नो अवस्थाको कस्तो विश्लेषण गर्नुभएको छ?
चुनावी प्रचारको अन्तिम दिन हामीले बृहत् र्याली निकाल्यौं। निकै उत्साहजनक र्याली थियो। हजारौंको उत्साह र सहभागिताले मेरो जित सुनिश्चित भइसकेको देखाउँछ। अब त्यसको औपचारिक घोषणा हुन मात्र बाँकी छ।
अघिल्ला दुई पटकका निर्वाचनमा काठमाडौं क्षेत्र नम्बर ८ मा कांग्रेसका उम्मेदवारले जितेका थिए। कांग्रेसको गढ मानिने क्षेत्रमा आफूले जित्ने आधार के देख्नुहुन्छ?
अघिल्ला पटकको चुनाव कांग्रेसले जित्नुको केही खास कारण छ। त्यो बेला वामपन्थीको विवाद र नेवार समुदायबीचको विभाजनका कारण कांग्रेसले जितेको हो, लोकप्रिय भएर होइन। यो निर्वाचन क्षेत्र वामपन्थी दलकै आधार क्षेत्र हो। ०४७ सालदेखि ०६४ अगाडिसम्म वामपन्थीले जितिरहेको थियो। तर, ०६४ सालपछि माओवादी समेत निर्वाचनमा सहभागी हुन आइपुग्यो। एमाले र माओवादीको दुई उम्मेदवार चुनावी मैदानमा उत्रिएपछि मत विभाजन हुँदा कांग्रेसलाई चिठ्ठा परेको मात्र हो।
तर, यस पटकको अवस्था फरक छ। दुवै वामपन्थी दलले साझा उम्मेदवार अघि सारेका छन्। नेवार समुदायको पार्टीका रुपमा चिनिने नेवा लगायत विभिन्न राजनीतिक दलले मलाई समर्थन गर्नुभएको छ। यस क्षेत्रमा लोकतान्त्रिक गठबन्धनसँग राप्रपाको तालमेल नमिल्दाको फाइदा समेत मलाई पुगेको छ।
मतदाताले तपाईंलाई किन जिताउने?
मुख्य कुरा त हामी गठबन्धन बनाएर चुनावी मैदानमा ओर्लिएका छौं। वामपन्थी एकता नहुँदा राष्ट्र अस्थिर भयो, जसले गर्दा समृद्वि र विकास हुन सकेन, राष्ट्रियता समेत कमजोर भयो। अब आर्थिक समृद्वि र विकासका लागि हाम्रो गठबन्धनलाई जिताउन आवश्यक छ।
म यहीँको स्थानीय नागरिक भएकाले काठमाडौंको भावनालाई समेट्न सक्छु। काठमाडौंलाई सांस्कृतिक शहर र पर्यटकीय केन्द्रको रुपमा विकास गर्ने एजेन्डा र योजना मसँग छ। विगतमा हाम्रो पुस्ताले छाडेर गएका संस्कृति, सम्पदा र धरोहरलाई विकास गर्ने योजना अघि सारेको छु। हनुमानढोकादेखि स्वयम्भूसम्मको स्थानलाई हेरिटेज वाचको रुपमा विकास गर्ने योजना छ। त्यसैबाट स्थानीय बासिन्दाको आर्थिक अवस्था परिवर्तन गर्ने सोच छ। भूकम्पबाट भत्किएका घर र सम्पदा अहिलेसम्म बन्न सकिरहेका छैनन्। ऐन ल्याएर पुनर्निर्माणको काम तत्काल अघि बढाउँदै घर बाहिर भएका जनतालाई आवासमा राख्न सक्रियतापूर्वक बढ्छु।
अर्को कुरा, भोट माग्ने क्रममा मतदाताको दैलोमा पुग्दा समेत सबैको चिन्ता खानेपानीमै देखिन्छ। पानीको समस्या समाधान गर्न उच्च प्राथमिकतामा राखेर काम गर्नेछु। मेलम्ची खानेपानी आयोजनाले मात्र यहाँको समस्या सम्बोधन हुँदैन, वैकल्पिक स्रोतलाई उपभोग गर्ने प्रविधितर्फ समेत जानुपर्छ भन्ने मेरो मान्यता हो।
तपाईं त लामो समयदेखि नेपाली खेलकुदमा क्रियाशील रहेको व्यक्ति, सामाजिक विकासको एजेन्डालाई तपाईंले कार्यान्वयन गर्नुहुन्छ भन्ने कुरामा आम मतदाता कसरी विश्वस्त रहने?
