कास्की क्षेत्र नम्बर-२ का प्रतिनिधिसभा उम्मेदवार रविन्द्र अधिकारी चुनावी अभियानको अन्तिम दिन निकै व्यस्त छन्। वाम गठबन्धनका साझा उम्मेदवार रविन्द्रका लागि चुनौती बनेर उभिएका छन्, कांग्रेसका देवराज चालिसे। विद्यार्थी राजनीतिबाट उदाएका दुवै नेताबीचको प्रतिस्पर्धाले कास्की- २ को चुनावी लडाइँ पेचिलो बनेको छ। संसदको विकास समिति हुँदै राष्ट्रिय राजनीतिको मञ्चमा आफूलाई क्रियाशील बनाउँदै लगेका अधिकारी तेस्रो पटक पनि चुनाव जित्ने दाबी गरिरहेका छन्। एमाले नेता अधिकारीसँग चुनावी सेरोफेरोमा रहेर नेपाल लाइभका हिमविक्रमले गरेको कुराकानी:
तेस्रो पटक मतदाताको घरदैलोमा पुग्दा कत्तिको दबाब महसुस गर्नुभएको छ?
दुई पटक जितेर काम गरिसकेपछि तेस्रो पटक दबाब हुँदैन। तेस्रो पटक किन? भन्ने त ईर्ष्या गर्ने मात्र हो। संविधान निर्माण र राष्ट्रिय विकासमा जुन भूमिका निर्वाह गर्यौं। यहाँको विकासमा जनतासँग जोडिएर काम गरियो, सहकार्य गरियो। यस हिसाबले निर्वाचनमा जनताको जुन स्वागत छ, त्यसबाट म ज्यादै खुसी छु। जुन उत्साह छ म खुसी छु। त्यसले मलाई कुनै पनि परवाह परेको छैन।
कास्कीको पूर्वाधार निर्माण लगायत विकास गति जसरी सुस्त देखिएको छ, त्यसमा परिवर्तन ल्याउन नयाँ उम्मेदवारलाई जिताउनुपर्छ भनेर विपक्षीले भनिरहेका छन् नि?
मेरो ठाउँमा त भन्नका लागि भन्ने हो। नत्र भने विकास निर्माणको हिसाबले म निर्वाचित भएपछि आजसम्मको अवस्थामा धेरै प्रगति हासिल भएको छ। विकासको सन्दर्भमा यो क्षेत्र अगाडि भएको कारण त्यो पनि हो। पूर्वाधार विकास निर्माण, पुँजीगत खर्च, शान्ति सुरक्षाका विषयमा हामीले नियमित बैठक र अनुगमन गर्ने गरेकाले नै प्रगति सम्भव भएको हो। आजको सापेक्षताको आधारमा भन्ने हो भने अन्य क्षेत्रभन्दा मेरो क्षेत्रमा धेरै ठूलो प्रगति हासिल भएको छ।
अघिल्ला निर्वाचनभन्दा यसपालि फरक छ। आममतदाताको अपेक्षा कस्तो पाउनुभयो?
अघिल्लो पटकको निर्वाचन संविधान निर्माणका लागि थियो। तर पनि विकास निर्माणका काम त रोकिएन। त्यो निर्वाचन अधिकार प्राप्तिको लडाइँ पनि थियो। यसलाई संस्थागत गर्ने कुरा थियो। अबको निर्वाचनमार्फत समृद्धि र विकास हासिल गर्नुपर्छ। संविधानका अक्षरहरुलाई कार्यान्वयन गर्नुपर्छ। संविधानमा समानता लेखिएको छ, समृद्धि लेखिएको छ; त्यो प्राप्ति गर्ने कुरा हो। त्यसका लागि योग्यतम मान्छे र बहुमतको सरकार सबैभन्दा प्रमुख आवश्यकता हो। राजनीतिक अस्थिरता अन्त्य गर्ने चुनाव हो यो।
जनताले तपाईंलाई फेरि पनि निर्वाचित गराएर किन संसदमा पठाउने?