निश्चित रुपमा म लामो समयदेखि नेपाली खेलकुदको नेतृत्व गरिरहेको छु। खेलकुदलाई सम्मानित ठाउँ बनाउने मेरो प्रयास अहिले पनि जारी छ। तर, म सामाजिक विकास गर्ने सोचसहित अघि बढेको छु। विकासको हिसाबले विगतमा कांग्रेसले यस क्षेत्रमा भ्रम मात्र छर्न खोज्यो। यहाँका जनता प्रत्येक वर्ष आउने सांसद विकास कोषको ३ करोड ५० लाख रकम कहाँ गयो भनेर सोधिरहेका छन्। जनताले विकास–निर्माणमा यो क्षेत्र १० वर्ष पछाडि पर्यो भनिरहेका छन्।
यो सांस्कृतिक क्षेत्र पनि हो। मैले काठमाडौंको विकास र पहिचानलाई कायम गर्ने सवालमा, नेवार समुदायको संस्कृतिसँग जोडिएका पक्षको संरक्षण गर्ने कुरा गरिरहेको छु। विकासको नाममा यहाँको मौलिकता, संस्कृति र सम्पदालाई अतिक्रमण गर्ने काम बन्द गर्नुपर्छ भनिरहेको छु।
खेलकुदको क्षेत्रमा खेलाडीको खेल जीवन सुनिश्चित गर्ने कुरामा ऐनमार्फत निर्देशित गर्ने योजना छ। खेलकुदको विश्वविद्यालय खोल्ने कुरामा भुमिका खेल्नेछु। राखेपको सदस्य–सचिव हुदाँ गौरीटारमा सेन्ट्रल एकेडेमीको परिकल्पना गरेर काम सुरु गरिएको थियो, त्यसलाई साकार पार्न चाहन्छु। यही डल्लु क्षेत्रमा एउटा बहुउद्देश्यीय कभर्ड हल बनाउँछु। मैले मतदातालाई भनेको छु, चुनाव लगत्तै यी काम सुरु गर्नेछु।
काठमाडौं ८ को निर्वाचनमा डल्लुको आवास क्षेत्र सधैं निर्णायक बन्दै आएको छ। यसपटकको अवस्था के रहन्छ?
डल्लु आवास आयोजना मै वडाअध्यक्ष हुँदा सम्पन्न भएको हो। तत्कालीन समयमा आयोजना बनाउनु हुँदैन भनेर कांग्रेसले विरोध गरेको थियो। यस क्षेत्रको विकास–निर्माणमा मैले पुर्याएको योगदानबारे सबै मतदाता जानकार छन्। यही क्षेत्रमा हामीले सामुदायिक अस्पताल बनायौं। त्यसका लागि जग्गा र भवनको व्यवस्था गर्यौं। खानेपानीको बोरिङ गरेर वैकल्पिक पानीको सप्लाई गर्नेगरी काम अघि बढाएको छु। चमती आयोजना विगत १० वर्षदेखि अलपत्र छ। मैले आम मतदातालाई भनेको छु, निर्वाचित भएको दुई वर्षमा सो आयोजना पूरा गर्छु। मेरो काम र योगदानको मूल्यांकन यस पटकको निर्वाचनमा हुनेछ।
अन्तिममा के भन्न चाहनुहुन्छ?
आम मतदातामा मेरो अपिल छ, १० वर्षसम्म तपाईंले एक जना सांसदलाई हेर्नुभयो, नयाँ उम्मेदवारलाई सहयोग गर्नुहुन्छ भन्ने अपेक्षा गर्छु। काठमाडौंको क्षेत्र नम्बर ८ सांस्कृतिक केन्द्र समेत हो। यहाँको ऐतिहासिक धरोहर बचाउन त्यही भावना र सोही समुदायको मान्छेबाट मात्र सम्भव छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