मैले हिजो जे काम गरेँ, त्यसको मूल्यांकन गरिदिनुस् मात्र भनेको छु। मैले इमानदारी र निष्ठापूर्वक काम गरेको छु। राष्ट्रिय मञ्चमा राम्रो भूमिका खेलेको छु। आफ्नो मतदाताको शिर ठाडो पार्ने काम गरेको छु। अब सबै फैसला गर्ने काम जनताको हो।
युवा नेतृत्व पनि राष्ट्रिय एजेन्डा छाडेर स्थानीय तहका विकास निर्माणतिरै अल्झिए भन्ने टिप्पणी हुने गर्छ। राष्ट्रियस्तरको नेताका रुपमा आफूलाई परिचित गराइरहँदा तपाईंसँग मूल एजेन्डा केके छन्?
पहिलो कुरा, केन्द्रीय राजनीतिमा प्रमुख कुरा त हामीले वाम गठबन्धन बनाएका छौं। स्थिरता नहुँदा देश कमजोर भयो, विकास निर्माण भएन, छिमेकीले हेपे। हाम्रो स्वाभिमान समेत कमजोर बन्यो। यही अस्थिरता अन्त्यका लागि वाम गठबन्धन बनेको हो।
दोस्रो, हाम्रो विकास निर्माणका कामहरु प्रभावित छन्। विकासमा केही रकम खर्च भए, केही रोकिए, केही अल्झिएर बसेका छन्; हामीले केही काम अगाडि बढायौं। तर सरकार परिवर्तनसँगै यसले गति लिन सकेन। एउटा सरकार आउने-बनाउने, अर्कोले भत्काउने भइरहेको छ। मुलुकलाई विकास निर्माणको एउटा प्रभावमा लैजानका लागि अब नयाँ तरिकाले काम गर्नु जरुरी छ।
तेस्रो, युवा जनशक्ति जसरी विदेश पलायन भइरहेको छ, यसलाई रोक्ने कुरा अहिलेको चुनौती हो। हाम्रो प्राकृतिक स्रोत, साधनको परिचालन गरेर हरेक व्यक्तिलाई ज्ञान र सिप दिएर रोजगारीका अवसर सिर्जना गर्नुपर्नेछ। उनीहरुलाई आत्मनिर्भर बनाउने लक्ष्य हामीले लिएका छौं।
चौथो, हामी औद्योगिक क्रान्ति गर्न चाहन्छौं। विशेषगरी कृषि, प्रविधि, पूर्वाधार निर्माण, पर्यटन र जलविद्युत उत्पादनमा क्रान्ति ल्याउन चाहन्छौं। त्यसका माध्यमबाट देशलाई समृद्धिमा लैजाने हाम्रो एजेन्डा हो। १० वर्षभित्र गरिबी शून्यमा झार्न चाहन्छौं। समाजवादको आधार तयार गर्न चाहन्छौं। गरिबीमा उभिएको लोकतन्त्र र समाजवाद होइन। समृद्धिमा उभिएको समाजवाद खडा गर्न चाहन्छौं। सुखी नेपाली, समृद्ध नेपाली, समुन्नत नेपाल निर्माण गर्ने हाम्रो सपना हो।
जनतालाई विभिन्न प्रलोभन देखाएको र कतिपय ठाउँमा पैसाको बिटो नै दिएको उम्मेदवारमाथि आरोप किन लाग्ने गर्छ? यसले त निर्वाचन निकै महँगो हुने भयो होइन?
निर्वाचनलाई महँगो बनाउने प्रयास भइरहेको छ। मतदातालाई प्रलोभन देखाउने र पैसा बाँड्ने प्रयास भइरहेको देख्छु। तर यो समयका मानिस पैसामा खरिद हुँदैनन्। पैसाले भौतिक विलासी वस्तु किन्न सकिएला, जनताको मत र विश्वास किन्न सकिन्न। हामी भने निकै मितव्ययी तरिकाले काम गरिरहेका छौं। जनतासँग सहकार्य गरिरहेका छौं। कसरी कम खर्चमा निर्वाचन सम्पन्न गर्न सकिन्छ, यसमा हामी सचेत छौं।
हामी आचारसंहिता बनाउँछौ तर पालना गर्दैनौं। पैसाले चुनाव जित्न सकिन्छ भन्ने मानसिकताका कारण यस्तो भइराखेको हो। जतिबेलासम्म राजनीतिक दल र नेताहरु जवाफदेही, पारदर्शी र स्वच्छ हुँदैनन्, त्यो बेलासम्म यस प्रकारका विकृति रहिरहन्छ। जस्तै प्रणाली बनाए पनि रोक्न कठिन छ। पछिल्लो समय भने केही हदसम्म यसमा कमी आएको महसुस गरेको छु।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1785910910.png)
-1764146706.png)
